Tepet
◼ Anton klase na panangawes so matukoy sano ombisita ed saray pasilidad ya uusaren parad panaglingkor ed si Jehova?
Diad interon mundo, saray Kingdom Hall, Assembly Hall, ayaman a Bethel, tan saray pasilidad na sanga et nikaduma iran pasen ya indedika parad panaglingkor ed si Jehova. Saratan et masimpit, malinis, tan mauksoy, kanian saratan so walaan na dignidad. Sankapatnagan iyan pidumaan ed sistema na bengabengatla nen Satanas. Saramay ombibisita ed saray pasen ya uusaren parad panaglingkor ed si Jehova so nepeg a nabidbir met a kayarian nen Jehova tan manggagawa na linawa to.
Bilang Kristianos, ‘imamatalek tayoy inkasikatayo, a singa ministros na Dios’ ed amin ya aspekto, kaiba lay matukoy, mauksoy a panangawes tan panag-ayos tayo. (2 Cor. 6:3, 4) Iilaloan itayo met ya onkiwas na manepeg. Diad amin a panaon et kaukolan a napatnagan a desente tan walaan na dignidad so panagkawes tan panag-ayos tayo a matukoy ed saray lingkor nen Jehova a Dios. Nagkalautla sano ombibisita ed saray pasilidad na headquarter ed New York ontan met ed saray sangan opisina ed interon mundo.
Diad panisingbat ed kaimportantian na dugan panagkawes tan panag-ayos, kinomentoan na Organisadon Manggawa na Linawa nen Jehova so pankaukolan nipaakar ed pisikal a kalinisan, masimpit a panagkawes, tan maabig a panag-ayos sano onlan manpulong tan miaral. Insan diad pahina 138, parapo 3, inkuan to: “Tandaan, say ngaran a Bethel et kabaliksan toy ‘Abung na Dios.’ Kanian, say panangawes, panag-ayos, tan kondukta tayo so nepeg a mipara ed no antoy iilaloan ed sikatayo sano onatendi itayo ed saray pantitipon parad panagdayew diad Kingdom Hall.” Say atagey ya estandarte so nepeg a tumboken na saray manangipalapag na Panarian ya ombibisita ed Bethel a manlapud asingger labat odino saramay manlapud ararawin pasen. Diad ontan et nipatnag na saray bisita so matukoy ya apresasyon tan respeto.—Sal. 29:2.
Say panagkawes tayo so nepeg a pakabidbiran ed sikatayo bilang “mangibabagan mamapagalang ed Dios.” (1 Tim. 2:10, NW) Say matukoy a kawes tan panag-ayos et walaan na maabig ya epekto ed panmoria na arum ed tuan panagdayew ed si Jehova. Balet, naimano a walaray pigaran agagi a say panagkawes da et alablabas a kasual, aliwan desente, odino mapitpitat, sano ombibisita ed saray pasilidad ya uusaren parad panaglingkor ed si Jehova. Say ontan a panagkawes et agmatukoy ed saray Kristiano ed amin a panaon. Diad sayan pamaakaran, a singa ed amin niran pamaakaran na kabibilay tayo bilang Kristiano, pilalek tayon napansiansia so atagey iran estandarte na pakapangibiigan ed saray totoo na Dios manlapud mundo, tan gawaen tayo so amin a bengatla diad kigloriaan na Dios.—Roma 12:2; 1 Cor. 10:31.
Kanian sano bibisitaen yo iray headquarter tan sangan opisina ed New York odino ed arum niran pasilidad ed sangan opisina, balang lan implanon ibisita odino legan a manbabakasyon ed sarayan lugar, tepetan yoy inkasikayo: ‘Kasin say panangawes tan panag-ayos ko et pakapatnagan na inkasimpit, kalinisan, tan dignidad na pasen a pasyaren ko? Kasin mamagalang itan ed Dios a dadayewen ko? Kasin naopendi so arum lapud itsurak?’ Komon ta diad panangawes tan panag-ayos tayo et lawas tayon ‘naparakep ya amin so bangat na Dios a Manangilaban tayo’!—Tito 2:10.