Minabang ed Panaral ed Libron Onapit ed si Jehova
1 Diad “Maseseg Iran Manangiyabawag na Panarian” a Distrito iran Kombension et nanliketan tayo so impakaawat ed libron Onapit ed si Jehova. Dakel so nambasa a tampol ed libro. Peteg ya ontan so ginawa na dakel ni lapud pinakiwas ira na teksto-ed-taon ed 2003 a: “Singger kayo ed Dios, et sikato so onsingger naani ed sikayo.”—Sant. 4:8.
2 No Marso et igapo tayo so panaral ed libron Onapit ed si Jehova diad Panagaral na Kongregasyon ed Libro. Panon itayon nagunggonaan a maong ed panaral tayo? Nakaukolan so panagparaan. Duaran simba so nausar ed kada kapitulo, a pigara labat a parapo so niyeskedyul ya aralen ed kada simba. Saya so mangiyabuloy na magenap a panaon pian sikayo so impapuson makapankomento base ed impanaral tan impandalepdep yo ed materyal. Niarum ni, mas daiset a parapo so aralen legan na saray simba a repasoen iray unor a kabiangan na kapitulo, pian magenap so panaon diad pangonsidera ed nikaduman kabiangan na libro.
3 Onggapo ed kapitulo 2, naromog so kahon ya apauloan na “Saray Tepet a Dalepdepen” diad bandad sampot na kada kapitulo. Kayari na pangonsidera ed unor a parapo na kapitulo, say manangasikaso na panagaral ed libro so maningbat ed kahon a kaiba so grupo. Pasesegen to iray membro na grupo ya ibalikas so walad kanonotan da, a pabitaren iray maabig a punto ed impandalepdep da ed Kasulatan. (Uli. 20:5) Nilikud ed saray nitaryan tepet diad kahon, nayarian ton itepet a sagpaminsan iray onggendan: “Anto so ibabaga ed sikayo na sayan impormasyon nipaakar ed si Jehova? Panon a mangapekta itan ed bilay yo? Panon yon nausar itan pian tulongan so arum?” Say kalat to et makapankomento so grupo a manlapud puso, aliwan pian suboken ira nipaakar ed agtanton importante iran detalye.
4 Nikadkaduma so libron Onapit ed si Jehova. Anggaman amin a publikasyon ya intarya na “matoor tan makabat ya aripen” so mangiglogloria ed si Jehova, say interon gagala na sayan libro et pian singbaten iray kalidad nen Jehova. (Mat. 24:45-47) Agaylan maliket a pankanawnawa so akatarya ed sikatayo! Sikatayo so daakan a nabendisyonan diad aralem a panaral tayo nipaakar ed personalidad nen Jehova. Komon ta sayan panagaral so lalon mamaapit ed sikatayo ed mangatatawen ya Ama tayo, tan magmaliw itayo komon a lalon epektibo ed panulong ed arum a manggawa met na ontan.