Palaknaben so Ministeryo Tayo
1 Pinaseseg nen apostol Pablo iray Kristiano a manakar ed dalan na Dios tan mantultuloy ya “ondakerakel.” (1 Tes. 4:1) Antoy kabaliksan na saya ed sikatayo? Say sakey et itultuloy tayon anapen iray paraan pian napalaknab ni so espiritual a kimey, a lawas panggunaetan a sigpot a ‘sumpalen so ministeryo tayo.’—2 Tim. 4:5.
2 Motibo: Napakiwas itayon mamalaknab ed ministeryo tayo lapud pilalek tayon panlingkoran a nagkalalo so Manamalsa tayo. Labay tayon ombiskeg so espiritualidad tayo tan anapen iray paraan a napaaligwas tayoy ministeryo tayo. Say maabig a rotina tekep na dugan motibo so ontulong ed sikatayon nadampot iray teokratikon kalat.—Sal. 1:1, 2; Fil. 4:6; Heb. 10:24, 25.
3 Pian napalaknab so ministeryo tayo, kaukolan tayon bayuboan so mabunlok tan masakripisyon espiritu, a satan so nabayuboan panamegley na atekepay pikakasin pandalepdep ed maabig ya ehemplo nen Jesus. (Mat. 20:28) Agamoran nen Jesus so baleg a gayaga diad impanlingkor to ed arum diad interon ministeryo to. (Gawa 20:35) Naalig tayoy Jesus diad pangipanengneng na personal ya interes ed totoo tan diad inkaalerto ed saray pankanawnawa pian napalaknab tayoy ministeryo tayo.—Isa. 6:8.
4 Betang na Atateng: Say pilalek a manlingkor ed arum tan pamalaknab ed ministeryo tayo so nipaslep tayo ed ananak anggano ugugaw ni ira. Saray kalangweran so makaimano ed inkakuli na saray membro na pamilya tan ed aktibon pibibiang da ed panamalaknab na ministeryo. Sakey ya agin laki so apakiwas a mamalaknab ed ministeryo to sanen ugaw ni lapud impiulop-ulop to ed si laki to diad saray kimey ed kongregasyon. Lapud pakakanengneng to ed inkakuli tan liket nen laki to, sikatoy apakiwas a mananap na saray pankanawnawan manlingkor ed saray agagi to. Sikato la natan so ministeryal a lingkor.
5 Pankaukolan ed Saray Agagin Lalaki: “No wala so [“ondampot,” NW] . . . , maong a gawa so pirawa’to.” (1 Tim. 3:1) Sarayan salita so mamapaseseg ed saray agagi ya ondampot pian onkualipika ed kaaruman iran pribilehyo ed serbisyo diad organisasyon nen Jehova. Say panggawa ed satan et agmankaukolan na nikaduma iran dunong. Say sakey ya agin laki a manadampot ed pribilehyo ed serbisyo et kaukolan ya anapen to nin unona so Panarian tan maseseg a mibiang ed ministeryo. (Mat. 6:33; 2 Tim. 4:5) Panggunaetan toy magmaliw a maong ya ehemplo ed arum.
6 Sankamundoan: Papepelesen nen Jehova so panagtipon. (Isa. 60:22) Wala so maganat a pankaukolan parad saramay manutumbok ed ehemplo nen Jesus a nagkalalon pankimeyan so ministeryo ra. Nanengneng ed sankamundoan a report parad 2006 a serbisyon taon a walay 248,327 ya abautismoan. Kabaliksan na saya a say promedyon nababautismoan kada agew et 680! Komon ta itultuloy tayon amin ya anapen iray paraan pian paaligwasen ni so ministeryo tayo.