Gawaen Yon Suporta Iray Andi-anggaan a Taklay nen Jehova

“Say maando a Dios so panayaman, tan wala ed leksab iray andi-anggaan a taklay.”​—DEUTERONOMIO 33:27, American Standard Version.

1, 2. Akin a makapanmatalek iray totoo nen Jehova ed tulong to?

TALIMAEN nen Jehova iray totoo to. Alimbawa, legan na amin ya ermen na saray Israelita, “satan so makapaermen ed sikato”! Diad aro tan panangabagey, sikato so “angawit tan angulor ed sikara.” (Isaias 63:7-9) Kanian no sikatayo so matoor ed Dios, makapanmatalek tayo ed tulong to.

² Inkuan nen propetan Moises: “Say maando a Dios sikato so pasen a panayaman, tan wala ed leksab na taktaklay a maando.” (Deuteronomio 33:27) Ikuan na sananey a patalos: “Say maando a Dios so panayaman, tan wala ed leksab iray andi-anggaan a taklay.” (American Standard Version) Balet panon a saray taklay na Dios so ontulong ed ariripen to?

Akin ya Ontanlan Dakel Iray Irap?

3. Kapigan a say matulok a katooan et nagnap a tuloy a makapangayaga ed “maglorian kawayangan na ananak na Dios”?

³ Say panlinkor ed si Jehova so agmangipaliis ed sikatayo manlapud irirap a kaslakan ed ag-ayadyarin totoo. Inkuan na aripen na Dios a si Job: “Say toon nianak ed bii et antikey iray agew to, tan napno na gonigon.” (Job 14:1) No nipaakar “ed saray agew na taotaon tayo,” inkuan na salmista: “Say panggunaet da so mamaarap ed gonigon tan makapasakit iran bengatla.” (Salmo 90:10) Ontan so bilay ya anggad ‘say palsa so nibulos ed inkaaripen na kabulokan tan walaan na maglorian kawayangan na ananak na Dios.’ (Roma 8:19-22) Nagawa itan legan na Sanlibon Taon ya Uley nen Kristo. Saray atooan ya uuleyan na Panarian so makaeksperiensia diad satan na kililiktar manlapud kasalanan tan patey nisesengeg ed dondon bagat nen Jesus. Diad sampot na Milenyo, si Kristo tan kakaiba ton ari-saserdote so walan akatulong ed matulok a katooan a makadampot ed inkayadyari, tan saramay matoor ed Dios legan na kaunoran a subok nen Satanas tan dedemonyos to so walan nisulat iray kangaranan dan permanenti ed “libro na bilay.” (Apocalipsis 20:12-15) Insan nagnap a tuloy dan pangayagaan so maglorian kawayangan na ananak na Dios.

4. Imbes a manreklamo ed saray personal a sirkumstansya tan kipapasen ed bilay, anto so nepeg tayon gawaen?

⁴ Kaleganan to, imbes a manreklamo ed saray personal a sirkumstansya tan kipapasen ed bilay, manmatalek itayo ed si Jehova. (1 Samuel 12:22; Judas 16) Misalamat tayo met ed Atagey a Saserdote tayo, si Jesus, a diad panamegley to et makaasingger itayo ed Dios “pian makagamor itayo na panangasi tan makalmo na agkanepegan a panangasi parad tulong ed dugan panaon.” (Hebreos 4:14-16) Agtayon balot komon mipara ed si Adan. A diad katuaan et tinetel to si Jehova ya angiter diad sikato na mauges ya asawan bii, ya angikuan: “Say bii ya inter mo ya ibak, initdan toak na bunga kanian angan ak.” (Genesis 3:12) Mangiiter na maabig a bengabengatla so Dios tan agmangitarok na irap ed sikatayo. (Mateo 5:45; Santiago 1:17) Saray irirap so mabetbet a resulta na dilin kakulangan tayo na kakabatan odino ed saray lingo na arum. Nayarin onsabi met iratan ed sikatayo lapud sikatayo so makasalanan tan manbibilay ed sakey a mundon mandukdukol ed pakayari nen Satanas. (Uliran 19:3; 1 Juan 5:19) Ingen, say andi-anggaan iran taklay nen Jehova so lawas ontulong ed matoor ya ariripen to a sipipikasin manilalo ed sikato tan personal a mangiyaplika na konseho ed Salita to.​—Salmo 37:5; 119:105.

