Pansiansiaen Tayon Walad Maabig a Kondisyon so Pasen a Panagdayewan Tayo
1. Anto so gagala na say Kingdom Hall?
1 Wala so masulok a 94,000 a kongregasyon na saray Tasi nen Jehova ed sankamundoan. Maslak a kongregasyon so mantitipon parad panagaral na Biblia tan Makristianon panlilimog diad Kingdom Hall, a ditan so lokal a sentro na puron panagdayew.
2. Akin ya importantin pansiansiaen a malinis tan presentable so Kingdom Hall?
2 Regular ya Eskedyul ed Panaglinis: Say kimey a panagmintena ed Kingdom Hall so makanan kabiangan na sagradon serbisyo tayo. Oniay ibabaga na libron Our Ministry, pahina 61-2: “Nepeg ya ipasen na saray agagi a pribilehyo so aliwa labat a panuporta ed Kingdom Hall ed pinansyal noag pati say pangiboluntaryo met ed serbisyo ra pian napansiansia itan a malinis, presentable tan walad maabig a kondisyon. Diad loob tan paway, say Kingdom Hall so nepeg a matukoy a mangirepresenta ed organisasyon nen Jehova.” Lapud say Kingdom Hall so maminpigan uusaren ed kada simba, kaukolan a linisan tan apigeren itan a regular. Saray boluntaryo ed (saray) kongregasyon a manguusar ed Kingdom Hall so kaslakan a mangaasikaso ed sarayan kimey. Singa met ed panaon na Biblia, saray lingkor nen Jehova natan so kaukolan a mankuli a ‘mangipawil tan mangapiger’ ed pasen a panagdayewan tayo.—2 Awa. 34:10.
3. Panon so pangorganisa na panaglinis ed Kingdom Hall, tan sioparay makapibiang ed sayan pribilehyo?
3 Kaukolan ya ipeket ed information board so sinimban eskedyul ed panaglinis ed Kingdom Hall. Amin a grupo na panagaral ed libro so nepeg a mansusublayan a manlinis ed hall kada simba, a tutumboken da so listaan na saray bengatlan nepeg a gawaen. Amin a makayari so kaukolan a mibiang ed sinimban pribilehyo a panlinis tan pamasiansian presentable ed Kingdom Hall. Makapibiang met iray ugugaw, diad panangiwanwan na atateng da, pian nibangat iran mangapresya ed sayan pribilehyo. Nagkalalo la sano pigaran kongregasyon so manguusar ed sakey a Kingdom Hall, importante so maabig a pantutulongan ta pian aliwan pigpigara labat so mangaasikaso ed sayan importantin aspekto na panagdayew tayo.
4. Anto so nepeg a gawaen pian amta na kongregasyon so gawaen da sano manlinis ira ed Kingdom Hall?
4 Say listaan na saray bengatlan nepeg a gawaen so nipaskil, nayarin diad sinopan na saray uusaren ed panaglinis. Sayan listaan so nepeg a mangipaliwawa ed saray kimey a gawaen a sinimba, a kabiangan so panlinis ed saray bintana, pampunas ed saray despatso, pangibantak ed saray basura, pan-mop ed saray semento (datal), tan panlinis ed saray salming. Arum a kimey so nayarin gawaen ya aliwan maparanay, singa say pamasileng ed saray muebles tan panlinis a maong ed saray yurongan, kurtina, tan saray bombilya. Amin a kemikal ya uusaren ed panaglinis so nepeg ya iyan ed agnagawat na ugugaw tan nepeg a sulatan na malinew a panandaan. Nepeg ya isulat met so antikey ya eksplinasyon ed no panon ya usaren so kada kemikal.
5. Panon kaimportante so seguridad, tan antoran bengatla so kaukolan ya imanoen a panapanaon? (Nengnengen so kahon ed pahina 4.)
