Parte 9—Pangikondukta na Progresibo Iran Panangiyaral na Biblia
Pangiparaan ed Saray Iyaaralan a Mantasi ed Impormal a Paraan
1 Sanen amoria nen Andres tan Felipe a si Jesus so insipan a Mesias, agda apokpokan so pangibaga ed satan a makapaliket a balita ed arum. (Juan 1:40-45) Ontan met natan, sano onggagapo la ray iyaaralan na Biblia a mangagamil na pananisia ed naaaralan da, napakiwas iran itongtong itan ed arum. (2 Cor. 4:13) Panon tayo iran napaseseg a mantasi ya impormal tan niparaan pian epektibo dan nagawaan itan?
2 Nayarin diad pangitepet yo lambengat ed iyaaralan no kasin itotongtong to la ed arum so naaaralan to ed Biblia. Ompan walaray kakaaro odino kapamilyaan to a nayarian ton imbitaan ed panagaral. Tepetan yo no walaray katrabahoan, kaeskuelaan, odino arum niran kabat to ya angipatnag lay interes. Diad onian paraan et nigapo to so pakapantasi. Tulongan yo pian natalosan to a kaukolan so pakatebek, inkamarespeto, tan inkamapangasi sano itotongtong ed arum so nipaakar ed Dios a Jehova tan saray gagala to.—Col. 4:6; 2 Tim. 2:24, 25.
3 Pananginabang ed Sisisiaen Da: Importantin tuloy a nibangat iray iyaaralan na Biblia a mangusar ed Salita na Dios sano inanabang da iray sisiaen da. Diad saray pilin punto legan na panagaral, tepetan so iyaaralan: “Panon mon usaren so Biblia pian ipaliwawa iyan katuaan ed pamilyam?” odino “Anton teksto ed Biblia so usaren mo pian napaneknekan iya ed kaarom?” Imanoen no panon so iyebat to tan bangatan no panon ton ibase ed Kasulatan so ibabangat to. (2 Tim. 2:15) No gawaen yo iya, parehon niparaan yo so iyaaralan a mantasi ya impormal tan, sano onkualipika la, diad organisadon panagpulong a kimey a kaibay kongregasyon.
4 Makabat so pangiparaan ed saray iyaaralan na Biblia a mangarap ed isusumpa. (Mat. 10:36; Luc. 8:13; 2 Tim. 3:12) Sano walaray mantepet odino mankomento nipaakar ed saray Tasi nen Jehova, makapangilukas iya na dalan pian makapantasi iray iyaaralan. Say brosyur a Jehovah’s Witnesses—Who Are They? What Do They Believe? so manggawa ed sikaran ‘lawas akaparaan ya onebat.’ (1 Ped. 3:15) Lugan na satan iray suston impormasyon a nausar na saray balo ni pian tulongan iray kakaaro tan kapamilyaan dan onsusumpa lapud panagpaga, a natalosan iray nibase’d Biblian sisiaen tan aktibidad tayo.