Aralen so Libron Dayewen so Dios
Denisinyo so Dayewen so Alenleneg a Tuan Dios pian iyaral ed saray balo ni kayari ran naaral ya intero so libron Pikakabat. Say pangonsidera tayo ed sayan publikasyon diad Panagaral na Kongregasyon ed Libro so manginlong ed sikatayon mangusar ed satan a libro diad ministeryo tan ontulong ed sikatayon napaaralem so aro tan apresasyon tayo ed si Jehova tan ed organisasyon to. Panon itayon sigpot a nagunggonaan diad panaral tayo ed libron Dayewen so Dios?
Pangikondukta ed Panagaral: Lapud sakey a kapitulo so konsideraen tayo ed kada simba, kaukolan a saray manangasikaso na panagaral ed libro so makabat a mangapag ed oras. Kaukolan ya ag-ira manbayag diad saray manangilukas a parapo pian malaglaem so panaon parad mas makana iran materyal, a kaslakan et walad bandad unor na kapitulo. Say antikey a paningbat ed repaso a walad kahon diad sampot na panagaral so ontulong ed saray inmatendi a natandaan iray manunan punto.
Saray nideren tepet a dalepdepen tan singbaten so naromog ed ngalngalin kapaldua na saray kapitulo na libron Dayewen so Dios. Naromog so alimbawa diad pahina 48-9. Agkapilitan a basaen iratan a tepet katekep na saray parapo. Sano kokonsideraen iratan a kaiba so grupo, kaukolan na manangasikaso ya ipabasa iray nisitan teksto tan singbaten no wala ni oras.
Masakbay a Panagparaan: Say pamparaan a maong ed panagaral et aglabat mangilalanor ed panggulis ed saray ebat. Say masimoon a pandalepdep ed saray nisitan teksto so ontulong ed sikatayo pian aliwa labat a saray komento tayo so niparaan tayo noagta, mas importante, pati say puso tayo. (Esd. 7:10) Amin tayo so makatulong ed pakapanpapasesegan diad mabulos a panginabang ed saray komento tayo.—Roma 1:11, 12.
Ontulong ed sikatayo so panaral ed libron Dayewen so Dios pian onapit ed si Jehova tan satan so manginlong ed sikatayo pian natulongan iray matuan-impanpuson totoo a mibiang ed sikatayon mangidayew ed sikato. (Sal. 95:6; Sant. 4:8) Amin tayo komon so sigpot a nagunggonaan ed sayan maabig ya espiritual a probisyon.