Say Iyaataki na Managkabayo a Mangilalanor ed Sikayo
1, 2. Panon a nalalanor iray lingkor na Dios natan diad kasumpalan na mapropetikon pasingawey a nikurit diad Apocalipsis 9:13-19?
1 “Say komanem ya anghel amaknol.” Kayari na satan, ‘saray ehersito na managkabayo’ a manbilang na “mamiduan samplon libo a samplon libo” so manungol a singara karol. Aliwa iyan ordinaryon puersa na militar. “Saray ulo na saray kabayo [et] singa ra kauloan na saray leon.” Ompapaway ed sangi na saratan so apoy, asewek, tan asupre, tan “saray ikol da [et] singa ra ikol na saray uleg.” Sayan simbolikon managkabayo so walaan na makapadesyang ya epekto. (Apoc. 9:13-19) Amta yo ta no panon a sikayoy nalalanor ed kasumpalan na sayan makapasagyat a mapropetikon pasingawey?
2 Say alanaan a nakdaan tan saray kaiba ra ya arum a karnero, so nankakasakey a mangiyaabawag ed saray panangukom na Dios. Bilang resulta et sigpot a niwawalwal so kipapasen na Kakristianoan bilang inatey ed espiritual. Usisaen tayo pa so duaran aspekto na mapropetikon pasingawey a mangipabitar no akin ya epektibon tuloy so ministeryo na saray lingkor na Dios.
3. Anton panangipasal so naaawat yo pian nitongtong yon epektibo so mensahe na Dios?
3 Nipasal tan Akinlongan a Mangipasabi ed Mensahe na Dios: Diad panamegley na Teokratikon Eskuelaan Parad Ministeryo tan arum niran miting ed kongregasyon, saray ministro na Dios so nipapasal a mangitongtong ed mensahe na Dios tekep na autoridad. Bilang pangaalig ed si Jesus tan saray babangatan to, sikaray manaanap ed saray makanepegan, a manpupulong ira ed inerman a pasen a pakaromogan ed saray totoo. (Mat. 10:11; Mar. 1:16; Luc. 4:15; Gawa 20:18-20) Agaylan napapaneknekan ya epektibo iyan metodo na panagpulong a nibase ed Biblia!
4. Anton uusaren so nitatarya ed dakel a manangipalapag ya ontutulong ed sikara pian nasumpal so kimey da?
4 Saray Kristianon ministro so makapangibubunog na binilyon a Biblia, libro, brosyur, tan magasin diad panusumpal da ed sayan ganggan na Dios a panagpulong. Sarayan publikasyon so nitatarya ed ngalngalin 400 a lenguahe, a manisingbat ed dakel a nanduruman tema tan manguusar ed saray metodo a makapasagyat ed nanduruman klase na totoo. Kasin sikayoy epektibon manguusar ed sarayan publikasyon?
5, 6. Anto so pakapatnagan a susuportaan nen Jehova iray totoo to?
5 Panangidirehi tan Suporta Manlapud Tawen: Ipapabitar met na mapropetikon pasingawey a say kimey ya irerepresenta na masimbolikon iyaataki na managkabayo et susuportaan na Dios. (Apoc. 9:13-15) Say sankagloboan a kimey a panagpulong so nasusumpal, aliwan diad panamegley na kakabatan odino pakayari na too, noagta diad panamegley na espiritu na Dios. (Zac. 4:6) Uusaren nen Jehova iray anghel to pian idirehi iyan kimey. (Apoc. 14:6) Kanian, nilikud ed pansasagpot na saray totoon Tasi to, si Jehova so mangitatarya na mangatatawen a suporta pian niyasingger ed sikato iray mauyamo.—Juan 6:45, 65.
6 Lapud sikara so nipapasal tan nakikinlongan a mangipasabi ed mensahe na Dios, tan mankikimey ed silong na panangidirehi na anghel, agnapatunda iray totoo nen Jehova. Itultuloy tayo komon a gawaen so betang tayo diad pakasusumpal na sayan makapaliket a mapropetikon pasingawey.