No Panon a Gawaen so Sakey a Teokratikon Librarya
SI Sherezade, sakey ya intelehentin melag a Kastilan bii, so manedad na apatira sanen impaamta na maestra to ed klase a koloran daray retrato na “Santa Claus.” Tampol a kinerew nen Sherezade a sikatoy agmibiang. Inpaliwawa ton say konsiensia to so agmangiyabuloy ed sikaton gawaen itan.
Asurpresa ed sayan suppiat, imbaga na maestra ed sikato a panagkolor lambengat itan ed retrato na sakey monyika tan anggapoy uges to. Inmebat si Sherezade: “No sakey lambengat a monyika, mas labay koy mandrowing na monyika a mismo no iyabuloy yo.”
Diad sakey nin inkagawa imbaga ed klase a koloran da so bandera na bansa. Aminsan lamet a kinerew nen Sherezade a manggawa lay sananey. Diad panamegley na panangipaliwawa, imbaga to ed maestra so istorya nipaakar ed si Shedrac, Mesac tan Abednego.—Daniel 3:1-28.
Ag-abayag kayari to et tinawagan na maestra so ina nen Sherezade pian ibalikas so inkakelawan to. “Dakel a pankanawnawa ya imbaga’d siak na anak yo so nipaakar ed konsiensia to,” kuanto. “Isipen mo? Sakey ya ugaw a bii ed ontan ya edad so mangisalaysay ed siak no akin a nakokonsiensia! Nia, agak onabobon ed no anto so ibabangat yo ed sikato, balet ipapasegurok ed sikayo ya ontatalona kayo. Tan labay kon naamtaan yon saludo ak ed anak yo.”
Panon a nagamoran na apat-taon-ya ugaw a bii so nailuam-ed-Biblian konsiensia? Say ina to, si Marina, so mangisasalaysay a si Sherezade so walaan na dilin teokratikon librarya ed uugipan to. Lalaktipen na librarya to iray personal a kopya to na Say Panag-Bantayan, a ginulisan to, say palapagan to parad panagpulong, tan amin a palapagan na Watchtower Society a nipaway nanlapulad inkiyanak to. Say paborito to ed librarya to et say audiotape na My Book of Bible Stories, a nilabi-labi ton tatalinengen legan ya itutumbok to ed niimprintan kopyan libro. Sarayan salaysay ed Biblia so nanggawa ed sikaton makadesisyon a singa la asalambit ed inmuna.
Kasin makatulong ed sika tan ed ananak mo so sakey a mauksoy a tuloy a teokratikon librarya? Akin a kaukolan so sakey a librarya ed ayaman yo?
“Say Sakey a Librarya so Aliwan Panagdarak”
“Say sakey a librarya so aliwan panagdarak, noagta sakey ed saray nakakaukolan ed bilay,” inyabawag nen Henry Ward Beecher. Maseguro, ngalngali amin ed sikayo so walaan na sarayan “kakaukolanen ed bilay,” anggaman agtayo namamantaan. Akin ya ontan? Lapud, anggan Biblia lambengat so wala ed sikatayo, kayarian tayo so sakey a natatawag a librarya.
Say Biblia so talagan sakey ya ekselentin kabiangan na teokratikon librarya. Nen komapat a siglo, inimbento nen Jerome so gramatikon Latin na Bibliotheca Divina (Madibinon Librarya) pian deskribien so kumpleton koleksyon na impuyan iran libron tatawagen tayon Biblia. Intarya ed sikatayo nen Jehova iyan sagradon librarya pian mangiter ed sikatayo na praktikal a tulong, instruksion, tan panangiwanwan. Satan so bengatlan nepeg ya agtayon balot leleglemewen. Say pankayarian lambengat na interon Biblia so mankabaliksan a walaan tayo na lalon malaknab a librarya nen say maslak ya ariripen na Dios ed inmunan panaon.
Sanen saray mablin nisulat-ed-liman manuskrito lambengat so naala nen saman, dagdaiset, no wala man, iray pribadon ayaman a walaan na kumpleton Biblia. Sanen kinaliktan nen Pablo ya aralen iray Kasulatan legan na pinal ya inkipangaw to ed Roma, kinaukolan a kerewen to ed si Timoteo ya awiten ed sikato iray lukot manlapud Asia Minor—anganko saray kabiangan na Hebreon Kasulatan. (2 Timoteo 4:13) Anggaman ontan, saray sinagoga so talagan awalaan na koleksyon na saray lukot, tan namparan si Jesu-Kristo tan si apostol Pablo so anganamot ed sarayan librarya ed panagpulong a kimey da. (Lucas 4:15-17; Gawa 17:1-3) Makapaliket, saray Kasulatan natan so mas mainomay a naala nen say diad inmunan siglo.
