Kasin Igagalang Yo so Panagdayewan Yo?
“Manlapud inggapon mismo na ebanghelyo, saray Kristiano so lawas walaan na maligen tan pihon pasen na madibinon panagdayew.”—“Primitive Christianity,” nen William Cave.
LAWAS a panggagayagaan na totoo na Dios so pandaragup a mankakasakey parad panagdayew. Saya so tua nen inmunan siglo tan ontan met natan. Saray inmunan autor tan teologo, a singa di Lucian, Clemente, Justin Martyr, tan Tertullian, so amin et mipakna a saray Kristiano so walaan na saray espisipikon pandaragupan da pian maparanay a mandayew a nankakasakey.
Ileletneg na Biblia so parehon punto, a manutukoy ed dakel a maparanay ya impantitipon na saray grupo na Kristianos. Sarayan grupo so akabatan bilang saray kongregasyon. Saya so matukoy lapud say salitan “kongregasyon” diad orihinal iran lenguahe na Biblia so manutukoy ed grupo na totoon nantitipon parad partikular a gagala odino kimey.
Saray Inmunan Kristianon Panagdayewan
Anto so ginawa na saray inmunan-siglon Kristianos sanen sikaray nandaragup? Dedeskribien na Biblia so pigara ed saratan a pantitipon tan ipapanengneng ton say panagbangat so sakey ya importantin kabiangan. (Gawa 2:42; 11:26; 1 Corinto 14:19, 26) Saray makaibangat a programa so inyuksoy, tekep na saray paliwawa, panangisalaysay na makapaseseg iran eksperiensia, tan say maalwar a panangunsidera ed saray sulat a naawat manlapud mananguley ya ulop diad Jerusalem odino ed sakey ya apostol.
Nabasa tayo ed Gawa 15:22-35 a kayari impamasa na ontan a sulat ed grupo na saray Kristiano ed Antioquia, si Judas tan Silas et “niligliwada’ra so agagi ed dakel a salita, tan pinaletan da ra.” Ibaga na sananey a salaysay a sanen akasabi si Pablo tan Bernabe ed Antioquia “tan atipon da so iglesia, inolit da so saray amin a bengatlan ginawa na Dios ed sikara.” Say panagpikasi ed si Jehova so importanti met a kabiangan na saray Kristianon pantitipon.—Gawa 14:27.
Saray pasen a nantitiponan na saray inmunan-siglon kongregasyon parad panagdayew so aliwan maarten paalagey a singa ed dakel iran simbaan na Kakristianoan natan. Diad kaslakan, saray inmunan Kristiano so nantitipon ed pribadon kaabungan. (Roma 16:5; 1 Corinto 16:19; Colosas 4:15; Filemon 2) Mabetbet a say silir ed bubong odino say tagey a silir na pribadon abung so nausar. Diad tagey a silir so akagawaan na Pangdem na Katawan. Dia met ed tagey a silir a saray 120 babangatan so alanaan ed masanton espiritu nen Pentecostes.—Lucas 22:11, 12, 19, 20; Gawa 1:13, 14; 2:1-4; 20:7, 9.
Natan say padron ya inletneg na apostoles so tutumboken na saray Tasi nen Jehova. Uusaren daray pantitiponan a kabkabat bilang Kingdom Hall. Ditan et sikaray nipapasal bilang managpulong na maong a balita na Panarian na Dios. (Mateo 24:14) Diad Kingdom Hall, aaralen da met iray Kasulatan, manpipikasi, tan manpapasesegan. Saya so mitunosan ed simbawa na Biblia diad Hebreos 10:24, 25: “Manpapagalangan itayo ed sakey tan sakey pian manaayatan itayo ed aro tan dia ed saray maabig a gawa; ya ag tayo paulian so saray panmomoyong tayo, singa ugali na saray arum, noag ingen mansisimbawaan itayo; tan nagkalalo la, lapud nanengneng yo a manasinger so agew.”
Suston Panangusar ed Panagdayewan Tayo
Kasin nanonotan yoray salita nen apostol Pablo: “Say Dios aliwa’n Dios na kolkol, no ag kareenan” tan, “Nagawa komon so sarayan amin ed kasimpitan tan maoksoy”? No usisaen yo so konteksto na sarayan balikas, naromog yon sisingbaten nen Pablo so paraan a nepeg a pakapangikurang ed saray Kristianon pantitipon. A singa diad panaon na apostoles, seseguroen na saray Kristiano natan a saray pantitipon da so mauksoy tan organisadon tuloy.—1 Corinto 14:26-40.
