Mangigalang ed Dios so Masimpit a Panangawes
1. Panon tayon nipanengneng so apresasyon tayo ed manasingger lan distriton kombension?
1 Magano la et pribilehyo tayo so pagmaliw a sankaili nen Jehova diad 2003-2004 ya “Igloria so Dios” a Distriton Kombension. Agaylan misalsalamat itayo ed si Jehova lapud iimbitaan to itayo ed ontan a mayaman ya espiritual a piesta! Nipanengneng tayo so panangigalang tayo ed sikato tan ed apresasyon tayo ed espiritual iran probisyon to diad panangawes tan panag-ayos tayo.—Sal. 116:12, 17.
2. Akin ya importante parad sikatayo so pagmaliw a malinis tan masimpit ed panag-ayos?
2 Malinis tan Mauksoy: Say itsura tayo so nepeg a pakapatnagan na saray estandarte na Dios tayo, a malinis tan mauksoy. (1 Cor. 14:33; 2 Cor. 7:1) Nepeg a malinis so itsura tayo. Kaslakan natan so akulastay a panag-ayos. Anggaman akulastay so itsura na saray sikat ya artista odino atleta, agnepeg ya aligen itan na sakey a Kristiano. No tumboken tayo iray uso, agla nibiig na totoo so pidumaan na saraman so manlilingkor ed tuan Dios tan ed saraman so agmanlilingkor ed sikato.—Mal. 3:18.
3. Panon tayon naseguro a say itsura tayo et mitunosan ed simbawa a naromog diad 1 Timoteo 2:9, 10?
3 Panangawes a Matukoy ed Saray Kristianon Ministro: Sanen sinulat nen apostol Pablo so Kristianon manangasikaso a si Timoteo, pinaseseg to iray “bibii a manpales ira na masimpit, a manparakep ira na mabinta tan madangka; . . . dia ed saray maabig a gawa (a sikato so matukoy ed saray bibii a labay da so mansimpit).” (1 Tim. 2:9, 10) Pian naseguro a matukoy so kawes tayo, kaukolan tayon nonoten a maong itan. Say kawes so nepeg a malinis tan masimpit—aliwan mapasirayew, makapasagyat, odino makapaayat.—1 Ped. 3:3.
4, 5. Antoran pasakbay so nepeg a tumboken na saray Kristianon lalaki tan bibii?
4 Amasakbay met si Pablo sumpad pagmaliw ya alablabas iran “[estilo na] saray buek a nilaga, tan balitok odino perlas odino kawes ya ankabli.” (1 Tim. 2:9) Say pagmaliw a balanse ed panangusar na alahas, panag-ates, tan arum niran parakep so maabig a tumboken na Kristianon bibii.—Uli. 11:2.
5 Say prinsipyo ed simbawa nen Pablo a nipaarap ed saray Kristianon bibii so onaplika met ed saray Kristianon lalaki. Nepeg a paliisan na saray agagin lalaki iray estilo a pakapatnagan na minumundon uso. (1 Juan 2:16) Alimbawa, diad arum a daldalin et uso so malakulakob a kawes, balet sayan estilo so aliwan matukoy parad ministro na Dios.
6. Akin a nepeg tayon pansiansiaen so atagey ya estandarte na panangawes tan panag-ayos tayo sano manbiabiahe a paonla tan pasempet manlapud kombension, legan a walad kombension, tan kayari na saray sesyon kada agew?
6 Sano Manrerelaks Kayari na Programa: Sano onaatendi ed programa, maslak ya agagin lalaki tan bibii so mangipapanengneng na ekselentin ehemplo ed pamaakaran na panangawes tan panag-ayos. Anggaman ontan, ipapanengneng na saray report ya arum so aliwan maalwar sano manbiabiahe a paonla tan pasempet manlapud kombension odino sano manrerelaks kayari na saray sesyon. On, say personal ya itsura tayo—balanglan legan na programa odino diad arum a panaon—so mangapekta ed no panon a moriaen na arum iray totoo na Dios. Lapud ipepeket tayo iray kombension badge card tayo, nepeg a lawas itayon mangawes a matukoy parad saray Kristianon ministro. Saya so mabetbet a mamakiwas ed arum a mangirayew ed sikatayo tan mangilukas na dalan pian makapantasi.—1 Cor. 10:31-33.
7. Anto so epekto na masimpit a kawes tan panag-ayos ed arum?
7 No panon a say makaaron imis so mamarakep ed itsura na lupa tayo, ontan met a mamagalang so masimpit a kawes tan panag-ayos ed mensahe a tarok tayo tan ed organisasyon ya irerepresenta tayo. Arum a makaobserba ed sikatayo legan na “Igloria so Dios” a Distriton Kombension ed sayan taon so nayarin napakiwas ya ontepet no akin a duma itayo tan diad kaunoran et ikuan da: “Sikami mila kami naani ed sikayo, ta sikami nadngelan [tan naobserbaan] mi a say Dios wala ed sikayo.” (Zac. 8:23) Komon ta balang sakey ed sikatayo so mangipanengneng na galang ed si Jehova diad panangawes tan panag-ayos tayo.
[Kahon ed pahina 5]
Ipatnag so Mapagalang ya Itsura
▪ Sano manbiabiahe
▪ Diad kombension
▪ Sano manrerelaks kayari na programa