Bayuboan so Inkamaapit ed si Jehova
1. Anto so amoria na sakey ya agin bii nipaakar ed espiritual a rotina to?
1 “Paspasaray so panaglingkor ko ed apalabas a 20 taon odino onsulok ni diad basta iyaatendi ed saray miting tan diad pibibiang ed lawak na ministeryo,” so inaksobi na sakey a Kristianon agin bii. Balet, intuloy to: “Nibagak ya anggaman importante iraya et aliwan saraya lambengat so makatulong ed siak sano onloor iray kipapasen. . . . Amoriak la natan a kaukolan kon iyarunsa so kanonotan ko tan igapo so makabaliksan a panagaral a programa ta pian peteg a nakabat ko si Jehova tan sikatoy naarok tan naapresya so inter na Anak to ed sikatayo.”
2. Akin ya importantin bayuboan so inkamaapit ed si Jehova?
2 Say pangiletneg na maapit a personal a siglaotan ed si Jehova et mankaukolan na sagpot. Mankaukolan itan na nagkalalo nen say basta panumbok ed rotinan aktibidad na Kristiano. No ag-itayo manpipikasin regular ed si Jehova, diad kaunoran et sikatoy singa labat la datin maapit a kaaro tayo ya agtayo la nakakatongtong. (Apoc. 2:4) Usisaen tayo no panon a say personal a panagaral na Biblia tan pikakasi so ontulong ed sikatayon nabayuboan so inkamaapit ed si Jehova.—Sal. 25:14
3. Anton paraan ed personal a panagaral so ontulong ed sikatayon onapit ed Dios?
3 Importante so Pikakasi tan Panagdalepdep: Say personal a panagaral a mamapabiskeg ed puso so manasaglawi a nagkalalo nen say pananda ed manuna iran punto ed aaralen a materyal tan pananap ed saray asalambit a teksto. Say personal a panagaral et kabaliksan toy panmolimoli ed no anto so ipaparungtal na impormasyon nipaakar ed saray dalan, saray estandarte, tan personalidad nen Jehova. (Exo. 33:13) Say pakatalos ed espiritual iran bengatla et mangaapekta ed emosyon tayo tan mamapakiwas ed sikatayon mannonot nipaakar ed mismon kabibilay tayo. (Sal. 119:35, 111) Say personal a panagaral so nepeg a gawaen tekep na gagalan lalon napaapit ed si Jehova. (Sant. 4:8) Say seryoson panagaral so mankaukolan na panaon ontan met ed dugan pasen, tan say regular a panagaral so mankaukolan na disiplina. (Dan. 6:10) Anggano okupado kayon maong, kasin mangigagana kayo na panaon kada agew pian mandalepdep ed saray makapakelkelaw a kalidad nen Jehova?—Sal. 119:147, 148; 143:5.
4. Panon a say pampikasi sakbay ya igapoy personal a panagaral so ontulong ed sikatayon nabayuboan so inkamaapit ed si Jehova?
4 Say impapuson pikakasi so importantin kabiangan na makabaliksan a personal a panagaral. Pian makapasagyat ed puso tayo so katuaan na Biblia tan napakiwas itayon ‘panlingkoran so Dios a tukoyan na galang tan takot,’ kaukolan tayo so masanton espiritu na Dios. (Heb. 12:28) Sirin, nepeg tayon lukasan so kada panagaral diad ikerew na espiritu nen Jehova. (Mat. 5:3) Legan tayon dadalepdepen so Kasulatan tan uusaren iray katulongan ed panagaral ya intarya na organisasyon nen Jehova, ipaparaan tayoy puso tayo parad si Jehova. (Sal. 62:8) Say panagaral ed onian paraan et sakey a kiwas na panagdayew a lapud satan et nipatnag tayoy debosyon tayo ed si Jehova tan napaelet so siglaotan tayo ed sikato.—Jud. 20, 21.
5. Akin ya importante parad sikatayo so pandalepdep ed Salitay Dios kada agew?
5 Singa met ed amin a relasyon, say relasyon tayo ed si Jehova so nepeg a mantultuloy a nabayuboan ta pian mansiansia itan ya ombulaslas ed interon bilay tayo. Sirin, komon ta anamoten tayo so panaon kada agew pian onapit ed Dios, a kabat tayo a sikatoy onapit met ed sikatayo.—Sal. 1:2, 3; Efe. 5:15, 16.