Manmatalek ed Manangilaban a Taklay nen Jehova
“O Jehova, magmaliw ka a pinagkataklay mi ed kinabuasan, on, say kilalaban mi ed panaon na kairapan.”—ISAIAS 33:2.
1. Diad anton pantalos a si Jehova et walaan na makapanyarin taklay?
WALAAN si Jehova na makapanyarin taklay. Siempre, lapud “say Dios so Espiritu,” satan so aliwan laman a taklay. (Juan 4:24) Diad Biblia, say piguratibon taklay so mangilalaman na abilidad a mangisekar na pakayari. Sirin, diad panamegley na taklay to ya iliktar na Dios iray totoo to. Peteg, ‘singa sakey a managpastol, papastolan na Dios so pulok to. Diad panamegley na taklay to tiponen toray kordero, tan akwalen tora.’ (Isaias 40:11; Salmo 23:1-4) Agaylan maligen so liknaan na totoo nen Jehova ed maaron taklay to!—Ipareng so Deuteronomio 3:24.
2. Anto iran tepet dia so mankanepegan na kunsiderasyon tayo?
2 Panon a walan angiliktar so taklay nen Jehova ed totoo to, diad apalabas tan kaplesan? Anton tulong so iter na Dios ed sikara a bilang sakey a kongregasyon? Tan akin a makapanmatalek iray totoo to ed manangilaban a taklay to legan na amin a kairapan da?
Onkikiwas a Manangilaban a Taklay na Dios
3. Diad siopa so pangipabtangan na Kasulatan ed kililiktar na Israel manlapud Ehipto?
3 Sakbay a niliktar iray Israelitas manlapud panangaripen ed Ehipto ed apalabas lan 3,500 taon, imbaga na Dios ed si propeta ton Moises: “Salitam ed saray anak na Israel, ‘siak si Jehova, tan seguradon ibulos takayo ed panamairap na saray Ehipsios tan iliktar ta kayo manlapud panangaripen da, tan dondonen ta kayo tekep na akaunat a taklay tan tekep na ankabaleg iran panangukom.’” (Exodo 6:6) Unong ed apostol Pablo, impaway na Dios iray Israelitas manlapud Ehipto “tekep na akatagey a taklay.” (Gawa 13:17) Impabtang na saray anak nen Kore ed Dios so impanalo ed Insipan a Dalin, ya angikuan: “Ta agda nala so dalin ed pankayarian da lapu ed ayura ra a dili, nisay inlaban ira na taklay da. Noag say kawanan a limam tan say taklay mo tan say liwawa na lupam, ta wala so abobon mo ed sikara.”—Salmo 44:3.
4. Panon a say panagmatalek ed manangilaban a taklay nen Jehova et tinumangan ed saray agew na Asiryanon panaglusob?
4 Tinmulong met so taklay nen Jehova ed totoo to ed saray agew na Asiryanon panaglusob. Diad saman a panaon nampikasi si propetan Isaias: “O Jehova, kasian mo kami. Nanilalo kami ed sika. Magmaliw ka komon a pinagkataklay mi ed kinabuasan, on, kilalaban mi ed panaon na kairapan.” (Isaias 33:2) Saman a pikakasi so inebatan sanen say anghel na Dios et amatey na 185,000 ed kampo na Asirya, ya amataynan ed si Arin Senakerib manlapud Jerusalem “tekep na abaingan a lupa.” (2 Awaran 32:21; Isaias 37:33-37) Say panmatalek ed manangilaban a taklay nen Jehova so lawas natumangan.
