Sikayoran Kalangweran—Mangiletneg Kayo na Maabig a Pundasyon Parad Arapen
1. Akin a nepeg a nawalaan na mabiskeg a pananisia iray Kristianon kalangweran?
1 Anto so manunaan a nononoten yo? Antoray paniisipan yo? Kasin niyapasakey iray kanonotan yo ed saray bengatla ed kaplesan, odino kasin niyapasakey iratan dia ed arapen tan ed saray insipan na Dios? (Mat. 6:24, 31-33; Luc. 8:14) Nakaukolan so mabiskeg a pananisia pian onkiwas unong ed saray sipan na Dios, a singa naimano ed saray ehemplo di Abraham tan Moises. (Heb. 11:8-10, 24-26) Panon yon nabayuboan so ontan a pananisia tan niletneg so “maabig a pundasyon parad arapen”?—1 Tim. 6:19, NW.
2. Anto so naaralan tayo ed alimbawa nen Arin Josias?
2 Anapen si Jehova: No walaan kayo na rotina parad espiritual ya aktibidad a kaibay pamilya yo, satan so nakomendaan. Balet ag-ipapasen a satan a rotina so automatikon mamawala na mabiskeg a pananisia. Pian naromog so ‘mismon pikakabat na Dios,’ nepeg a personal yon anapen si Jehova. (Uli. 2:3-5; 1 Awa. 28:9) Ontan so ginawa na malangwer nin Arin Josias. Anggaman binmaleg ed kaliberliber ya aliwan maabig parad espiritual ya iyaaligwas, ‘ginapoan ton inanap so Dios nen David a laki to’ sanen mantaon na 15.—2 Awa. 34:3.
3. Panon a si Jehova so naanap na saray Kristianon kalangweran natan?
3 Panon yon naanap si Jehova? Diad maalwar a panusisa ed papanisiaan yo tan ‘paneknekan yo ed inkasikayo’ a talagan satan so katuaan. (Roma 12:2, NW) Alimbawa, kasin nipaliwawa yo no anto so ibabaga na Biblia nipaakar ed dala odino napaneknekan yo a ginmapo la so uley na Panarian na Dios diad katawenan nen 1914? Importante so igamor na ‘suston pikakabat ed katuaan’ pian makapangiletneg na maabig a pundasyon parad arapen.—1 Tim. 2:3, 4.
4. Panon a nipatnag na saray agbautismadon manangipalapag so iyaaligwas da?
4 Maabig iray resulta na impananap nen Josias ed Dios. Sakbay a sikatoy mantaon na 20, sikatoy makpel a kinmiwas pian ekalen diad dalin so palson panagdayew. (2 Awa. 34:3-7) Mipadpara, napatnagan so iyaaligwas yo ed espiritual diad saray kiwas yo. (1 Tim. 4:15) No sikayoy agbautismadon manangipalapag, panggunaetan yon paaligwasen so kalidad na ministeryo yo. Aglabat la mankokontento ed basta pangiyopresi na literatura. Gawaen yon kalat so pangusar na Biblia, pikatunongan ed totoo, tan pamawil ed interesadon aromog yo. (Roma 12:7) Saya so ontulong ed sikayon onaligwas ed espiritual.
5. Antoran pankanawnawa so lukas parad saray bautismadon Kristiano pian napalaknab day ministeryo ra?
5 Iter ed si Jehova so Sankaabigan Yo: Sano isimbolo yoy dedikasyon yo ed si Jehova diad pampabautismo, magmaliw kayon ordinadon ministro na Dios. (2 Cor. 3:5, 6) Saya so mangilukas na saray pankanawnawa pian sikayoy makapanlingkor ed si Jehova ed sigpot-panaon. Kabiangan ed saraya so panagpayunir ontan met ed panlingkor diad Bethel, panmisionaryo, tan panlingkor ed nanduruman bansa. Saray arum nin paraan pian napalaknab yoy ministeryo yo et diad panaral na sananey a lenguahe odino diad iyalis pian manlingkor ed arum a lugar a babaleg so pankaukolan.
6. Panon a sikatayon amin so makapangiletneg na maabig a pundasyon parad arapen?
6 Siempre, aliwan amin so makapibiang parad sarayan pribilehyo ed panaglingkor, balet sarag ya iter na balang sakey ed sikatayo so sankaabigan to ed si Jehova. (Mat. 22:37) Antokaman iray kipapasen yo, gawaen a manunaan ed bilay yo so panaglingkor ed si Jehova. (Sal. 16:5) Diad panggawa ed satan, sikayo so makapangiletneg na maabig a pundasyon parad arapen.