Ikuan na Mayo 1, 1970 a paway na Say Panag-Bantayan: “Say espiritual a kipapasen ed Kingdom Hall so puro, onsusubol manlapud sakey a peteg ya interes ed tuan panagdayew tan Biblikal ya instruksyon. Tan say anlemew, natural a kaliberliber ed hall so mangilagyat ed saray presente a maliket tan makaaro, aliwa ran bebelatan na sakey a misteryoson impaakseb a inkaseryoso.” Siempre, aagamilen met so panangasikaso pian say panangusar ed Kingdom Hall so lawas mangidalangirang na galang tan dignidad.
Say Kakristianoan so mangipapatnag na baleg ya agpanamagalang nipaakar ed saya. Uusaren na arum a relihyoson organisasyon so panagdayewan da bilang sentro na panligliwaan ed komunidad. Walaan ira na saray live concert na relihyoson rock music, saray kuarto parad weight lifting, panagbilyaran, galawan na ugugaw, tan sinean. Sakey a simbaan so walaan na babantayan a balsakan (wrestling match) bilang kabiangan na programa ra. Saya so agbalot mitunosan ed padron ya inletneg na apostoles.
No walay inmunan-siglon kongregasyon a kinmiwas ya agmatukoy, nakaukolan so panangorihe. Alimbawa, uusaren na arum ed Kristianon kongregasyon diad Corinto so panagselebra ed Pangdem na Katawan a bilang okasyon parad panangan tan iyinum. Awiten daray pandeman da pian mangan sakbay odino legan na miting, arum ni ingen so alablabas ya angan tan inminum. Peteg a saya so agmatukoy. Kanian sinulatan ira nen apostol Pablo: “Anto? angapo tay kaabungan yo a panganan yo tan inuman yo?”—1 Corinto 11:20-29.
Mitunosan ed simbawa nen Pablo, panggugunaetan na saray Tasi nen Jehova ya asikasoen iray personal a bengatla diad abung odino ed inerman imbes a diad Kingdom Hall. Tua, say maparanay iran pantitipon tayo so mangitatarya na kumbinienten pankanawnawa pian minengnengan ed dakel a kaaro. Anggaman kuan, say Kingdom Hall so nitalaga ed si Jehova, kanian nepeg ya usaren itan a nikabkabiig parad panagdayew ed sikato. Agtayo aanamoten so iyatendi ditan pian gemtanen so sekular a bengatla odino pian asikasoen so personal iran transaksyon.
Niarum ni, saray Kingdom Hall so ag-uusaren na kongregasyon parad saray programa ed galaw, panamawala na pundon aktibidades, odino sosyal iran serbisyo, a singa say panangasikaso ed ugaw. Walaray arum a pasen a nayarian na sakey ya asikasoen so ontan iran personal tan parad pamaakaran na negosyo.
Naimano na mamatatken ed sakey a Kingdom Hall a saray membro na kongregasyon so manbabayesan odino manpapawilan na binayes iran bengatla legan na saray miting. Ontan met, niyuugali ra so pansasalatan na saray videocassette movie diad Kingdom Hall. Anggaman saya so aliwan nipaakar ed negosyo, nepeg a tulongan ira na mamatatken a makanengneng a no nayadyari et makabat so pangasikaso ed sarayan pamaakaran diad abung.
Pian napaliisan iray kipapasen a nayarin makapangiter na lingon impresyon tan pian naseguro a say Kingdom Hall et suston nanausar, nepeg a tepetan na sakey so inkasikato: ‘Wala nira kasi personal a bengatlan aatupagen ko ed Kingdom Hall a nayarin asikasoen ed abung?’ Alimbawa, sano mangoorganisa na saray panagpasyar odino arum a sosyal a pantitipon, agta magmaong a singbaten iratan ya oksuyan diad abung? Nayarian tayo tan usaren so telepono odino ombisita ed kaabungan na saramay kaliktan tayon nakatongtong? Diad pangibalikas ed saray salita nen Pablo, nibaga tayo: ‘Peteg walaan kami na kaabungan a pangasikasoan ed saratan a bengatla, agta ontan?’
Sakey ya Aturon Panaon tan Pasen a Pandayewan ed si Jehova
Ibabaga na Biblia diad Eclesiastes 3:1: “Nipaakar ed amin a bengatla wala so sakey a panaon, tan sakey a panaon nipaakar ed balang pegdat ed leksab na tawen.” Sano onaatendi ed saray miting diad Kingdom Hall et nayarian tayon ipaslep a sigpot so inkasikatayo diad aktibidades a nisiglaot ed Kristianon ministeryo. Satan so aturon panaon a pandayew ed si Jehova.
