Kalangweran ya Agagin Lalaki, Kasin Manadampot Kayoy Pribilehyo?
1. Kapigan so nepeg a pangiyaplika na sakey ya kalangweran ya agin laki ed ibabaga na 1 Timoteo 3:1?
1 ‘No manadampot so siopaman, maabig a kimey so pipilaleken to.’ (1 Tim. 3:1) Papasesegen na sayan teksto iray agagin lalaki ya mandampot na pribilehyo diad kongregasyon. Alagaren mo ni kasi itatken mo antis mon gawaen itan? Diad tua, mas maabig ya igapo itan sano kalangweran ka ni. Diad ontan et nipasal ka tan nipanengneng mon manepeg kan naturo ya ministeryal a lingkor sano wala ka lad edad. (1 Tim. 3:10) No abautismoan ka la, antoy gawaen mo pian nadampot moy sakey a pribilehyo?
2. Panon mon naaralay mansakripisyo tan panon mon nipanengneng itan?
2 Masakripisyo: Tandaan ya say dadampoten mo et maabig a kimey, aliwan posisyon. Kanian, aral mon labayen ya tulongan iray agagi. Pian nagawaan iya, dalepdep moy maabig ya alimbawa nen Jesus. (Mat. 20:28; Juan 4:6, 7; 13:4, 5) Ipikasim ed si Jehova ya tulongan to kan isipen so pankaabigan na arum. (1 Cor. 10:24) Sarag mo kasin asistian iray kakongregasyon mon maedad la odino mansasakit? Mabulos ka kasin manlinis, man-trim na tanaman, odino mangiban mangapiger ed Kingdom Hall? Manboluntaryo ka kasin man-substitute na betang diad Teokratikon Eskuelaan Parad Ministeryo?
3. Akin et importante so pagmaliw ya maespiritual, tan panon mon napaaligwas so espiritualidad mo?
3 Maespiritual: Mas papablien na kongregasyon so sakey a lingkor ya maespiritual nen say maabilidad. Say maespiritual ya too et miparay panmoria tod si Jehova tan ed si Jesus. (1 Cor. 2:15, 16) Ipapanengneng to so “bunga na espiritu.” (Gal. 5:22, 23) Sikatoy makulin manpulong, a mangiyuunad Panarian. (Mat. 6:33) Magmaliw kan maespiritual a too no walay maabig ya rotinam ed personal a panagaral. Kaibad saya so inagew-agew a pambasad Biblia tan pambasad kada isyu na Say Panag-bantayan tan Onliing! Importante met so pamparaan tan iyatendid saray aral. (Sal. 1:1, 2; Heb. 10:24, 25) Oniay insulat nen Pablo pian napaseseg so kalangweran a Timoteo ya paaligwasey espiritualidad to: “Imanom a naynay so . . . ibabangat mo.” (1 Tim. 4:15, 16) Kanian iparaan mon maong iray asainmin mo diad Teokratikon Eskuelaan Parad Ministeryo. Manprepara ka parad panagpulong, tan regular ya mibiang ed satan. Manggawa kay espiritual ya kalat mo tan pankimeyan itan. Singa bilang, say pampayunir, panlingkor ed Bethel, odino panaral ed Bible School for Single Brothers. No maespiritual ka, ‘naarawian mo ray pilalek ya inuugaw.’—2 Tim. 2:22.
4. Akin et importantin napanmatalkan tan matoor ka?
4 Napanmatalkan tan Matoor: Nen inmunan siglo, saray agagin lalaki ya tinuron mangibunog na naakan ed saray mankaukolan ya Kristiano et “maabig so reputasyon da” tan kabkabat iran napanmatalkan tan matoor, kanian kampante iray apostol ya nagawaan itan ya kimey. Lapud satan, akapampokus ira ed arum ni ran importantin kimey. (Gawa 6:1-4) Kanian no walay asainmin mod kongregasyon, gawam so anggaay nayarian mo. Alig moy Noe, ya tinumbok toy amin ya instruksion ed sikato diad panggaway biong. (Gen. 6:22) Say katooran mo et pakapatnagan ya maespiritual ka tan papablien itan nen Jehova.—1 Cor. 4:2; nengnengen so kahon ya “Makagunggona so Panangipasal.”
5. Akin a nepeg ya mandampot na pribilehyo iray kalangweran ya agagin lalaki?
5 Unong ya nipropesiya, papepelesen nen Jehova so kimey na panag-ani. (Isa. 60:22) Kada taon, say average na nababautismoan et manga 250,000. Lapud dakel so mangaawat ed katuaan, kaukolan iray kualipikado tan maespiritual a lalaki ya mangasikasod saray responsabilidad ed kongregasyon. Natan et nagkalalo lan dakel so kimey diad panaglingkor ed si Jehova. (1 Cor. 15:58) Kalangweran ya agagin lalaki, kasin manadampot kayoy pribilehyo? No ontan, maabig a kimey so pipilaleken yo!
[Blurb ed pahina 2]
Lapud dakel so mangaawat ed katuaan, kaukolan iray kualipikado tan maespiritual a lalaki ya mangasikasod saray responsabilidad ed kongregasyon
[Blurb ed pahina 3]
Makagunggona so Panangipasal
Nagugunggonaan iray kualipikadon kalangweran ya agagin lalaki sano iikdan ira na saray elder na asainmin tan ipapasal da ra. Aminsan kayari aral, akayurong ed stage so sakey a manangasikasoy sirkito pian pasesegen so sakey ya agi. Naimano toy ugaw a laki diad asingger, kanian tinepetan to no walay labay ton ibaga. Inkuan na ugaw ya betang toy manlinis na stage kada kayari na aral. Manaalagar iray ateng to, balet agto labay so onalis anggad agto nasumpal so asainmin to. Mabulos ya inmalis ed arum ya pasen so manangasikasoy sirkito. Oniay imbaga to: “Alerto iray elder ed satan ya kongregasyon ya mangipasal ed saray kualipikadon kalangweran a lalaki diad pangiiter da na saray asainmin ed kongregasyon. Kanian sano ombibisita ak ed kongregasyon da, walan walay nirerekomenda dan kalangweran ya agin laki bilang ministeryal a lingkor.”