Asustine Leleg na Paninagem

5. Anton panamaseseg so nayarin naromog na saray mansasakit diad Salmo 41:1-3 natan?

⁵ Say paninagem so kaslakan a sengegan na gonigon tayo tunggal paminsan. Ingen, inkuan nen David: “Mapalar so mangimano na duka; ta iliktar nen Jehova ed agew na kaatapan. Si Jehova a mismo so manbantay ed sikato tan pansiansiaen to a mabilay. Sikato so napapalar dia ed dalin; tan sikato so agmo niyawat ed kaliktan na saray kakabusol to. Si Jehova a mismo so mamabiskeg ed sikato ed tapew na dokolan na paninagem; a maseguron salatan mo so amin a dokolan leleg na pansasakit to.”​—Salmo 41:1-3.

6, 7. Panon a tinulongan na Dios si David sanen sikato so walad dokolan-na-sakit, tan panon a saya et mamaseseg ed saray ariripen nen Jehova?

⁶ Say makonsideran too so ontulong ed mankaukolan. “Say agew na desyang” so nayarin makadesyang a tuloy a kipapasen odino andukey a panaon na irap a mamakapuy ed sakey ya indibidual. Sikato so manmatalek ed Dios a manbantay ed sikato legan na beblay, tan saray arum so ‘mangiyabawag ed sikaton maliket ed dalin’ diad pangilaknab na saray balita ed mapangasin pidedeneng nen Jehova ed sikato. Sinustine na Dios si David “ed dokolan na paninagem,” nayarin legan na makadetdet a panaon sanen say ilalak nen David a si Absalon so mansamsam ed trono na Israel.​—2 Samuel 15:1-6.

⁷ Lapud impanengneng nen David so konsiderasyon ed duka, liknaen to a say Dios so manustine ed sikato leleg a sikato so agmakayari ed dokolan-na-sakit. (Salmo 18:24-26) Anggaman maninagem a maong, sikato so matalek a say Dios so ‘mansalat ed dokolan to,’ aliwan diad panamegley na mamiraglon pangekal ed sakit, balet diad pamabiskeg ed sikato a tekep na makaligliwan kanonotan. Satan so kuanmonon si Jehova so mamasimbalo ed dokolan to a manlapud paninagem a mamaarap ed pakaabig. Mipadpara, no sikatayo so maninagem bilang ariripen na Dios, say andi-anggaan iran taklay nen Jehova so ontulong ed sikatayo.

Ligliwa Parad Saray Nalelemay

8. Panon a walan impanengneng na sakey a mansasakit a Kristiano so panagmatalek ed Dios?

⁸ Say sakit so nayarin sengegan na mental depresyon. Sakey a maninagem a maong a Kristiano, a no maminsan et onkulang na biskeg a manbasa so angisalaysay: “Saya so sengegan a makaeksperiensia ak na dakel a liknaan na gonigon, liknaan na andi-kakanaan, tan anggan pannangis,” ikuanto. Diad pakaamta a labay nen Satanas a manermen ed dilin liknaan ton pakadismaya, sikato so mipupuligesgesan, a kabkabat a diad tulong nen Jehova et sikato so ag-onsaew. (Santiago 4:7) Sayan laki so makapaseseg ed saray arum a makaamta a sikato so manmamatalek ed Dios. (Salmo 29:11) Anggan sano na-ospital, sikato so man-telepono ed saray mansasakit tan saray arum pian pasesegen ira ed espiritual. Sikaton mismo so apaseseg diad itatalineng ed audiocassette recordings na Kingdom melodies tan saray artikulo na sayan dyurnal tan say kaulop ton magasin, Awake! tan ed pililimog ed kaparan Kristianos. Ikuan na sayan agin laki: “Maparanay ak a mitotongtong ed si Jehova diad pikakasi, onkekerew ed sikato a mangiter ed siak na biskeg, panangiwanwan, ligliwa, tan tulong pian makapansungdo.” No sikayo so sakey a Kristianon manlilikna na seryoson problema ed bunigas, lawas manmatalek ed si Jehova tan gawaen iray andi-aggaan a taklay ton tulong yo.