Lapud impakaimbento na panangimprinta, natan et ngalngali lan amin ya ariripen na Dios—antokaman so nayarin lenguahe ra—so makagamor na interon Biblia diad makatunongan a bili. Walaan tayo met na nikadkaduman pankanawnawan lalon parakepen iyan sagradon “librarya.” Diad loob na ngalngali sakey a siglo, say “matoor tan makabat ya aripen” so okupado ed pangitatarok na espiritual a tagano ed dugan panaon.—Mateo 24:45-47.
Balet maseguron agtayo sigpot a naanamot iyan makanan impormasyon no agtayo iyuksoy so sakey a personal a teokratikon librarya. Panon a nagawaan itan? Siempre, say ununan kundang et say pangala na saray libro a kakaukolanen na ontan a librarya. Walay gunggunay gunaet, ta satan so manggawa ed sikatayon nawalaan a tampol na naalan pihon impormasyon a kaukolan tayo pian resolbien iray problema tan ebatan iray tepet ed Biblia.
Antoran Libro so Kaukolan Ko?
Kasin naumameng mo la no panon mon naresolbi so problema nipaakar ed pitatalosan diad loob na panamaley mo odino panon mon natulongan iray anak mo a makapangibaga na “andi” ed saray druga? Panon mon natulongan so kaarom a manasagmak na gogigon? Kasin nisalaysay mon malinew no antoy walan ebidensya tayo a wala so Dios tan akin ya aabuloyan to so karelmengan? Anto so irerepresenta na iskarlatan-kolor ya ayep ed Apocalipsis kapitulo 17?
Saraya tan dakel niran tepet so naebatan no walaan ka na magenap a teokratikon librarya. Say Watchtower Society so angipalapag na saray libro, brosyur, tan saray artikulo na magasin a manisingbat ed dakel a Makasulatan a tema. Niarum ni, sayan literatura so manisingbat nipaakar ed saray pamaakaran na pamilya, mamaalagey ed pananisia tayo ed Dios tan say Biblia, mamaaligwas ed saray abilidad tayon manpulong, tan ontutulong ed sikatayo a natalosan iray propesiya ed Biblia.
Maslak ed saray palapagan ya inimprinta na Sosyedad legan na apalabas a 20 a taon so naala ni. No sika so wala la’d katuaan ed agano ni, makagungguna parad sika so pakagamor na amin ya ontan iran literatura a wala’d lenguahem. Nayarin satan so masekder a naapisan iran tomo na The Watchtower ed apalabas a taon a wala’d lenguahem. Say matalonggaring a reperensya, a singa say Insight on the Scriptures tan say Comprehensive Concordance, so nipalapag met ed nanduruman lenguahe. Anggaman ontan, say pakagamor ed sarayan libro so ununan kundang lambengat.
Manggawa na Libraryam
Say pakalmo na sakey a libro a kaukolan so mas importanti nen say pakaamta a walaan ka na satan. No daraken tayo so dakel a panaon ed pananap parad reperensyan palapagan a kaukolan tayo, maseguron nabalang tayo so interes ed pamaakaran. Diad biek a dapag, no maalasir iray libro tayo, diad sakey a kombinientin lugar, mas onkiling tayon personal a mansukimat.
No posibli, makatulong ya ipasen ed sakey a lugar so karaklan na teokratiko iran libro. Nayarin manggawa na saray istanti na libro, tan mabetbet a melag so kantidad to, no agtayo nasarag so manaliw na ayari la, tan agmet baleg so ispasyon kakaukolan na saraya. Importanti met a mainomay a nausar so librarya. Saray libron nisimpen ed saray attic so nadadabokan lambengat.
Say ontumbok a kundang et say panguksoy ed saray libro. Say daiset a panaon ya uusaren ed panangiyayos ed saray libro ed maalasir a paraan so makagungguna.
Panon no aliwan Tasi nen Jehova so kaslakan ed pamilyam? Anggaman agmo niyuksoy so librarya ed panlabayan mo, diad dilin kuartom et nayarin walaan ka na istanti a mankarga na anggan panon et pigaran Makasulatan iran palapagan.
Makatulong ed Pakapaseseg ed Espiritual so Sakey a Teokratikon Librarya
Bektaman a niyuksoy tayoray libro, kaukolan a walaan tayo na sistema pian ontulong ed sikatayon mananap ed impormasyon. Nayarin makapuy laray memorya tayo, tan nayarin agtayo personal a kabisado iray lugan na kada libro ed tekoratikon librarya tayo. Anggaman kuan, amin ya impormasyon ed librarya so walan tampol. No wala ed lenguahe tayo, say Watch Tower Publications Index so makayari ed sikatayon makaromog ed ispisipikon impormasyon ed ngalngali anggan anton tema ed antikey a panaon.
