Say Salita na Dios so Katuaan
1. Anton importantin impormasyon so lugan na Biblia?
1 Insulat na salmista: “Say katiponan na salitam sikato so katuaan.” (Sal. 119:160) Diad panamegley na impuyan a Salita to, ipapagamor nen Jehova so makapenek iran ebat ed saray sankaimportantian a tepet ed bilay. Sikatoy mangiyoopresi na ligliwa tan ilalo ed saraman so nagogonigon. Tan ipapanengneng to ed sikatayo no panon itayon onapit ed sikato. “Say pakaaral ed katuaan manlapud Biblia et aliling toy itaynan ed ambilbilunget tan makapasinagem a pasen tan onloob ed maliwawa, masnag, tan alay dakep a kuarto,” so inkuan na sakey a misalsalamat a bii. Kasin panggugunaetan yon inabang so katuaan manlapud Salitay Dios diad amin a pankanawnawa?
2. Panon a papaaligwasen na Biblia so kabibilay na totoo?
2 Manamasimbalon Pakayari tan Makapasagyat ed Sankamundoan: Say katuaan na Biblia so walaan na pakayari a manenyeg ed kapusoan tan mamasimbalo ed kabibilay. (Heb. 4:12) Sakey a kalangweran a bii a manngaran na Rosa so alanor ed panagbalangkantis, ontan met ed panag-abuso ed de-alkohol ya iinumen tan druga. “Sakey ya agew, sanen nagogonigon ak a maong,” so inkuan to, “walay sanasawan Tasi ya angitongtong ed siak nipaakar ed no panon a makatulong ed sikatayo so Biblia pian nasolbar iray problema tayo. Inggapok so manaral na Salitay Dios, a naimanok a makapainteres a maong. Diad loob na sakey bulan et awalaan ak na biskeg pian pasimbaloen so kabibilay ko. Natan ta wala lay gagala na bilay ko, agko la kaukolan so ondepende ed de-alkohol ya iinumen odino druga. Tan lapud labalabay koy magmaliw a kaaro nen Jehova, determinado ak a manbilay unong ed saray estandarte to. No aliwan lapud praktikal a kakabatan na Salitay Dios, seguradon nambikkel ak la natan.”—Sal. 119:92.
3. Akin ya agtayo ikibot so panginabang ed mensahe na Biblia ed arum?
3 Aliwan singa ed maslak a libro natan, sasagyaten na Biblia so totoo ‘ed amin a nasyon, tribu, totoo, tan pansasalita.’ (Apo. 7:9, NW) Linawa na Dios ya “amin a totoo nilaban ira komon, tan ondago ra ed pakapikabat ed katuaan.” (1 Tim. 2:4) Sirin, agtayon balot ipapasen ya agla ondengel so sakey a too ed maong a balita lapu labat ed abenegan to. Imbes, inabang so mensahe na Panarian ed amin, ya usaren so impormasyon a direkta manlapud Biblia no posibli.
4. Panon tayon nausar so Biblia sano manpupulong?
4 Idanet so Kasulatan: Dakel iray pankanawnawa a nausar so Biblia diad ministeryo. Sano iprepresenta iray magasin, panggunaetan ya ibasa so teksto a walad nisuherin presentasyon. Sano usaren so opresin literatura, naimano na arum ya epektibo so pangibasa ed pinilin maong a teksto diad pangigapo ray tongtongan. Sano ompawil, manginabang na sakey odino pigaran teksto ed Biblia kada ondalaw pian tulongan so unabung a tuloytuloy a makagamor na suston pikakabat. Sano mangiyaaral na Biblia, iyapasakey so tongtongan ed manuna iran teksto. Sano anggapo ed pormal a ministeryo, mangawit na ibubulsan Biblia pian usaren sano walaray pankanawnawa a mantasi ya impormal.—2 Tim. 2:15.
5. Akin a panggunaetan tayon usaren so Biblia diad ministeryo tayo?
5 Komon ta tulongan tayoy arum ya onggamor na gunggona manlapud manamakiwas a pakayari na katuaan na Salitay Dios diad pangusar ed Biblia ed amin a matukoy a pankanawnawa diad ministeryo tayo.—1 Tes. 2:13.