Napapabiskeg na Panagpulong so Espiritualidad Tayo
1. Antoray nagunggona tayo ed panagpulong?
1 No aktibo itayon mibibiang ed panagpulong a kimey, napabiskeg na satan so espiritualidad tayo tan lalo itayon magmaliw a maliket. Siempre, say manunan rason na pampupulong tayo et say pamaliket ed si Jehova. Balet, diad pangunor ed ganggan ya ‘ipulong so salita,’ naawat tayo so panamendisyon nen Jehova tan nagunggonaan itayo met ed arum nin paraan. (2 Tim. 4:2; Isa. 48:17, 18) Panon itayon napabiskeg tan napaliket na panagpulong?
2. Panon itayon napapabiskeg na ministeryo tayo?
2 Napapabiskeg tan Nabebendisyonan Itayo: Say panagpulong et mamapaseseg ed sikatayon iyapasakey so imano tayo ed saray bendisyon na Panarian, imbes a diad saray kaplesan a problema tayo. (2 Cor. 4:18) No ipaliwawa tayoy ibabangat na Biblia ed arum, lalo tayon panisiaan iray sipan nen Jehova tan naapresya so katuaan. (Isa. 65:13, 14) Legan tayon tutulongan so arum a nawalaan na maapit a relasyon ed si Jehova pian ag-ira magmaliw a ‘kabiangan na mundo,’ ombibiskeg met so mismon talindeg tayo ya onsian ed mundo.—Juan 17:14, 16, NW; Roma 12:2.
3. Panon ya ontulong ed sikatayo so ministeryo tayo pian nabayuboan iray Kristianon kualidad?
3 Natulongan itayo na pibibiang ed ministeryo a nabayuboan iray Kristianon kualidad. Alimbawa, say pansagpot a ‘magmaliw ya amin a ganagana ed amin a totoo’ et ontulong ed sikatayon napaaligwas so inkamapaabeba tayo. (1 Cor. 9:19-23) Legan tayon mitotongtong ed saray ‘maermen tan abuybuyak, a singa karneron andiay pastol,’ naaral tayoy magmaliw a masimpatiya tan walaay pililikna. (Mat. 9:36) Naaralan tayo met so man-anos no mantultuloy itayo ed ministeryo anggaman ag-interesado odino onsusumpa so arum. Lalo itayon magmaliw a maliket no usaren tayoy bilay tayo ya ontulong ed arum.—Gawa 20:35.
4. Antoy pangipapasen mo ed ministeryom?
4 Agaylan bendisyon so pakawalaan na kimey a mangidayew ed Alenleneg a makanepegan ed panagdayew tayo! Pabibiskegen itayo na panagministeryo. Mangiter itan na daakan a bendisyon ed saramay sigpot a mibibiang ed ‘panangipulong na maong a balita.’—Gawa 20:24, NW.