5. Anto so ginawa na makapanyarin taklay na Dios parad apasegsegang iran Kristiano ed sampot na Guerra Mundial I?
5 Say makapanyarin taklay na Dios so angiliktar ed apasegsegang iran alanaan a Kristiano ed sampot na Guerra Mundial I. Nen 1918 say hedkuarter na Mananguley ya Ulop so inataki na kakabusol da, tan saray kabkabat ya agagi so nipisok. Ataktakot ed minumundon pakayari, ngalngalin tinmunda so alanaan ed panagtasin kimey da. Balet sikaray nampikasi ed kipawil to tan ed kalinisan manlapud kasalanan ed inka-inaktibo tan ed inkadutak ed takot. Inmebat so Dios diad impangibulos ed saray agagin nipisok, diad impamaandi na pamakasalanan ag-abayag kayari na satan. Bilang nansumpalan na saray katuaan a nibalikas ed kumbension da nen 1919 tan ed inkikalbo na manamakiwas a masanton espiritu na Dios a say alanaan so abilay lamet ed andi-takot a panaglingkor ed si Jehova diad pinal a kasumpalan na Joel 2:28-32.—Apocalipsis 11:7-12.
Tulong ed Kongregasyon
6. Panon tayon amta a posiblin nasungdoan so pakasubokan a situasyon ed sakey a kongregasyon?
6 Legan a tutulongan na Dios so organisasyon to ed inkalapagan, iliktar na taklay toray sinansakey a wadtan. Siempre, saray kipapasen so aliwan ayadyari ed dinan man a kongregasyon lapud amin a totoo so ag-ayadyari. (Roma 5:12) Kanian arum ed saray ariripen nen Jehova so no maminsan et makaeksperiensia na pakasubokan a situasyon ed sakey a kongregasyon. Alimbawa, anggaman si Gayo so nanggawa na “matoor a kimey” diad impangabrasan sipaparawes ed ondadalaw iran agagi, si Diotrepes et ag-angabrasa ed sikara tan sinali to ni ingen ya italirak iray maparawes ed kongregasyon. (3 Juan 5, 9, 10) Anggaman kuan, tinulongan nen Jehova si Gayo tan saray arum a mantultuloy a mangipanengneng na panamarawes ed panuporta ed panagpulong-na-Panarian a kimey. Say panagpikasi tan panagmatalek ed Dios a mamenben na saray bengatla so nepeg ya ontulong ed sikatayon mansiansian manggawa na matoor iran kimey legan a manalagar tayo ed sikaton mametek ed situasyon a nayarin manusubok ed pananisia tayo.
7. Anggaman ed anto iran sirkumstansya ed kongregasyon na Corinto a saray matoor a Kristiano diman et nambilay unong ed dedikasyon da ed Dios?
7 No bilbilang et sikayo so mililimog ed inmunan-siglon kongregasyon na Corinto. Diad aminsan, sinigensigen na saray grupo so pankakasakey to, tan say pangiyabuloy ed imoralidad so anigensigen ed espiritu to. (1 Corinto 1:10, 11; 5:1-5) Saray mananisia so nandedemandaan ed minumundon korte, tan saray pigara so akikolkol ed nanduruman bengatla. (1 Corinto 6:1-8; 8:1-13) Say pankokolkol, imon, sanok, tan gutgutan so mamairap ed bilay. Arum ni ingen so nanduaruwa ed autoridad nen Pablo tan nanmudmora ed abilidad ton mansalita. (2 Corinto 10:10) Ingen, saray matoor a mililimog ed saman a kongregasyon so manbibilay unong ed dedikasyon da ed Dios legan na saman a pakasalian a panaon.
8, 9. Anto so nepeg tayon gawaen no sakey a pakasubokan a situasyon so nipaarap ed sikatayo ed kongregasyon?
8 No onlesa so pakasubokan a situasyon, kaukolan tayon mansiansia a kaibaray totoo na Dios. (Ipareng so Juan 6:66-69.) Manaanosan tayo komon, a bibidbiren a mas mabayag ed arum iran indibidual nen saray arum a mangisulong na “balon inkatoo” tan kawesan da so inkasikara na panangabagey, kaabigan, kaabebaan na nonot, kauyamoan, tan panagtepel. Lapud saray ariripen na Dios et miduma met ed abenegan, amin tayo so kaukolan a mangipanengneng na aro tan manamerdona.—Colosas 3:10-14.
