Nakaukolan so Tulong Mo
1 “Salamat ed amin a gagawaen yo ed biang min amin. Talagan nagugunggonaan kami ed saratan.” Ipapatnag a maong na satan a komento so panangapresya tayo ed saray mamatatken tan ministeryal a lingkor. Lapud tuloytuloy so ibubulaslas na organisasyon na Dios, lawas met a nakaukolan iray matatken ed espiritual a lalaki pian manserbi ed ngalngali 100,000 a kongregasyon ed sankamundoan. No sakey kan bautismadon agin laki, nakaukolan so tulong mo.
2 ‘Panagdampot’: Panon mon nadampot so kaaruman iran pribilehyo ed panaglingkor? (1 Tim. 3:1, NW) Manuna’d amin, diad pangipatnag moy maabig ya ehemplo ed amin ya aspekto na bilay mo. (1 Tim. 4:12; Tito 2:6-8; 1 Ped. 5:3) Mibiang kan sigpot ed panagpulong a kimey tan tulongan so arum a gawaen met itan. (2 Tim. 4:5) Nawalaan na masimoon ya interes ed pankaabigan na saray kapananisiaan. (Roma 12:13) Magmaliw a makulin estudyante na Salitay Dios, tan bayuboan so ‘dunong ed panagbangat.’ (Tito 1:9, NW; 1 Tim. 4:13) Panseetan ya asikasoen iray asainmin ya inmatalek ed sika na saray mamatatken. (1 Tim. 3:10) No sakey kan ulo na pamilya, ‘uleyan mon maong so abung mon dili.’—1 Tim. 3:4, 5, 12.
3 Say pakaturo bilang ministeryal a lingkor odino matatken so manasaglawi ed impasyan kimey tan mankakaukolan na dilin-panagsakripisyo. (1 Tim. 5:17) Sirin, no manadampot ka, pampelengan moy sipapaabeban panlingkor ed arum. (Mat. 20:25-28; Juan 13:3-5, 12-17) Dalepdepen so disposisyon nen Timoteo, tan panggunaetan ya aligen itan. (Fil. 2:20-22) Singa sikato, paulyan a say maabig a konduktam so mangirekomenda ed sika. (Gawa 16:1, 2) Legan mon babayuboan iray maespiritual a kalidad a nakaukolan ed pamemben na kaaruman iran pribilehyo tan iyaaplika so antokaman a nisimbawan pakaaligwasan mo, say ‘ibobonam so nipatnag ed saray ganagana.’—1 Tim. 4:15.
4 Atateng, Ipasal Yo Iray Anak Yo ya Ontulong: Saray anak so makaaral lan ontulong anggan ugaw ni ra. Ipasal yo iran ontalineng ed saray miting, manpulong, tan nawalaan na maabig a kondukta diad Kingdom Hall tan diad eskuelaan. Bangatan yo iran mibiang tan panliketan so panserbi ed arum, a singa say itulong ed panaglinis ed Kingdom Hall, itulong ed saray maedad la, tan arum nira. Paeksperiensya yo ed sikara so liket ed panangiter. (Gawa 20:35) No ontan so pangipasal yo ed sikara, natulongan yo ran magmaliw a potensyal a payunir, ministeryal a lingkor, tan matatken.