Anto so Manunaan ed Sikayo?
1 Dakel a relihyoson organisasyon so mangidadanet ed panggawa na saray kimey a pananulong, singa say panagpaalagey na saray pasilidad parad sekular ya edukasyon odino patambalan. Balet, saray Tasi nen Jehova, anggaman agda lilingwanan so “panaggawa na maabig tan say pannanabang,” et manunaan ed sikara so panulong ed totoo diad espiritual a paraan.—Heb. 13:16.
2 Say Pangaligan nen Inmunan-Siglo: Dakel a maabig a bengatla so ginawa nen Jesus legan na mangaraldalin a ministeryo to, balet say manunan kimey to et say pantasi diad katuaan. (Luc. 4:43; Juan 18:37; Gawa 10:38) Ingganggan to so papatumbok ya ‘onlan manggawa na babangatan ed amin a nasyon, ya ibangat da ira.’ (Mat. 28:19, 20) Tan impabitar to a saramay mangaagamil na pananisia ed sikato so mas malaknab a manggawa ed kimey a ginapoan to. (Juan 14:12) Minoria nen Jesus a say panagpulong so sankaimportantian a kimey to lapud ontulong itan ed totoo a naaralan so dalan na kilalaban.—Juan 17:3.
3 Minoria nen Pablo so kimey a panagpulong bilang “kapilitan,” sakey a kakaukolanen ya agnayarin ibaliwala. (1 Cor. 9:16, 17) Sikatoy mabulos a manggawa na antokaman a panagsakripisyo, mansungdo ed antokaman a subok, odino managmak na antokaman a kairapan a nakaukolan pian nasumpal to so ministeryo to. (Gawa 20:22-24) Ontan met ya awawey so impatnag nen apostol Pedro tan saray kakaiba to. Anggaman sikaray nipangaw tan pinepekpek, “ag-ira tinmunda a nambabangat tan nampupulong a si Jesus et Kristo.”—Gawa 5:40-42.
4 Komusta itayo? Kasin momoriaen tayon mas importante nen say antokaman ni so kimey a panangiyabawag ed maong a balita na Panarian tan panaggaway-babangatan? Singa si Jesus, peteg kasin iyaansakit tayo iramay totoon ‘maneermen tan abuybuyak, a singa saray karnero ya anggapoy pastol da’? (Mat. 9:36) Malinew a papaneknekan na saray kaplesan ya ebento ed mundo tan say propesiya ed Biblia a magano lan manampot iyan marelmeng a sistema! No iyapasakey tayo ed kanonotan tayo so kaimportantian na panagpulong a kimey, napakiwas itayon mantultuloy a manpulong tekep na seseg.
5 Usisaen Yoray Sirkumstansya Yo: Lapud mabetbet a manguuman iray dilin sirkumstansya tayo, panapanaon et maabig a konsideraen no kasin makapanggawa itayo na saray pananguman ta pian sigpot itayon makapibiang diad panagpulong. Sakey ya agin bii so nampayunir legan na dekaday 1950, 1960, tan 1970 balet kinaukolan to so ontunda lapud mabeblay so laman to. Anggaman ontan, asabi panaon et sikatoy inmabig. Agano ni et inusisa to lamet iray sirkumstansya to tan amoria to a nayarian toy manpayunir lamet. Agaylan liket to ed impakaatendi ed Pioneer Service School diad edad a 90! Komusta kayo balet? Magano kayo la kasi a manretiro odino mangraduar? Kasin makapanpayunir kayo sano manguman iray sirkumstansya yo?
6 Sanen naimano nen Jesus si Marta ya “ataltalibaga ed dakel a kapagaan,” mapangasin inkuan nen Jesus a nagamoran to iray babaleg a tumang no pansiansiaen ton simpli iray bengatla. (Luc. 10:40-42) Sarag yo kasin pasimplien so panagbilay yo? Kasin kapkapilitan a mantrabaho ed sekular so sanasawa? No gawaen iray pananguman, kasin makapambilay so pamilya no sakey labat so onanap? Dakel so agunggonaan ed espiritual diad impanggawa ra na saray pananguman pian nagkalalon makapibiang diad ministeryo.
7 Komon ta amin tayo so manumbok ed pangaligan ya inletneg nen Jesus tan saray apostol! Makaseguro itayon bendisyonan nen Jehova iray masimoon a sagpot tayon makapibiang a sigpot diad importantin kimey a panangipulong ed maong balita na Panarian.—Luc. 9:57-62.