9. Anto iran ehemplo so mangipanengneng a say mental depresyon so mangonigon a tunggal paminsan ed maridios a totoo?

⁹ Say depresyon so kadaanan la a problema. Legan a walad leksab na subok, nansalita si Job a singa sakey a toon inkaindan na Dios. (Job 29:2-5) Say kapagaan ed nagban kipapasen na Jerusalem tan saray bakor to so amaermen ed si Nehemias, tan agonigon a tuloy si Pedro ed impangitapat to ed Kristo a sikato so nanakis na ampai-pait. (Nehemias 2:1-8; Lucas 22:62) Agonigon si Epaprodito lapud nadngelan na saray Kristiano ed Filipos a sikato so mansasakit. (Filipos 2:25, 26) Arum a Kristiano ed Tesalonica so atalos na depresyon, kanian pinaseseg nen Pablo iray agagi diman a “mansalitan sililigliwa ed magonigon a kakamarerwa.” (1 Tesalonica 5:14) Kanian panon a tulongan na Dios iray ontan ya indibidual?

10. Anto so nayarin makatulong diad panalona ed mental depresyon?

¹⁰ Say personal a desisyon so nepeg a nagawa nipaakar ed propesyonal a panambal ed graben depresyon.a (Galacia 6:5) Say magenap ya ugip tan asimbang a kimey so makatulong. Imbes a momoriaen iray problema a nigrupo a bilang sakey a baleg a problema, say agonigon ya indibidual so makaromog a makatulong so panresolbe ed saratan a mantutumbokan. Say makaligliwan tulong manlapud mamatatken ed kongregasyon so nayarin makatulong a maong, nagkalautla no sayan emosyonal a problema so sengegan na espiritual a kapagaan. (Santiago 5:13-15) Manuna ed amin, makana so panmatalek ed si Jehova, ‘imatalek ya amin ed sikato so kapagaan tayo, ta aasikasoen to itayo.’ Say siseseet tan impapuson pikakasi so makapangitarok ed sakey na ‘kareenan na Dios a manbantay ed puso tan kanonotan diad panamegley nen Kristo Jesus.’​—1 Pedro 5:6-11; Filipos 4:6, 7.

Tulongan Itayo nen Jehova a Mansungdo ed Kaermenan

11-13. Anto so makatulong a mamawas ed ermen ed impatey na inadaro?

¹¹ Sananey a makapagonigon ya eksperiensia so ipatey na inadaro. Si Abraham so nanangis diad impatey na asawan ton, Sara. (Genesis 23:2) Sanen inatey si ilalak ton Absalon, si David so naermenan. (2 Samuel 18:33) Siempre, anggan say ayadyarin toon si Jesus so “nananggis” ed impatey na kaaro ton si Lazaro! (Juan 11:35) Kanian wala so panermen sano laen na patey so inadaron sakey. Balet anto so makatulong ed pamawas ed ontan ya ermen?

