Usaren so jw.org Diad Ministeryom

Say Web site tayo et mausausar pian nipasabi tayoy maong a balita anggad “sankaarawian a pasen na dalin.” (Gawa 1:8) Maslak ed saray householder et agda amtay jw.org. Naamtaan da labat itan no walay manangipalapag ya mangibangat ed sikara.

In-download na sakey ya ombiabiahen manangasikaso so video ya Akin ya Aralen so Biblia? diad cellphone to tan kada walay pankanawnawa et ipapanengneng to itan. Singa bilang, no manpulong ed kaabungan, oniay ibaga to: “Linma ak dian magano pian tulongan iray totoo ya naamtaay ebat ed taloran importantin tepet: Akin et dakdakel so problema ed mundo? Panon irayan ayosen na Dios? Tan panon tayon naanosan iraya natan? Ebatan na sayan antikey a video iratan a tepet.” Insan to itelpek lan tampol so “play” tan nengnengen toy reaksion na householder. Makapasagyat so video kanian maslak a totoo et akapokus irad screen anggad nasumpal. Insan ibaga na ombiabiahen manangasikaso: “Arengel mon sarag moy man-request online parad panaral na Biblia. Balet lapud wadia ak la, sarag ko la natan ya idemostra ed sikan magano.” No labay na householder, idemostra to so panag-aral ya usaren so brosyur ya Maong a Balita. No anggapoy panaon na householder, iyeskedyul to ya gawaen itan diad onsublay ya ipawil. No manpapainawa ed sakey ya pananganan, sikatoy mikaaro ed nakaabay to insan ontan met so ibaga to. Kasin uusaren mo met so jw.org ed ministeryom?