Usaren ed Ministeryo so Web Site Tayo​—“Bible Questions Answered”

Diad seksion ya “Bible Teachings” ed jw.org et walay feature ya “Bible Questions Answered.” No kabisado tayo iray tepet ya wadman, sarag tayon ipaimanoy ebat na Biblia ya walad Web site no mantepet so pupulongan tayo. Nayari met ya usaren irayan tepet pian igapoy presentasyon ed ministeryo. Sarag tayoy manpili na tepet ya interesado ray totoo ed teritorya, tepeten so opinyon na pupulongan tayo, tan ipaamtay ibabaga na Biblia diad pangusar ed ebat a walad jw.org. Kayari to, sarag tayo lan ipaliwawa o ipanengneng no iner so angalaan tayoy ebat. Say sakey nin opsyon et ipabasan mismo ed sikato so ebat a walad Web site. Balibali eksperiensya na asawa na sakey ya ombiabiahen manangasikaso diad pangibabaga toy: “Dakel so mantetepet, ‘Kasin say Dios so panlalapuan na paniirap tayo?’ Labay mon naamtaay ebat diad 51 segundo labat?” Insan to i-play so akarekord ya ebat ya in-download tod gadyet to. Diad konklusyon to et ipapanengneng toy kapitulo 11 na libron Ibabangat na Biblia.