5 Importantin tuloy ya anggapo so pakarisgoan diad Kingdom Hall. (Deut. 22:8) Nipaakar ed saya, nilista diad kahon ed pahina 4 iray bengatla a kaukolan ya imanoen a panapanaon pian napaliisan iray aksidente.
6. Panon so panangorganisa na panangapiger ed Kingdom Hall?
6 Panangapiger ed Kingdom Hall: Responsabilidad na ulop na mamatatken so pangasikaso ed panangapiger na Kingdom Hall. Kaslakan a naturo so sakey a matatken odino ministeryal a lingkor a mangiyuksoy ed kimey. Sikatoy mangorganisa ed inagew-agew a panagkimey diad Kingdom Hall, a seguroen ton malinis tan walad maabig a kondisyon itan tan walaray magenap ya uusaren. Importante ya anggapo ray pakarisgoan diad loob na hall odino diad kaliberliber. Sano pigaran kongregasyon so manguusar ed saksakey a hall, saray ulop na mamatatken so manuro na operating committee a mangorganisa na saray uksoyan ed panangasikaso na bilding tan kagawaan. Sayan komite so mankimey diad panangidirehi na saray ulop na mamatatken.
7. (a) Anto so gawaen a tinaon pian naseguron lawas walad maabig a kondisyon so Kingdom Hall? (b) Antoray bengatla a nakaukolan ya imanoen a panapanaon? (Nengnengen so kahon ed pahina 5.)
7 Gawaen so detalyadon panag-inspeksyon ed Kingdom Hall a tinaon. Saray mamatatken so responsable ed panggawa na saray uksoyan pian naasikason maong iray antokaman a kaukolan ya imanoen. Nayarin imbitaan iray manangipalapag ya ontulong ed panangapiger. Amin so nepeg ya alerton mangapiger anggano diad saray angkelag a detalye tan nepeg ya aliston mangasikaso ed saray pamaakaran a kaukolan ya imanoen.
8. Kapigan so nayarin pitalosan na saray mamatatken diad Kingdom Hall Construction Desk nipaakar panangapiger?
8 No saray mamatatken so mankaukolan na suhestion odino tulong ed pangasikaso ed panagmintena ed Kingdom Hall, nayarian day mitalosan ed Kingdom Hall Construction Desk diad sangan opisina. Nayarin kabiangan ed saya iray pamaakaran a singa say pangapiger ed mismon bilding tan panremedyo ed saray mantedter diad bilding.
9. Anton proseso so nepeg a tumboken sano nakaukolan so mangupa na kontraktor?
9 Usaren a Makabat Iray Pundo na Kongregasyon: Maslak ed saray gagawaen ed Kingdom Hall tan kaliberliber na satan so kikimeyan na saray boluntaryo. Say dilin-sakripisyon panagsagpot da so maabig a panangipatnag na aro tan baleg a pakabawasan ed gastos. Sano kapilitan so mangupa na kontraktor a manggawa ed pigaran kimey, singa say pan-ispre ed tabuney tan bokbok odino malaknab a panangapiger, saray mamatatken so mankambas na sankaabebaan a managkontrata. Gawaen da iya diad pangiparaan ya unona ed nisulat a detalyadon deskripsion na kimey a gawaen tan dinanman a materyales ya usaren. Ikdan na sansakey a kopya na sayan listaan so pigaran managkontrata pian amin da so makapankalkula ed gastos base ed saray kakaukolanen. Sano naawat la iray kalkulasyon na gastos manlapud pigaran prospektibon managkontrata, nayarian la ed satan na mamatatken so manpili na sankaabigan ya opresi. Sayan proseso so kaukolan a tumboken anggano say sakey ya agi so namboluntaryo lan mankimey odino mankontrata ed nakaukolan a materyales diad nigetar a presyo.
10. Anto so gawaen pian naseguro a saray pundo na kongregasyon so nausar ed manepeg a paraan?
10 Sano pigaran kongregasyon so manguusar ed Kingdom Hall, say operating commitee so mamemben na biig a bank account tan binulan a mangiter na report na kuenta ed kada ulop na mamatatken, pian amta na saray mamatatken so pangigagastosan ed saray pundo. Saray mamatatken so responsable ed dugan panaggastos ed saray pundo na kongregasyon.