9 Kayari na dakel iran taon na panaglingkor ed si Jehova, inkuan na sakey ya agin laki: “No wala so sakey a bengatlan sankaimportanti ed siak, satan so bengatlan pantultuloy a maapit ed nanengneng ya organisasyon nen Jehova. Say akaunan eksperiensiak so nambangat ed siak ya aliwan mabunigas ed espiritualidad so isaral ed katunongan na too. Bektan say kanonotan ko so nipekder ed saman a punto, adeterminak so pansiansia ed matoor ya organisasyon. Panon ta so pakaala na sakey ed abobon tan bendisyon nen Jehova?” Kasin mipadpararan papablien yo so pribilehyo ed panlingkor ed si Jehova a kaibaray magayagan totoo to? (Salmo 100:2) No ontan, agyo abuloyan so antokaman a mamaarawi ed sikayo manlapud organisasyon na Dios o maneral ed relasyon yo ed Sakey a say taklay to et mangisalba ed amin a mangaro ed sikato.
Tulong Sano Napaliberan Tayo na Saray Tukso
10. (a) Panon a say pikakasi et makatulong ed totoo na Dios ya onarap ed tukso? (b) Anton pamaseguro so inter nen Pablo ed 1 Corinto 10:13?
10 Bilang matoor iran sinansakey a mililimog ed organisasyon na Dios, walaan tayo na tulong legan na panaon na subok. Alimbawa, tulongan to itayon mamasiansia ed katooran tayo ed sikato sano sikatayo so napaliberan na tukso. Siempre, nepeg a manpikasi tayo a mitunosan ed saray salita nen Jesus: “Agmo kami itarok ed tukso, noagta iliktar mo kami manlapud mauges a sakey,” si Satanas a Diablo. (Mateo 6:9-13) Diad mipadparan kabaliksan, kekerewen tayo sirin ed Dios ya agmangiyabuloy ed sikatayon onsaew sano natukso itayon ontunganga ed sikato. Eebatan to met iray pikakasi tayo parad kakabatan pian natalonaan iray subok. (Santiago 1:5-8) Tan makapanseguro iray ariripen nen Jehova ed tulong to, ta inkuan nen Pablo: “Agkayo asabi na bengatlan katutukso noag samay nitepel na amin na totoo. Bangbalet say Dios matoor, ta agto kayo paulyanan a natukso na onlabas ed nayarian yo, noag ingen pati tukso et manggawa met na dalan a paliisan ta pian nasungdoan yo.” (1 Corinto 10:13) Anto so lapuan na ontan a tukso, tan panon a manggawa na pakapaliis so Dios?
11, 12. Diad anto iran tukso a sinmuko iray Israelitas, tan panon tayon nagunggunaan manlapud saray eksperiensia ra?
11 Say tukso so manlalapud saray sirkumstansya a managyat ed sikatayon magmaliw ya agmatoor ed Dios. Inkuan nen Pablo: “Sarayan bengatla panuliranan ed sikatayo, ta pian ag-itayo unagum ed saray mauges a bengatla, a singa [saray Israelita] kinaliktan da. Tan agkayo magmaliw a managtalintao, singa ginawa na arum ed sikara; unong na nisulat: ‘Saray totoo imyurong ira a mangan tan oninum, tan inmalagey ira a manliket.’ Tan agmanagamil na pilalalawanan, a singa akilawanan iray arum ed sikara, a naplag, so duamplo tan talon libo ed sanagew. Tan agtayo iyan si Jehova ed subok, a singa saray arum ed sikara so angyan ed sikato ed subok, ya abagbag ira na saray uleg. Tan agkayo mantalabutob, a singa arum ed sikara so nantalabutob, a pinatey ira na managbagbag.”—1 Corinto 10:6-10.