¹² Tulongan na Dios iray totoo to a mansungdo ed alablabas ya ermen na inateyan. Ikuan na Salita to a wala so kioli. Sirin, agtayo “manermen a singa saray arum ya andian na ilalo.” (1 Tesalonica 4:13; Gawa 24:15) Tulongan itayo na espiritu nen Jehova a nawalaan na kareenan tan pananisia tan mandalepdep ed makapakelaw ya arapen a nisipan ed Salita to, ta pian sikatayo so agmakapanermen ed panisip nipaakar ed impatey na inadaron sakey. Say ligliwa so manlapu met ed pambasa na Kasulatan tan panpikasi ed “Dios na amin a ligliwa.”​—2 Corinto 1:3, 4; Salmo 68:4-6.

¹³ Makaagwat tayo na ligliwa manlapud ilalo ed kioli a singa ginawa nen maridios a si Job, ya angiyabawag: “O komon ta yamot moak dia ed Sheol, pian niyagel moak a maamoamot anggad onlabas so sanok mo, pian turoen mo ed siak so sakey a tinandaan a panaon, tan nonoten moak. No ompatey so sakey a too, kasin nabilay lamet? Amin iray agew na pibabakal ko alagden ko, angga ed say kabulos ko onsabi. Ontawag ka, et onebatak a mismo ed sika. Manpilalek ka ed gawa na saray limam.” (Job 14:13-15) Say baleg a kaermenan so aggendat a naeksperiensia diad pambaroy na inadaron kaaro, ta nailaloan tayon nanengneng lamet. Say panermen a maong lapud impatey na inadaro so nabawasan no moriaen tayo so impatey na matoor a Kristiano ed mipadparan dalan. No sikato so walaan na mangaraldalin ya ilalo, sikato so nabangon manlapud ugip ed patey diad dalin legan na Sanlibon Taon ya Uley nen Kristo. (Juan 5:28, 29; Apocalipsis 20:11-13) Tan no manilalo tayon manbilay ya ando lan ando ed dalin, nayarin sikatayo so wadia a mangabet ed inadaro tayon apaoli.

14. Panon a tinalonaan na duaran balo so impatey na asawa ran lalaki?

¹⁴ Kayari impatey na asawa ton laki, kabat na sakey ya agin bii a nepeg ton mantultuloy ed saray kimey to ed panaglinkor ed Dios. Nilikud ed pansiansian okupado ed ‘dakel a gawaen ed kimey na Katawan,’ sikato so nanggawa na 800 pirason kubrekama. (1 Corinto 15:58) “Saya so sakey a maabig a proyekto,” kuanto, “ta diad amin a panaon na pankikimey ko makatalineng ak ed Kingdom melodies tan Bible tapes, a gawaen ton okupado so nonot ko.” Sililiket ton nanonotan so imbisita na sakey ya eksperiensiadon matatken tan asawa ton bii. Manlapud Biblia, inturo na matatken a say Dios so petepeteg a manatalima ed saray balo. (Santiago 1:27) Sananey nin Kristianon bii so agsinmuko ed dilin-pangabagey sanen inatey so asawa ton laki. Inapresya to so tulong na saray kakaaro tan angala na babaleg ya interes ed saray arum. “Lalon mabebet ak a manpikasi tan amayubo na mas maapit a relasyon ed si Jehova,” inkuanto. Tan agaylan bendisyon a walaan na tulong ed andi-anggaan iran taklay na Dios!

Tulong Sano Nalingo Tayo

15. Anto so manunan karga na saray salita nen David ed Salmo 19:7-13?

¹⁵ Anggaman inaro tayo so ganggan nen Jehova, nalingo tayo no maminsan. Agpanduaruwaan a mamagonigon iya ed sikatayo, a singa agawa ed si David, a diad sikato et saray ganggan, panonot, bilibilin, tan hudisyal iran desisyon so nagkalalon kaliktan nen say balitok. Inkuanto: “Say dilin aripen mo so walan pinasakbayan da; diad pangunor da wala so baleg a tumang. Saray lingo​—siopa so makatebek? Linisan moak ed saray maamot a kasalanan. Ontan met pokpokan mo so aripen mo manlapud saray maangap a kiwas; agmora abuloyan a nawalaan na pakauley ed siak. Diad satan maptek ak, tan malinew ak naani manlapud baleg iran impakalukso.” (Salmo 19:7-13) Usisaen tayorayan salita.