Insimbawa nen Santiago ya agi nen Jesus ed ina so sumpad panangipanengneng na paboritismo ed loob na Kristianon kongregasyon. (Santiago 2:1-9) Panon tayon iyaplika iyan simbawa diad saray Kingdom Hall tayo? Say paboritismo so nayarin naimano sano parungtalan ya ipapasa ditan iray imbitasyon parad sosyal iran ebento. Diad sakey a kongregasyon, niyugali so pangipasen na saratan ya imbitasyon ed saray bag odino Biblia na saramay inmatendi. Tua, saya so mas kumbiniente nen say pangipawit na saray imbitasyon odino pangitulor ed balang abung. Anggaman kuan, panon kasi so liknaan na saramay ag-akaawat na imbitasyon diad pakaimano a saray imbitasyon so nipapasa ed arum a sinansakey? Kasin mangipanengneng iya na paboritismo?
Siempre, agla nakaukolan so mapeget a ganggan a mangibabagan agnayarian na sakey ya iter ed sananey so personal a mensahe odino balkot legan a walad Kingdom Hall; nisay makapuy a pantongtongan ed Kingdom Hall so nipaakar ed inagew-agew iran aktibidades odino ebento, pangimbita ed sakey diad abung, odino pangimbita ed sakey a mibiang ed arum a panligliwaan. Balet nepeg a saraya so ibana tan gawaen ed sikakabat tan aliwan parungtalan. Saray personal ya oksuyan so nepeg ya agbalot manigensigen ed peteg a gagala na impantitipon tayo ed Kingdom Hall, salanti, pian napabiskeg ed espiritual.—Mateo 6:33; Filipos 1:10.
Lalakin Mangileletneg na Ehemplo
Saray mamatatken tan ministeryal ya ariripen so maseseg a mangileletneg na ehemplo diad panangipanengneng na panamagalang ed Kingdom Hall. Gendagendat a wala so apabtangan a sakey odino duaran matatken tan ministeryal iran aripen a manguksoy ed saray bengatla nipaakar ed uksoy na Kingdom Hall. No masulok a sakey so manguusar ed parehon hall, sakey a komite na mamatatken so mangasikaso ed sarayan pamaakaran.
Anggaman walaray espisipikon apabtangan a mangasikaso ed saratan a kimey, amin a ministeryal ya aripen tan matatken so nepeg a mangipanengneng na puron interes ed hall. Bidbiren da a say Kingdom Hall so nitalaga ed si Jehova tan uusaren parad panagdayew ed sikato.
Agnepeg ya ipaleen na mamatatken sano walaray kaukolan ya apigeren. (2 Awaran 24:5, 13; 29:3; 34:8; Nehemias 10:39; 13:11) Diad arum a kongregasyon et maparanay ya uusisaen so Kingdom Hall pian naasikason tampol so antokaman a nakaukolan ya apigeren. Saray imbentaryo so insinop pian naseguron saray nakakaukolan a suplay so wala tan kadadampot. No wala so nidesignan pangisimpenan na saray suplay, kagawaan, tan panaglinis a kagawaan, amin a matatken tan ministeryal ya aripen so nepeg a mangipanengneng na interes ed kipapasen to, a seguroen a lawas malinis itan. Saramay mangaasikaso ed literatura tan magasin counter so makapangipanengneng na interes diad tampol a pangilira ed saray basyon kahon ta pian ag-akayat ed hall.
Diad pangiletneg na ehemplo, natulongan na mamatatken tan ministeryal ya ariripen so amin ed kongregasyon pian mangipatnag na seseg ed Kingdom Hall. (Hebreos 13:7) Amin so makapangipanengneng na suston panamagalang diad pibiang ed panaglinis na hall tan diad pangipanengneng na puron interes ed interon kipapasen to.
Inkuan nen Jesus diad Mateo 18:20: “Ta no ined so kawalaan na duara ono talora a nantitipon nisengeg ed ngaran ko, siak wala ak ed nanleleetan da.” On, si Jesus so interesado ed no anto so gagawaen tayo sano mankakasakey itayon mantitipon a mandayew ed si Jehova. Isasakup na saya so antokaman iran miting a gagawaen ed pribadon kaabungan tan ankabaleg a pantitipon a singa saray kumbension odino asamblea.
Parad nilaksalaksan Tastasi nen Jehova, anggapolay pasen ya asisingger ed puso ra nen say maparanay a pasen na panagdayewan da, say Kingdom Hall. Ipapanengneng da so suston panamagalang ed satan a pasen. Ipapatnag da so makulin espiritu diad pangaasikaso ed satan, tan lawas panggugunaetan da so suston pangusar ed satan. Komon ta tumboken yo met so simbawa ya iiter a mismo nen Jehova: “Dangkaan mo so salim sano onla ka ed abung na Dios.”—Eclesiastes 5:1.