12 Nanpilalekan na saray Israelita iray mauges a bengatla sanen sikaray sinmuko ed tukso pian magmaliw a maagum ed panugyop tan pangan na sikling a mamiraglon intarok na Dios. (Numeros 11:19, 20, 31-35) Diad asasakbay et nagmaliw iran managtalintao sanen say inkaandid man nen Moises so amalesa na tukso a mibiang ed panagdayew ed kilaw. (Exodo 32:1-6) Nilibo so inatey lapud sikara so sinmuko ed tukso tan akilawanan ed Moabitan bibii. (Numeros 25:1-9) Sanen saray Israelita so sinmuko ed tukso tan nanmeremere nipaakar ed inkaderal nen rebelyoson Kore, Datan, Abiram, tan saray kakaiba ra, 14,700 so inatey manlapud nibakin madibinon dusa. (Numeros 16:41-49) Nagunggunaan itayo manlapud ontan iran eksperiensia no natalosan tayo ya anggapo anggan sakey ed sarayan tukso so ontanlan baleg ya agnapaliisan na saray Israelitas. Agawaan da komon no sikaray angagamil na pananisia, no akisalamat ira ed maaron panagtalima na Dios, tan no sikara so angapresya ed inkaptek na Ganggan to. Inliktar ira komon na taklay nen Jehova, a singa pangiliktar to met ed sikatayo.
13, 14. Panon nen Jehova a manggawa na dalan a napaliisan so tukso sano nipaarap iray ariripen to?
13 Bilang Kristianos, nidudunget itayo ed saray tukso a kaslakan ed katooan. Ingen, makapansiansia tayon matoor ed Dios diad pampikasi ed tulong to tan manggunaet a tulakan so tukso. Say Dios so matoor, tan agto itayo abuloyan a natukso ed labas na nayarian tayo. No sikatayo so matoor ed si Jehova, agtayon balot naromog ya imposibli so panggawa ed linawa to. Sikato so manggawa na dalan a napaliisan diad panamegley na pamabiskeg ed sikatayon tulakan so tukso. Alimbawa, sano napasegsegang, nayarin sikatayo so natukson mikompormiso ed ilalon nabatikan so panamairap odino ipapatey. Balet no sikatayo so manmamatalek ed makapanyarin taklay nen Jehova, agbalot makasabi so tukso ed punto no iner ya agto napabiskeg so pananisia tayo tan makapangiter na malaglaem a biskeg pian napansiansia so katooran. Unong ya inkuan na apostol Pablo: “Naeletan kami ed balang diking, balet agmankelat ya agla makagalaw; manduaruwa kami, balet agnaekal so panilalo mi; apasegsegang kami, balet ag-apaulyanan; nikaindan kami, balet ag-abagbag.”—2 Corinto 4:8, 9.
14 Susustinien met nen Jehova so totoo to diad panamegley na pangusar ed espiritu to a bilang manangipanonot tan sakey a managbangat. Satan so mangipanonot ed sikatayo na saray Makasulatan a punto tan ontulong ed sikatayon manebek no panon ya iyaplika iratan ta pian natulakan so tukso. (Juan 14:26) Natalosan na matoor ya ariripen nen Jehova iray salisalan a nalalanor ed sakey a tukso tan ag-ira napalikdo ed itumbok ed mauges a kurang. Nanggawa so Dios na dalan a napaliisan ta pian makapansungdo ira ya anggad patey ya ag-onsuko ed tukso. (Apocalipsis 2:10) Nilikud ed itulong ed ariripen to diad panamegley na espiritu to, inusar nen Jehova iray angheles to ed biang na organisasyon to.—Hebreos 1:14.
