Aligen si Kristo ed Panagministeryo Yo
1 Inletneg nen Jesus so ehemplon nepeg tayon tumboken ed ministeryo tayo. Diad dakel a kipapasen tan paraan et nipanengneng ton baleg so panangaro to ed Dios tan ed totoo. Sikato so nambangat na katuaan ed saray mauyamo tan maaron nanggawa na saray kaabigan ed saramay maniirap tan nalalames.—Mat. 9:35.
2 Ehemplo tan Bangabangat nen Jesus: Agbalot nisuawi so imano nen Jesus diad agto impibiang ed politika odino ed saray polaing ya inorganisa labat na totoo parad pankaabigan na komunidad. Nisay inabuloyan toray agmet mauges iran gegemtan a mangabala ed sikato diad ontan et magmaliw lan segundaryo so manunan kimey to. (Luc. 8:1) Say akasentroan na imano to et say kipulong na maong a balita na Panarian na Dios a mogmon permanentin solusyon ed saray problema na katooan. Baleg so kimey nen Jesus balet ta limitado labat so panaon to pian gawaen itan. Sanen labay na saray totoo ed Capernaum a panbayagen ni si Jesus ed sikara, oniay inkuanto ed saray babangatan to: “Onla itayo ed anggan iner a pasen . . . pian manpulong ak met diman: ta linma ak dia lapu ed sayan getma.”—Mar. 1:38.
3 Kayari ton impapasal iray babangatan to, sikaray imbaki to, ya oniay espisipiko ton imbibilin ed sikara: “Manpulong kayo, a kuan yo, Say panarian na tawen asingger la.” (Mat. 10:7) Imbangat to’d sikara a say kipulong na Panarian so nepeg a prayuridad da. (Mat. 6:33) Insan sakbay na intokotok to ed tawen, indanet ton maong ed sikara so kaukolan dan gawaen. Oniay manamatanir iran salita to: “Onla kayo sirin, tan manggawa kayo na saray babangatan ed amin a nasyones.”—Mat. 28:19.
4 Kaimportantian na say Panarian: Say manunan tema ya intongtong nen Jesus et say Panarian na Dios, tan pinaseseg toray babangatan to a tumboken day alimbawa to. Ag-ontalona iray pansasagpot na totoo pian resolbien iray problema na katooan. (Jer. 10:23) Say Panarian na Dios lambengat so mamasantos ed ngaran na Dios tan mangiter na permanentin inawa ed katooan. (Mat. 6:9, 10) Sano ibabangat tayo iray katuaan nipaakar ed Panarian ed saray totoo a “mansibek tan manakis lapu ed amin a kadimlaan a nagagawa,” natutulongan tayoran nawalaan la na maliket tan matalonan panagbilay tan manmatalek ed segseguradon ilalo diad arapen.—Eze. 9:4.
5 Siansia nin aktibon mibibiang si Jesus ed panangipulong na maong a balita na Panarian na Dios, tan ipapaseguro ton tulongan to itayo. (Mat. 28:20) No nipaakar ed ministeryo tayo, kaunongan lay atumbok tayo ed modelon impanengneng nen Jesus? (1 Ped. 2:21) Diad sarayan makatantandan kaunoran ya agew, gawaen tayo komon so anggaay nayarian tayon tumboken a maong so alimbawan inletneg nen Jesus diad ministeryo!