Balon Areglo Parad Saray Librarya na Kingdom Hall
Saray kongregasyon ed sankamundoan so abayag lan nagugunggonaan ed panguusar da na librarya ed Kingdom Hall da, a datin tatawagen a librarya na Teokratikon Eskuelaan Parad Ministeryo. Nensaman et minoria a nakaukolan ed kada kongregasyon so pakawalaan na dilin librarya ra. Balet, diad dakel a Kingdom Hall natan a masulok a sakey a kongregasyon so manguusar, ya arum ed saratan et sankailin-lenguahe a kongregasyon, mas maabig no wala labat lay sakey a kompleton librarya a nankarga na saray balobalon impormasyon parad kada grupo na lenguahe diad balang Kingdom Hall. Diad saray Kingdom Hall a walaan na masulok a sakey ya auditoryum, kada auditoryum so kaukolan a walaan na sakey a librarya parad balang grupo na lenguahe a manmimiting diman.
Iilaloan a sayan uksoyan so makabawas ed espasyo tan gastos. Niarum ni, no pankasakeyen iray librarya na duara odino onsulok ni a kongregasyon, nayarin mas naparakep iray librarya. No saksakey lay librarya, saray ekstran kopya na saray libro so nayarin iyatol ni tan usaren ed saginonor sano nipaalagey la iray balon Kingdom Hall. No say librarya na Kingdom Hall et walaan na kompyuter tekep na Watchtower Library diad CD-ROM, sayan uusaren so pakagunggonaan a tuloy na arum.
Parad kada librarya na Kingdom Hall, sakey ya agin laki so manserbi bilang librarian, no nayadyari et sakey ed saray manangasikaso ed Teokratikon Eskuelaan Parad Ministeryo. Kaukolan a sikatoy tuloytuloy a mangiyarum ed saray matukoy a publikasyon diad koleksion, a malinew ton markaan iray akindalem ya apis na kada publikasyon pian naamtaan a kabiangan itan ed librarya na Kingdom Hall. Maminsan ed sakey taon et kaukolan ton amtaen no walay nababalang a publikasyon ed librarya tan seguroen ton masimpit iratan. Saray publikasyon ed sarayan librarya so agnepeg ya ipaway diad Kingdom Hall.
Say librarya na Kingdom Hall so lawas papablien a tuloy na saramay kabiangan ed kongregasyon. Komon ta ipatnag tayo a papablien tayon mismo iyan uksoyan diad pangasikaso ed satan tan diad pansukimat ed ‘mismon pikakabat na Dios’ ya uusaren itan.—Uli. 2:5.