Tulong ed Personal Iran Bengatla
15. Anton personal a tulong so naromog tayo ed Kanta nen Solomon?
15 Saraman so mililimog ed organisasyon nen Jehova so walaan na tulong to diad personal iran pamaakaran. Alimbawa, nayarin saray arum so mananap na sakey a Kristianon kapareha. (1 Corinto 7:39) No wala so inkadesperado, nayarin makatulong so pangunsidera ed si arin Solomon na Israel. Sikato so sinmaew a makagamor na panangabobon na Sulamitan marikit ed pikasal lapud inaro to so sakey a maapabeban managpastol. Say kurit na ari nipaakar ed sayan bengatla so natawag a Say Kanta na Impakasaew nen Solomon ed Aro. Nayarin sikatayo so onakis no say mismon romantikon sagpot tayo so andi kana ed sakey a kaso, balet atalonaan nen Solomon so inkadesperado to tan nayarian tayo met. Makatulong so espiritu na Dios ed sikatayo a mangipanengneng na dangka tan arum a maridios a kalidades. Ontulong ed sikatayo so Salita to ya awaten so mabetbet ya ansakit a katuaan a say sakey a too et agnawalaan na romantikon aro ed basta siopaman. (Kanta nen Solomon 2:7; 3:5) Ingen, Say Kanta nen Solomon so mangipanengneng a posiblin makaromog na kapananisiaan a mangaro ed sikatayon maong. Nagkalalon importanti, sayan “superlatibon kanta” so asumpal ed aro na Maabig a Pastol, si Jesu-Kristo, ed “nobya” to a 144,000 alanaan iran patumbok.—Kanta nen Solomon 1:1; Apocalipsis 14:1-4; 21:2, 9; Juan 10:14.
16. Say “kairapan ed laman da” a naeksperiansia na saray Kristianon walaan na asawa so mangilaktip ed anto?
16 Anggan saramay mangasawa na mananisia so walaan na “kairapan ed laman da.” (1 Corinto 7:28) Walara so kapagaan tan pakabelatan a mangilalanor ed asawan laki tan asawan bii tan ed ananak da. (1 Corinto 7:32-35) Nayarin say beblay so mangitarok na pabelat tan panaburido. Say panamasegsegang odino inkaduka so mamairap ed Kristianon ama a manustine ed saray nesesita na bilay parad pamilya to. Saray ateng tan ananak so makapansian nisesengeg ed inkapisok, tan arum so nayarin napairap tan napapatey ni ingen. Balet diad amin na saratan a sirkumstansya, natulakan tayo so tukso a mangiburi ed pananisia no peteg a manmamatalek tayo ed manangilaban a taklay nen Jehova.—Salmo 145:14.
17. Anton problem ed pamilya so ayarin asungdoan nen Isaac tan Rebeka?
17 Nayarin sungdoan tayoray pigaran subok ed andukey a panaon. Alimbawa, nayarin sengegan na panermen na maridios ya atateng so pangasawa na anak a laki ed sakey ya agmananisia. Agawa itan ed pamilya na patriarkan Isaac tan asawa ton si Rebeka. Say mantaon na 40 anak dan laki a si Esau so angasawa na duaran Jeteon bibii a nagmaliw a “lapuan na kapagaan ed espiritu nen Isaac tan si Rebeka.” Diad tua, “impurek nen Rebeka ed si Isaac: ‘Naalipanesan ak ed sayan bilay nisengeg ed bibiin anak nen Jet. No si Jacob [say sananey ya anak dan laki] et mangasawa na sakey ed saray bibii ya anak nen Jet a singa saraya so bibii ya anak a taga dia ed sayan dalin, anto so kaabigan na bilay ed siak?’” (Genesis 26:34, 35; 27:46) Mabitabitar, say matunong a kamarerwa nen Rebeka so apairap na sayan mantultuloy a problema. (Ipareng so 2 Pedro 2:7, 8.) Ingen, say taklay nen Jehova so angitandoro ed si Isaac tan si Rebeka, a makapansungdo ira ed sayan subok leleg a pansiasiansiaen so mabiskeg a siglaotan ed Sikato.
