Say Official Web Site Tayo​—Denisinyo Parad Sikatayo tan ed Arum

Ingganggan itayo nen Jesus ya ipulong so maong a balita na Panarian “ed interon dalin bilang pantasi ed amin a nasyones.” (Mat. 24:14) Pian ‘sigpot tayon nasumpal so ministeryo tayo,’ say watchtower.org, jw-media.org, tan jw.org et pinankasakey ed balon Web site ya jw.org.​—2 Tim. 4:5.

“Interon Dalin”: Manga kakatlo na populasyon ed mundo so mani-Internet. Saya so manunan pangaalaan na saray totoo na impormasyon, lalo lad saray kalangweran. Nanengneng na saray mani-Internet ed site tayo iray dugan ebat ed saray tepet ed Biblia. Nabasa ditan so nipaakar ed organisasyon nen Jehova tan mas mainomay so makapan-request na libren panagaral na Biblia. Tan posible ya nipasabi so maong a balita ed saray lugar ya agni tanto napupulongan.

“Amin a Nasyones”: Pian napulongan so “amin a nasyones,” kaukolan tayon ipresenta so katuaan ed Biblia diad nanduruman lenguahe. Main-inomay ya nalukasan na saray mani-Internet so impormasyon ed jw.org diad manga 400 ya lenguahe, a mas dakel no ikomparad arum ya site.

Usaren Iyan Epektibo: Say pinarakep ya Web site tayon jw.org et aglabat denisinyo pian napulongan iray totoo. Adesinyo met iya parad Saray Tasi nen Jehova. No aka-Internet kayo, marakep no ipamilyar yoy pangusar ed jw.org. Niraya so pigaran suhestion no panon iyan usaren.

[Diagram ed pahina 3]

(Parad aktual a format, nengnengen so publikasyon)

Salien Iya

1 I-type so www.jw.org ed address field na Internet browser yo.

2 Pasyaren so site diad pangilukas ed saray heading, menu, tan link.

3 Sali yon lukasan so jw.org ed cell phone odino tablet. On-adjust ed melag ya screen so page layout balet pareho nin siansiay karga to.