Sakey a Paraan Pian Natulongan Ira

Mibibiang iray tuan Kristiano diad mapublikon ministeryo a panangiwakawak ed maong a balita. (Fil. 2:17) Ta pian nagawaan itan, arum iran manunan brosyur, tract, tan saray artikulo ed 20 a lenguahe so wala la’d Internet diad www.watchtower.org. Agdenesinyo iyan Web site pian ibunog ed saray Tasi nen Jehova iray peles a publikasyon. Say gagala na saya et pian nitarya ed publiko so suston impormasyon nipaakar ed ibabangat na saray Tasi nen Jehova a manlalapud Biblia.

Diad agano ni et wala so makanan inyarum diad opisyal a Web site tayo. Saya et say brosyur ya Anto so Kakaukolanen na Dios ed Sikatayo a walad masulok a 220 a lenguahe. Ontan met, onggapo ed saray paway na Enero 1 tan Enero 8, 2004, say Web address tayo so nanengneng diad beneg a pahina na Say Panag-Bantayan tan Awake! ed amin a lenguahe.

Panon yon nausar iya? Bueno, nayarin makaabet kayo na too ya ompatnag ya interesado balet say sananey a lenguahe labat so natalosan to. No sikato so manguusar na Internet, nayarian yon ipaimano ed sikato so address diad beneg a pahina na Say Panag-Bantayan odino Awake! Diad ontan et nayarian ton usisaen so brosyur a Kakaukolanen diad dilin lenguahe to anggad pakapawil yo ya awit so literatura diad lenguahe to. Odino nayarian yon itupleg ed kongregasyon odino grupo a mangaasikaso ed lenguahe to a sikatoy dalawen da.