Si Julián, a manlilingkor ed loob la na dakel a taon bilang sakey ya special pioneer tan sakey a matatken, so mangisasalaysay a say Index so importantin tuloy ed pangibangat ed sankayugtanan ya ilalak to pian manaral a personal. “Si Jairo, a manedad na pitora, so sinmempet nanlapud eskuelaan nen imbeneg ya agew tan nantepet ed siak, ‘Daddy, anto ta so ibabaga na Sosyedad nipaakar ed saray dinosaur?’ Inala mi so Index tan inanap so salitan ‘dinosaurs.’ Ngalngali aromog min tampol so serye na Awake! a mangokobri ed satan a tema. Diad saman lanlamang ya agew, si Jairo so ginmapon nambasa ed satan. Amta to la a say teokratikon libraya mi so walaan na mausar ya impormasyon ed ngalngali amin a tema. No parad say siak, kumbinsido ak sano naaralan na ananak mi ya usaren a maong so teokratikon librarya et satan so ontutulong ed sikara pian onaligwas ed espiritual a paraan. Sakey ni, akaaral iran mankatunongan, tan sakey ni, naiimano ra a makapagayaga so personal a panagaral.
Si Fausto, say ama nen Sherezade a sinalambit ed gapo, so manisia a nepeg yon igapon masasakbay so panangipasal ed saray anak a mangusar na sakey a teokratikon librarya. “Ipapanengneng mi ed si Sherezade, a natan et manedad la na anemira, no panon ya usaren so Index,” so salaysay to. “Lapud sikato so nasasagyat ed ilalo na mangaraldalin a Paraiso, ginapoan mi diad impangipanengneng ed sikato na salitan ‘paradise’ diad Index tan insan aanapen iray artikulo na asaglawin Watchtower. Gendagendat ya ipanengneng mi lambengat ed sikato iray retrato. Anggaman kuan, diad sayan metodo et naaralan to a say Index so tombok ed pakaromog na impormasyon ed librarya ed ayaman mi. Amta min atalosan to so punto sanen sinmempet a nanlapud eskuelaan sakey ya agew tekep na sakey a tepet nipaakar ed saray selebrasyon na Easter. ‘Akin ya agtayo nengnengen so Index?’ intepet to ed ina to.”
Antokaman so edad tayo, ipapaseseg na Biblia ed sikatayo a “salsalien yo ya ami ganagana; et mansiansia kayo ed maong.” (1 Tesalonica 5:21) Kakaukolanen na saya ya usisaen tayo no anto so ibabaga na Kasulatan. (Gawa 17:11) No walaan itayo na organisadon-tuloy a teokratikon librarya, say ontan a panagsukimat so makapaliket. Kada matalonan pangusar tayo ed librarya lapud panparaan ed sakey a paliwawa, ed pananap na praktikal a simbawa ed panresolbi ed problema, odino pananap na makapainteres ya impormasyon, nipasepsep ed sikatayo so praktikal a kablian na librarya tayo.
Onia so imbalikas na atateng nen Sherezade: “Diad sakey a Kristianon sankaabungan, say sakey a teokratikon librarya so aliwan panagdarak!”
[Kahon ed pahina 30]
PANON MON AYOSEN IRAY LIBROM?
Anggaporay mapeget a totontonen ed no panon so pangiyuksoy ed saray librom. Anggaman kuan, say onggendan iran makatunongan a dibisyon so mangiyiilustra na sakey a paraan a nayarian mon ayosen iray librom unong ed lugan da.
1. Saray libron mankarga na bersikulo-por-bersikulon pananganalisa ed pigaran kabiangan na Biblia
(Alimbawa: The Greatest Man Who Ever Lived, Revelation—Its Grand Climax At Hand!, “The Nations Shall Know That I Am Jehovah”—How?, “Your Will Be Done on Earth”)
2. Saray libron nisisiglaot ed bilay na pamilya
(Alimbawa: Making Your Family Life Happy, Questions Young People Ask—Answers That Work, My Book of Bible Stories)
3. Saray Biblia tan saray reperensya
(Alimbawa: New World Translation of the Holy Scriptures—With References, arum niran Biblia, Watch Tower Publications Indexes, Comprehensive Concordance, Insight on the Scriptures, The Kingdom Interlinear Translation of the Greek Scriptures, sakey a maabig a diksyunaryo)
4. Saray libro a kaplesan ya uusaren ed Panagaral na Libro ed Kongregasyon tan Eskuelaan na Teokratikon Ministeryo
5. Saray audiocassette tan saray video
6. Inapisan iran tomo na Say Panag-Bantayan tan Awake!
7. Awaran na Tastasi nen Jehova
(Alimbawa: Yearbook of Jehovah’s Witnesses, Jehovah’s Witnesses—Proclaimers of God’s Kingdom)
8. Saray libro tan brosyur a regular tayon uusaren ed ministeryo tayo
(Alimbawa: Makapambilay Kayo na Ando lan Ando ed Paraiso diad Dalin; Reasoning From the Scriptures, Life—How Did It Get Here? By Evolution or by Creation?, Mankind’s Search for God, United in Worship of the Only True God)
[Litrato ed pahina 31]
Si Sherezade so sakey lan maabig ya estudyante na Biblia
[Litrato ed pahina 31]
Anggaman wala ni’d kalangweran, sayan ugaw a laki so manguusar na sakey a teokratikon librarya