Musika a Makarepresko
1 Say panagkanta tan musika et importantin kabiangan na tuan panagdayew. Diad Israel nensaman et oniay inkanta nen Asap tan saray agagi ton lalaki: “O misalamat kayo ed Jehova. . . . Sikato so kantaan yo, mankanta kayo na saray panangigalang ed sikato; salitaen yo so amin a makapakelaw a kimkimey to.” (1 Awa. 16:8, 9) Natan et kakantaan tayon maksil si Jehova diad saray sinimban miting tayo ed kongregasyon. (Efe. 5:19) Agaylan abig a pankanawnawa iya pian idayew so ngaran to!—Sal. 69:30.
2 Say pandengel na Kingdom Melodies, a nirekord a kankanta ed Panarian a tinogtog na orkestra, so mangipaslep na espiritual iran bengatla ed nonot tayo. “Legan kon patotogtogen so melodya, onsesebang ed nonot ko iray liriko,” so impaliwawa na sakey ya agin bii. “Alay abig a paraan pian lawas kon nodnonoten si Jehova legan a panggagayagaan so musika!”—Fil. 4:8.
3 Saray Okasyon a Napanggayagaan Iratan: Say pamatogtog ed Kingdom Melodies ed abung so mamawala na inkaligsa tan espiritual ya atmospera a makana ed kareenan na pamilya. “Paulit-ulit min patotogtogen iyan [musika] ed abung tan ed luluganan mi balet ta agkamin balot onsasawa ed inkasanting na musika,” so insulat na sakey a pamilya. “Mabetbet a pawawalaen na Kingdom Melodies so preskon nonot sano manpaparaan parad saray Makristianon miting odino sano manbiabiahen paarap ed asamblea.” Oniay inkuan na sakey ya agin bii: “Lalo ak a masayaksak sano ondedengel ak ed saratan legan a mankikimey ed abung—siopay makapanisian malikeliket ak legan a mantutupi na kapanpesak? Patogtogen ko iyan musika sano nagonigon ak. Peteg a makarepresko so onian musika! . . . Kada kanta et makapaliket.” Wala ta iray pankanawnawa a nagunggonaan kayo ed ontan a makarepreskon musika?
4 Maslak ed saray musika natan et mangipapatnag na awawey na mundo. Natulongan na atateng so ananak da a nabayuboan so panlabay ed maabig iran musika no naynay dan patogtogen iray nirekord a Kingdom Melodies. Dakel ya iyaaralan na Biblia tan interesadon totoo so maliket met a makaamta ed sarayan marakdakep a maespiritual a kankanta, a mangiglogloria ed si Jehova tan mamaliket ed sikatayo.—Sal. 47:1, 2, 6, 7.