16. Akin ya onarawi tayo ed inkamapasang?

¹⁶ Saray mapasang a kiwas so nagkalalo nin seryoson kasalanan nen saray lingo. Si Saul so impulisay a bilang ari lapud mapasang a tuloy ya angitarok na bagat tan diad impangipuerad bilay na Amalekitan arin Agag tan say sankaabigan a samsam, anggaman walan inganggan na Dios a saray Amalekita so nitalaga ed kadederal. (1 Samuel 13:8-14; 15:8-19) Si arin Uzias so adapoan na kating lapud mapasang a tuloy a sinamsam toray kimey na inkasaserdote. (2 Awaran 26:16-21) Sanen say kaban na sipan so aawiten a mamaarap ed Jerusalem tan say baka a manguguyor ed kariton so ngalngalin nitaob, kinabil na Dios si Uza ed ipapatey lapud agmarespeton inegnaan to so Kaban ta pian agnatumba. (2 Samuel 6:6, 7) Kanian, no agtayo amta no antoy gawaen odino naautorisaan itayo a manggawa na bengatla, nepeg tayon ipanengneng so kaumildian tan mangonsulta ed saraman so walaan na pakatebek. (Uliran 11:2; 13:10) Siempre, no sikatayo so mapasang, nepeg tayon mampikasi parad kaperdona tan onkerew ed Dios a tulongan itayo a manbantay a sumpad inkamapasang ed arapen.

17. Panon a saray niyamot a kasalanan et mangapekta ed sakey a too, ingen panon a nagamoran so panamerdona tan ligliwa?

¹⁷ Saray niyamot a kasalanan so nayarin sengegan na gonigon. Unong ed Salmo 32:1-5, sinali nen David ya iyamot so kasalanan to, balet inkuanto: “Sano agak onesel saray pukel ko natming ira ed panaglem ko a sanagew. Ta agew tan labi a say limam ambelat nen saman ed siak. Say kalambotan na bilay ko nagmaliw a singa kelang ed tiagew.” Say panasalin pamatunda ed nagogonigon a konsiensia so mamakesaw ed si David, tan say ermen so amawas na biskeg a singa sakey a kiew a naandian na manangiter-bilay a kalambotan legan na kelang odino ed makaalong a petang na tiagew. Mapatnag a sikato so nansakit ed mental tan pisikal tan akabalang na gayaga lapud insaew a mankumpisar. Say pankumpisar lambengat ed Dios so makapangitarok na panamerdona tan ligliwa. Inkuan nen David: “Maliket so naperdona ed saray isusumlang to, say asakbongan so kasalanan to. . . . Diad kaunoran ikumpisar ko so kasalanan ko ed sika, tan agko iyamot so kasulitan ko. Inkuanko: ‘Ipatuak ed si Jehova iray isusungay ko.’ Tan sikan mismo so mamerdona ed kasulitan na saray kasalanan ko.” Say maaron tulong manlapud Kristianon mamatatken so makatulong a mangiyalibansa na iyabig ed espiritual.​—Uliran 28:13; Santiago 5:13-20.

18. Anto so walan ebidensya a say kasalanan et walaan na andukey-a-panaon iran epekto, balet anto so nayarin magmaliw a lapuan na ligliwa ed ontan iran sirkumstansya?

