Say Ministeryo Bilang Kristiano so Manunan Kimey Tayo
1 Amin tayo so walaan na nanduruman klase na trabaho a nepeg tayon gawaen. Say pangitarya parad sankaabungan na sakey et kakaukolanen na Dios. (1 Tim. 5:8) Balet, satan a kimey a kakaukolanen na Dios so agnepeg a magmaliw a mas importante nen say kimey a panagpulong na Panarian tan panaggaway babangatan.—Mat. 24:14; 28:19, 20.
2 Si Jesus so angitarya na modelo a tumboken tayo diad ‘pananap ya unona ed panarian.’ (Mat. 6:33; 1 Ped. 2:21) Anggaman samet so materyal a kayarian to, sikatoy okupado a tuloy diad panggawa ed linawa na Ama to. (Luc 4:43; 9:58; Juan 4:34) Insekar to so inkasikato diad impantasi ed amin a pankanawnawa. (Luc. 23:43; 1 Tim. 6:13) Pinaseseg to iray babangatan to a nawalaan met na pirmin interes diad panag-ani a kimey.—Mat. 9:37, 38.
3 Pangalig ed si Jesus Natan: Nayarian tayon aligen so ehemplo nen Jesus diad panggunaet a manbilay a simpli ya akasentro ed ministeryo bilang Kristiano. No walaan itayo la na saray pankaukolan ed bilay, talinengen tayo so simbawa na Biblia ya agmanparakel ni na saray kayarian na sayan mundo. (Mat. 6:19, 20; 1 Tim. 6:8) Agaylan abig no palaknaben tayo so pibibiang tayo ed panagpulong a kimey! No walaray mairap a situasyon a naarap tayo, komon ta isekar tayo so inkasikatayo a singa ginawa nen Jesus, ya ag-abuloyan iray kapagaan ed bilay a magmaliw a manunaan a kimey tayo nen say panangiyabawag ed maong a balita na Panarian.—Luc. 8:14; 9:59-62.
4 Anggan saramay walaan na dakel a responsabilidad so mangiyuuna ed panagpulong a kimey. Sakey ya agin laki a walaan na baleg a pamilya, walaan na ambelat a trabaho, tan manlilingkor bilang sakey a matatken diad Kristianon kongregasyon so angikuan: “Ipapasen ko so ministeryo bilang karerak.” Oniay inkuan na sakey ya agin bii a payunir: “Say panagpayunir et mas makanan tuloy nen say matalonan sekular a karera.”
5 Antokaman iray sirkumstansya tayo, komon ta aligen tayo so ehemplo nen Jesus. Panon? Diad panggawa ed ministeryo tayo a manunan kimey tayo bilang Kristiano.