11. Anto so nepeg a gawaen no nakaukolan so malaknab a panmintena odino pangapiger?
11 Malaknab a Panagmintena tan Panangapiger: Sano naimano na operating commitee a wala so baleg ya aapigeren odino mimintenaen diad Kingdom Hall, itupleg na committe so pamaakaran ed saray ulop na mamatatken parad panangidirehi. Sano denisisyonan a nakaukolan so malaknab a panmintena odino pangapiger odino nakaukolan so tulong manlapud paway na (saray) kongregasyon a manguusar ed satan a Kingdom Hall, saray mamatatken so mitalosan ed Kingdom Hall Construction Desk. Sayan departamento so mangiter na makatulong iran suhestion no panon a nagawaan so kimey. Sano wala so baleg a panggastosan, nakaukolan a wala so suston kalkulasyon ed gastos tan manggawa na resolusyon ya aprobaan na kongregasyon.—Nengnengen so “Tepet” diad Pebrero 1994 a Ministeryo Tayo ed Panarian.
12. Panon tayon nipanengneng ya aapresyaen tayo so pribilehyon onatendi ed saray miting diad Kingdom Hall?
12 Agaylan papablien tayo so pribilehyon makapantitipon diad Kingdom Hall! Agtayo labay a paulyanan iray pantitipon tayo odino ibaliwala iratan. Amin so makatulong ed iyaligwas na sayan probisyon parad pakapasesegan tayo diad sigpot a pibiang ed panangasikaso ed Kingdom Hall tayo. Saya so mangiyalangon ed tuan panagdayew tan kigalangan na ngaran nen Jehova. Determinado itayo komon a mamasiansia a walad maabig a kondisyon so pasen a panagdayewan tayo.
[Kahon ed pahina 4]
Listaan Parad Seguridad
◻ Saray fire extinguisher so nepeg a walad pasen a kakaala tan tinaon ya inspeksionen.
◻ Nepeg a saray papawayan tan takayan so walaan na malinew a karatula, maliwawa, tan mainomay a pawayan, tan seguroen a malet so egnaan a barandilyas.
◻ Saray bodega tan kasilyas so nepeg a malinis, mauksoy, tan anggaporay bengatlan mipopool, personal a kagkagawaan, tan basura.
◻ Say atep tan alula so nepeg ya inspeksionen tan linisan a regular.
◻ Saray dadalanan tan paradaan so nepeg a maliwawa tan anggaporay makakarunyas odino makapater.
◻ Saray sistema na elektrisidad tan bentilasyon so nepeg ya imanoen tan manepeg a mintenaen.
◻ Nepeg ya apigeren a tampol so antokaman a mantedter pian napaliisan so pannelnab.
◻ Kaukolan ya italak so bilding sano anggapoy too ditan.
[Kahon ed pahina 5]
Panangasikaso ed Bilding tan Kagawaan
◻ Paway: Kasin naasikason maong iray atep, akinpaway a dingding, pinta, saray bintana, tan karatula na Kingdom Hall?
◻ Saray kaliberliber: Kasin namimintenan maong iray kaliberliber? Kasin malinis iray dadalanan, malet iray alar, tan mauksoy so paradaan?
◻ Loob: Kasin presentable iray semento (datal), kurtina, yurongan, saray ikakabit a kagawaan, apis na dingding, tan saray kabinet a parad literatura?
◻ Kagawaan: Kasin onggagana iray silew, sound system, bentilador, tan air-con?
◻ Saray kasilyas: Kasin malinis tan namimintenan maong iratan?
◻ Saray dokumento na kongregasyon: Kasin ontukoy ed panaon tan susto iray dokumento na korporasyon odino saray titulo na dalin? Kasin niyaplay itan parad property-tax-exemption?