18. Anton personal a subok so sinungdoan nen C. T. Russell a tekep na tulong na Dios?
18 Makapaermen sano sakey a bautismadon membro na pamilya so onkesay ed serbisyo ed Dios. (Ipareng so 2 Timoteo 2:15.) Ingen, arum so walan nanirap ni ingen ed espiritual ya impakabalang na kapareha, a singa agawa ed si Charles T. Russell, say inmunan presidente na Watch Tower Society. Say asawa ton bii so amoltot ed koneksyon to ed Sosyedad tan tinaynan to nen 1897, kayari na ngalngalin 18 taon a panamaley. Sikato so angikaso parad legal a pansiyan nen 1903, tan say legal a pansiyan so naabobonan nen 1908. Mapatnag so ermen to sanen imbaga to ed sikato ed asakbay a sulat to: “Sigugunaet ak a nampikasi ed Katawan diad biang mo. . . . agtaka pabelatan nisesengeg ed ermen ko, nisay salien kon palesaen so emosyonal a kiwas diad panbinsabinsak na saray liknaan ko, a tunggal paminsan kon naimano iray kawes mo tan arum iran bengatlan malinlinew a mangipanonot ed siak a singa ed dati—ya ontanlan napno ka na aro tan empatya tan pananulong—a mangiretrato na espiritu nen Kristo. . . . O, imnaoen mo pan sipipikasi so ikuan ko. Tan maseguro ka a say matudion ansakit ed siak et say aralem ya emosyonal ya epekto, ya aliwan say dilin kaermenan ko ed nakekeraan a bilay ko, noagta say inkaplag mo ed lingo, o inadarok, say andi-anggaan ya inkabalang mo, unong ed no antoy nanengneng ko.” Anggaman ed ontan a sakit-ed-linawa, walan tinulongan na Dios si Russell ya anggad sampot na mangaraldalin a bilay to. (Salmo 116:12-15) Lawas itandoro nen Jehova iray matoor ya ariripen to.
Nanlapud Amin a Kaermenan
19. Anto so nepeg tayon nonoten no mantultuloy iray makapaermen a problema?
19 Kabkabat na totoo nen Jehova a sikato so “Dios na panangiliktar,” Sakey ya “inagew-agew a manlilibit na awit tayo.” (Salmo 68:19, 20) Sirin, bilang dedikadon sinansakey a mililimog ed mangaraldalin ya organisasyon to, agtayon balot onsusuko a naandian na ilalo no mantultuloy iray makapaermen a problema. Nonoten a “say Dios sikato so salimbeng tan biskeg tayo, sikato so sakey a sipaparaan a tulong ed gonigon.” (Salmo 46:1) Say panmatalek tayo ed sikato so lawas natumangan. “Inanap ko si Jehova et sikato inebatan toak,” inkuan nen David “tan inliktar toak ed amin a kapagaan ko. . . . Sayan too a duka so tinmawag et dinengel a mismo nen Jehova. Tan inlaban To a manlapud amin a gonigon to.”—Salmo 34:4-6.
20. Anton tepet so mansiansian nakunsidera?
20 On, say mangatatawen ya Ama tayo so mangilaban ed totoo to ed amin a gonigon. Susuportaan to so mangaraldalin ya organisasyon to, a mangitatarok na tulong ed saray pamaakaran na kongregasyon tan ed personal iran pamaakaran. Peteg, “ya agpaulyanan nen Jehova so baley to.” (Salmo 94:14) Balet kunsideraen tayoray arum a dalan a si Jehova so ontulong ed saray totoo to a sinansakey. Panon a say mangatatawen ya Ama tayo so manustine ed ariripen ton mansasakit, nagogonigon ed mental, mandageyem lapud inateyan, odino nagogonigon ed dilin lingo ra? Unong a nanengneng tayo, diad saraya met a pamaakaran, walaan itayo na katunongan ya onsaral ed makapanyarin taklay nen Jehova.
Panon so Pangebat Yo?
◻ Panon a say taklay nen Jehova so angitarok na kilalaban ed apalabas a panaon?
◻ Panon a tutulongan nen Jehova iray totoo to ed kongregasyon natan?
◻ Anton tulong so itatarok na Dios ed personal iran pamaakaran?
◻ Anto so nepeg tayon gawaen no mantultuloy iray makapaermen a problema?
[Litrato ed pahina 14, 15]
Impaway na Dios iray Israelita manlapud Ehipto “tekep na nitandoron taklay”