Usaren so Biblia ed Epektibon Paraan
1. Antoy nayari yon gawaen sano manpaparaan parad lawak na ministeryo?
1 Antokaman a literatura so plano tayon ipalima ed ministeryo, makatulong so pampili na sakey a makapakiwas a teksto ya inabang ed saramay ondengel ed sikatayo. (Heb. 4:12) Say pamili na tekston inusar ed publikasyon ya ipapalima yo so makagunggona pian epektibon niparungtal so publikasyon. Diad arum a lugar, nalmoan na saray manangipalapag a makatulong so pangegna ed Biblia sano aasinggeran so sakey a too odino sano mankakabkaabungan.
2. (a) Panon tayon nigapo so presentasyon tayo panamegley na sakey a teksto? (b) Antoran Makasulatan a tema so paninteresan na totoo diad teritorya yo?
2 Igapo Panamegley na Sakey a Teksto: Igagapo na arum a manangipalapag so presentasyon da diad pangitepet da ed unabung ed panmoria to nipaakar ed sakey a teksto ed Biblia ya ibasa ra. Saya so tampol a mangipaimano ed Salita na Dios. Kasin epektibo so pigara ed saray onggendan ya introduksion ed teritorya yo?
◼ “No bilang ta walay pakapanyari yo, kasin gawaen yo irayan pananguman?” Basaen so Apocalipsis 21:4.
◼ “Akin a manbibilay itayo ed sarayan mapeligron panaon?” Basaen so 2 Timoteo 3:1-5.
◼ “Diad padesir yo magmaliw kasin maabig a pasen so komunidad tayo no tuloken tayo iyan simbawa?” Basaen so Mateo 7:12.
◼ “Diad padesir yo naalagar ni kasi na ananak yo iray kipapasen ya adeskribe dia?” Basaen so Salmo 37:10, 11.
◼ “Diad padesir yo onsabi ni kasi panaon ya ontua irayan salita?” Basaen so Isaias 33:24.
◼ “Abalitaan yo ta la iyay pansalat na gobierno ya asalambit dia?” Basaen so Daniel 2:44.
◼ “Pipilaleken yo ta’n itepet iya ed Dios?” Basaen so Job 21:7.
◼ “Nanengneng tayo ni kasi iramay inadaro tayon inaatey?” Basaen so Juan 5:28, 29.
◼ “Amta kasi na saray inaatey so gagawaen na saray mabilay?” Basaen so Eclesiastes 9:5.
3. Panon tayon natulongan so totoo a natalosan so teksto ed Biblia a binasa tayo?
3 Ipaliwawa, Iyilustra, Iyaplika: Sano mabulos a mitongtong so sakey a too, agyo aapuraen so tongtongan. Ikdan yo na malaem a panaon so pangipaliwawa, pangiyilustra, tan pangiyaplika ed teksto a binasa yo pian natalosan to itan. (Neh. 8:8) No natalosan tan awaten na totoo so ibabangat na Salita na Dios, satan so manresulta ed makapakelaw a pakapasimbalo ed bilay da.—1 Tes. 2:13.
4. Panon tayon epektibon nausar so Biblia diad panagpawil?
4 Itultuloy yon usaren so Biblia ed epektibon paraan legan a babayuboan so interes. Nayarian yon usaren irayan miparan metodo sano ompapawil: (1) Mamili na matukoy a teksto. (2) Mamalesa na simplin punto de bista a tepet nipaakar ed teksto. Insan basaen itan. (3) Ipaliwawa, iyilustra, tan iyaplika itan. Panggunaetan ya aruman so pikakabat na too ed Salita na Dios diad kada idalaw yo. Agmanbayag et mangiyaaral kayo la na Biblia!