¹⁸ Nayarin say kasalanan so walaan na andukey-a-panaon iran epekto. Ontan so agawa ed si David, ya akikalugoran ed si Bat-sheba, ya angimaneho ed ipatey na asawa to, tan inasawa to so malukon a balo. (2 Samuel 11:1-27) Anggaman angipanengneng so Dios na panangasi lapud sipanan ed Panarian, say panagbabawi nen David, tan mapangasin awawey to ed saray arum, naeksperiensia nen David so ‘desyang ed dilin abung to.’ (2 Samuel 12:1-12) Say anak ed pikakaluguran so inatey. Pinasoot na ilalak nen David a si Amnon so agi-to-ed-ina a si Tamar tan sikato so impapatey nen agi ton Absalon. (2 Samuel 12:15-23; 13:1-33) Pinabanday nen Absalon si David diad impirelasyonan ed saray bibii nen David. Sasalien ton samsamen so trono balet sikato so akasagmak na ipapatey. (2 Samuel 15:1–​18:33) Say kasalanan so siansian walaan na saray epekto. Alimbawa, say sakey ya adispelon managkasalanan so nayarin manbabawi tan nipawil ed kongregasyon, balet mankaukolan na dakel iran taon pian naekal so amansaan a reputasyon tan emosyonal a panirap lapud kasalanan. Anggaman ontan, agaylan makaligliwa so nawalaan na panamerdona nen Jehova tan tulong na andi-anggaan iran taklay to!

Niliktar Manlapud Saray Detdet ed Sikatayo

19. Panon ya ontulong so espiritu na Dios sano sikatayo so alablabas a nasubok?

¹⁹ Sano alablabas a nasubok, nayarin onkulang tayo na supisienten kakabatan tan biskeg a manggawa na desisyon tan manumpal ed satan. Diad ontan a kipapasen, say espiritu na Dios “so ontulong met ed kakapuyan tayo; ta agtayo amta no panon so panpikasi tayo unong ed kaukolan tayo, noag say mismon espiritu gawaen to so panagyesel parad sikatayo ed agnibalikas a paningel.” (Roma 8:26) No si Jehova so mangitarok na panguman ed saray sirkumstansya, nepeg tayo so misalamat. Ingen, say taklay to so mangisalba ed sikatayo ed sananey a dalan. No sikatayo so manpikasi parad kakabatan, si Jehova diad panamegley na espiritu to et mangipanengneng no anto so nepeg a gawaen tayo tan mangiter na biskeg a nakakaukolan pian nagawaan itan. (Santiago 1:5-8) Tekep na tulong to, makapansungdo itayo sano “nagonigon ed saray nanduruman subok” tan onarap ed saratan a tekep na asubok tan apabiskeg a pananisia.​—1 Pedro 1:6-8.

20. Anto so pangayagaan tayo no peteg a gawaen tayon tulong iray andi-anggaan a taklay nen Jehova?

²⁰ Agtayon balot ontundan onasingger ed Dios diad pikakasi. “Saray matak wala ra lawas ya akaarap ed si Jehova, ta sikato so mangipaway ed salik a manlapud iket,” inkuan nen David. “Lingay ka ed siak, tan kasian moak; ta maingew ak tan apaermen ak. Saray gonigon na pusok apabaleg ira; O ipaway moak ed saray kaototan ko. Osdongan mo so kaermenan tan sakit ko, tan perdonaen mo so saray kasalanan ko.” (Salmo 25:15-18) Singa si David, makapangayaga tayo ed madibinon kililiktar, panangasi, tan panamerdona no peteg tayon gawaen a tulong tayoray andi-anggaan a taklay nen Jehova.

[Paimano ed leksab]

Panon so Pangebat Yo?

◻ Panon a tulongan nen Jehova iray ariripen ton mansasakit?

◻ Anto so nayarin makatulong sano panguggunaetan tayon talonaan so mental depresyon?

◻ Anto so ontulong a mamawas na ermen ed impatey na inadaro?

◻ Panon a saramay mangiyamot na kasalanan et makawat na ligliwa?

◻ Anto so makatulong sano saray totoo nen Jehova et alablabas a nasubok?

[Litrato ed pahina 20, 21]

Makaromog tayo na ligliwa manlapud ilalo ed kioli, a singa ginawa nen maridios a Job