Akin Ya Ontanlan Maanos So Dios?
NENGNENG mo so maermen a lupa na naeerasan ya ugaw. Imanoen mo so mabeng a laman to tan linmarag ya eges. Isipen mo so andi-ilalon pankaukolan to na tagano, tan imanoen so anggapoy kargan yaong ya awit-awit to. Anganko say ina to so maniisip ed araldalem iran mata, say dilin lupa to so mangiretraton mismo ed inkaandi-ilalo. Insan salien mon tempeyen so ermen mo—on, tan pokpokan so iterter na luam.
Sayan eksena so naulit-ulit a minilyon iran danay ed say 2.3 laksan milya kuadradon naiirapan-ed-eras a lugar a kabkabat a bilang Sahel. Onlalaknab a masulok nen 3,000 milyas ed arap na abalaten ya Aprika na Disierto na Sahara, manlapud Senegal ed Baybay ya Atlantiko ya anggad Etiopia ed Ambalangan Dayat. Siempre, manaktakot met so eras ed dakel diad arum a daldalin. Say World Health Organization so angireport a ngalngalin 1.1 nilibon milyon a totoo ed liktob na dalin so seryoson tuloy a mansasakit odino kulang ed sustansya.
Siempre, say eras, so sakey lambengat a kabiangan na kairapan na too. Dudutakan na too so dalin, tan amin tayo so apektado. Aabobonan na saray politikon sistema so ag-inkahustisya tan bakal a mangitatarok na gonigon tan ermen ed dakel. Akin ya aabuloyan na Dios so ontan iran bengatla? Kasin sikato so mapaga ed sikatayo?
Peteg a Mapaga so Dios!
Peteg a mapaga ed sikatayo so Amalsa. Wala so dakel a paneknek ed saya tan ed abilidad to a manggawa na saray bengatla parad kaabigan tayo tan parad kitunosan na amin iran palsa to. Alimbawa, nengnengen yo so nitekep a retrato na alimbuyongan ya ombibisita ed onbubuskag a rosas na manbungan-kiew. Mandependi so alimbuyongan ed rosas lapud say nektar a kakaukolanen to diad katagano. Kanian, say kiew dia a nanenengneng tayo so madependi ed pollen ya aawiten na laman na alimbuyongan a manlalapud mipadparan kiew. Diad sayan dalan, say rosas so pollinated ta pian ombulaslas so bunga. Aliwan amin a manbungan-kiew a manprutas et man-pollinate ed ontan a dalan, balet maseguron walan angiyarunsa so Dios na nikadkaduman pikokoopera ed sayan kipapasen. Tan say kamaongan to so mansumpal ed bungan naakan tayo a tekep na liket tan gungguna.
Say mismon alimbuyongan so kabiangan na organisadon-maong a kumpol na masulok nen 30,000 iran alimbuyongan. Arum so manbantay ed ayaman na alimbuyongan, bangta saray arum so manlinis odino manparagem ed satan. Siansian saray arum so mansimpen na nektar tan pollen, pakanen so larva, odino mananap na balo iran lapuan na nektar. Ontanla so impanguksoy na Dios ed saray bengatla a nagunggunaan tayo sano say ontan iran alimbuyongan et mamawala na masamit tan masustansyan dilo a mamaliket ed pakataway tayo.
Say miraglo na pikokoopera ed baetan na saray alimbuyongan tan tanaman tan ed limog na saray bigis ed inkasikara so sakey lambengat ed dakel iran paneknek a say Amalsa so naspot a tuloy a mamakoopera ed balang sakey ed amin a mabilay a palsa. Diad satan a pamaakaran, “Say Dios so sakey a Dios, na aliwan gutgutan, noagta kareenan.” (1 Corinto 14:33) Sirin, akin ya inabuloyan to so katooan a niwala ed ontan ya agpantutunosan, tekep na nansumpalan ya irap ed ontanlan kinarakel? No say Dios et mapaga ed sikatayo, akin a sikato so nanalagar na ontanlan kabayag a mangorehi ed ontan a kipapasen? Peteg, akin ya ontanlan maanos so Dios?
Say Salita na Dios, say Biblia, so onebat ed saratan a tepet. Sayan makatantandan libro so mangibabaga ed sikatayo a si Jehova a Dios so maanos lapud maong a rason. Anto itan a rason? Tan panon kabayag ni a mansiansia so anos na Dios?
[Picture Credit Line ed pahina 2]
Cover photo: Frilet/Sipa