Ipatnag so Personal ya Interes—Diad Pangomenda
1 Say masimoon a komendasyon so mamaligsa ed totoo, mamakiwas, tan mamaliket ed sikara. Nalmoan na dakel a manangipalapag ya anggan say antikey labat a balikas na masimoon a komendasyon et mabetbet lan makakatulong pian ontalineng iray totoo dia ed ministeryo. Panon tayon nakomendaan iray totoo legan tayon panggugunaetan ya inabang ed sikara so maong balita?
2 Magmaliw a Maobserba: Inimano nen Jesu-Kristo so maabig iran gawa na pitoran kongregasyon ed Asia Minor. (Apoc. 2:2, 3, 13, 19; 3:8) Mipadpara, say masimoon ya interes ed saray totoon nakakatongtong tayo ed ministeryo tayo so mamakiwas ed sikatayon anapen iray pankanawnawan mangomenda. Alimbawa, say malinis a sular, sakey ya ateng a mangipapanengneng na panangaro ed ananak to, odino say makaaron imis tan panangibano na sakey ya unabung, amin na saraya so mangiiter ed sikatayo na pankanawnawan mangomenda. Kasin alisto kayon mangimano tan manganamot ed ontan iran pankanawnawa?
3 Magmaliw a Maong ya Ondengel: Sano pupulongan so arum, paibesngaw ed sikara so liknaan da diad pangitepet ed sikara na matukoy iran tepet. Ipatnag yo ed sikara so respeto diad pangimanon maong ed ibabaga ra. (Rom. 12:10) Ompan walay ibalikas dan makapangiter ed sikayo na pankanawnawan mangomenda, a pakapalaknaban yo ed nigapo yo lan tongtongan a pampaknaan yon dua.
4 Usaren so Pakatebek: Anto so gawaen tayo no walay imbaga na unabung ya agmitunosan ed katuaan na Biblia? Imbes a suppiaten so aliwan imbalikas na unabung, pisalamatan yo iray ibabalikas da insan yo patumbokan na balikas a singa onia “Naiimanok a talagan interesado kayo ed sayan tema.” (Col. 4:6) Anggano say sakey a too et masuppiat, mabetbet a sikatoy nakomendaan tayo lapud masimoon ya interes to ed tema. Say ontan a paraan so nayarin mamakepa ed liknaan na sakey ya ompatnag a sumpa ed maong a balita.—Uli. 25:15.
5 Ta pian walay kana na pangomenda tayo, nepeg a masimoon itan. Say pangibalikas ed ontan iran makapaseseg a salita so mamagalang ed si Jehova tan nayarin sagyaten to so arum ed mensahe na Panarian.