Makapaseseg so Komendasyon
1 “Aliwa ak ta’n maong ya ugaw natan?” so insibsibek na melag ya ugaw a bii sanen oras lay iyugip. Satan a tepet so akabiglaan nen ina to. Anggaman naimano to so gunaet na melag ya anak ton bii a nankalakal ed satan ya agew, imbaliwala to so mangibalikas na anggan sakey a balikas na apresasyon. Say pansibsibek na satan a melag ya ugaw a bii so onkanan panonot, ya amin tayo—ugaw man odino matatken la—et mankaukolan na komendasyon. Kasin papasesegen tayo iray arum diad pangibalikas tayo na apresasyon parad maabig a gagawaen da?—Uli. 25:11.
2 Papagamoran itayo na saray kapara tayon Kristiano na dakel a rason pian komendaan ira. Saray mamatatken, ministeryal a lingkor, tan saray payunir so mamapasyan manumpal ed saray responsabilidad da. (1 Tim. 4:10; 5:17) Gagawaen na saray ontatakot ed Dios ya atateng so anggaan na nayarian da a pabalegen so ananak da ed saray dalan nen Jehova. (Efe. 6:4) Panggugunaetan na saray Kristianon kalangweran a resistian so “espiritu na mundo.” (1 Cor. 2:12; Efe. 2:1-3) Arum so sitotoor a manlilingkor ed si Jehova anggaman ed inkatatken la, saray problema ed bunigas, odino arum niran subok. (2 Cor. 12:7) Amin da so makanepegan na komendasyon. Kasin papablien tayo so makapadinayew iran sagpot da?
3 Personal tan Espesipiko: Peteg ya aapresyaen tayon amin so pakadngel na komendasyon bilang interon kongregasyon. Balet, say komendasyon so nagkalalo lan makapaseseg sano personal tayon naawat itan. Alimbawa, diad kapitulo 16 na sulat to ed saray taga Roma, espesipikon imbalikas nen Pablo so apresasyon to ed si Febe, Prisca tan Aquila, si Trifena tan Trifosa, tan si Persis, bilang pigara labat. (Roma 16:1-4, 12) Agaylan makapaseseg iray salita to ed saraman a matoor! Say ontan a dayew so mamaseguro ed agagi tayo a nakaukolan tayo ira tan mamaapit ed sikatayo ed sakey tan sakey. Kasin angibalikas kayo na espesipikon komendasyon ed agano ni?—Efe. 4:29.
4 Manlapud Puso: Pian magmaliw a peteg a makapaseseg, nepeg a masimoon so komendasyon. Nibiig na totoo no kasin impapuso so ibabaga tayo odino ‘pangoltit [o panaglarog labat] ed dila tayo.’ (Uli. 28:23) Legan a nipapasal tayoy inkasikatayo a mangimano ed maabig iran kalidad na arum, napakiwas so puso tayon mangomenda. Komon ta mabunlok itayon mangibalikas na puron komendasyon, lapud amta tayon “say salita ed kanepegan to, agayla so abig to!”—Uli. 15:23.