Tutulongan Itayo na Panagpulong Pian Makapansungdo
1 Papasesegen itayo na Salitay Dios a ‘batiken a siaanos so babatiken a niiyan ed arap tayo.’ (Heb. 12:1) No panon a kaukolan na bumabatik so anos odino panagsungdo pian ontalona ed laslasan, kaukolan tayo met so panagsungdo pian nagamoran so premyo ya andi-anggaan a bilay. (Heb. 10:36) Panon itayon natulongan na Kristianon ministeryo pian sitotoor itayon makapansungdo anggad kasampotan?—Mat. 24:13.
2 Napapabiskeg so Espiritualidad Tayo: Lapud pangiyaabawag tayo ed alay abig a sipan na Biblia a balon mundo, mansiasiansian masnag so ilalo tayon mismo. (1 Tes. 5:8) Sano regular itayon mibibiang ed lawak na ministeryo, walaan itayo na pankanawnawa a mangipakabat ed saray katuaan a naaaralan tayo ed Biblia. Walaan itayo na pankanawnawan idepensa so pananisia tayo, a pakapabiskegan na espiritualidad tayo.
3 Pian epektibo so panagbangat tayo ed arum, nepeg a malinew so pakatalos tayon mismo ed saray katuaan ed Biblia. Kaukolan tayo so mansukimat tan mandalepdep nipaakar ed materyal. Say masimoon a pansasagpot tayo so mamaaralem ed pikakabat tayo, mamabiskeg ed pananisia tayo, tan mamasimbalo ed espiritualidad tayo. (Uli. 2:3-5) Kanian, sano panggugunaetan tayon tulongan so arum, napapabiskeg tayo met so inkasikatayo.—1 Tim. 4:15, 16.
4 Say maseseg a pibibiang ed ministeryo et makanan kabiangan na “sankabukel a kinlong na Dios,” a kaukolan tayo pian mapekder a nasumpa so Diablo tan saray demonyo to. (Efe. 6:10-13, 15) No okupado itayo ed sagradon panaglingkor, nisentro tayo so kanonotan tayo ed makapabiskeg iran bengatla tan nipaliis itayo ed mauges ya impluensya na mundo nen Satanas. (Col. 3:2) Legan tayon ibabangat ed arum so daladalan nen Jehova, napapanonotan itayo met a kaukolan tayon pansiansiaen so masanton kondukta.—1 Ped. 2:12.
5 Papabiskegen na Dios: Kaunoran, no mibibiang itayo ed kimey a panag-ebanghelyo, naaralan tayoy manmatalek ed si Jehova. (2 Cor. 4:1, 7) Agaylan bendisyon itan! Diad pamayubo tayo ed ontan a panagmatalek et ag-itayo lambengat nakinlongan a manumpal ed ministeryo tayo noagta natalonaan tayo met so antokaman a sirkumstansya a kipaarapan tayo ed bilay. (Fil. 4:11-13) On, say pakaaral ed sigpot a panmatalek ed si Jehova et makanakana ed pakapansungdo. (Sal. 55:22) Diad dakel a dalan, tutulongan itayo na panagpulong pian makapansungdo.