Say Prayuridad Tayo
1. Panon ya impanengneng nen Jesus ya importanti ed sikato so ministeryo?
1 Ginawa nen Jesus a prayuridad so ministeryo to. Sikatoy nansagpot a maong, nanakar na nilasus iran kilometro diad interon Palestina pian napulongan so dakel a totoo anggad posible. Pinansiansia ton simpli so bilay to pian nausar to so mas dakel a panaon tan atension diad ministeryo to. (Mat. 8:20) Sanen sikatoy agpaalisen na saray totoo pian tambalen to iray sakit da, inkuan to: “Kaukolan ko met so onla ed arum niran syudad pian iyabawag so maong a balita na panarian na Dios, ta saya so angibakian ed siak.”—Luc. 4:43.
2. Akin et importantin maong ed kinen Jesus so ministeryo?
2 Akin et importantin maong ed si Jesus so ministeryo? Say manunan gagala to et say kapasantos na ngaran nen Jehova. (Mat. 6:9) Inaro toy mangatatawen ya Ama to kanian pilalek ton sumpalen so linawa To tan tuloken so amin ya ingganggan To ed sikato. (Juan 14:31) Kaaruman ni, talagan iyaansakit to iray totoo tan labay to iran tulongan.—Mat. 9:36, 37.
3. Panon tayon nipanengneng ya iyuuna tayoy ministeryo?
3 Aligey Jesus: Say pangalig ed si Jesus et aliwan mainomay lapud uupoten na sayan mundo so panaon tayo tan mangiyoopresi na dakerakel a pakaabalaan. (Mat. 24:37-39; Luc. 21:34) Kanian, nakaukolan tayon seguroen iray mas importantin bengatla, salanti, pangiyeskedyul na panaon ed pamparaan tan pibiang a regular ed panagpulong a kimey. (Fil. 1:10) Panggunaetan tayon pansiansiaen a simpli so panagbilay tayo tan paliisan tayoy alablabas a pangusar ed mundo.—1 Cor. 7:31.
4. Akin et importanti so pamasiansia na dugan prayuridad natan?
4 No limitadoy panaon, iyuuna na makabat a too so sankaimportantian. Alimbawa, sano akabatan to a walay onsasabin maksil a bagyo, iyapasakey toy panaon tan biskeg to pian iparaan so magmaliw a salimbeng na pamilya to tan pasakbayan to iray kakaabay to. Paulyanan to ni iray kimey ya agtanto importanti. Say akeran panaon antis ya onsabi so bagyo na Armagedon et apatikeyan la. (Sof. 1:14-16; 1 Cor. 7:29) Pian nilaban tayo so inkasikatayo tan saramay ondengel ed sikatayo, nakaukolan tayon imanoen a naynay so inkasikatayo tan say ibabangat tayo, dia man ed loob odino paway na kongregasyon. (1 Tim. 4:16) On, say kilalaban tayo et akadepende ed pangiprayuridad tayo’d ministeryo!