Tulongan Iray Anak Yon Onaligwas ed Ministeryo
1 Saray Kristianon atateng so walaan na ambelat a responsabilidad ya ipasal iray anak da ed ministeryo manlapud inkaugaw. Nagawaan da iya ed pigaran paraan. Arum ya anak et makapangipatlep lay matukoy a teksto ed Biblia anggan agni ira makabasa. Saya so walaan na baleg ya epekto ed saray dumerengel. Legan na ibabaleg na saray ugugaw, mas dakel ni nagawaan da ed ministeryo. Sikayoran kaatengan, panon yon natulongan so anak yon mibiang ed panagpulong? Nayarin makatulong met iray onggendan a suhestion.
2 Kayari na pangibano, oniay nayarin ibaga yo:
◼ “Say ana’kon si [ngaran to], et labay ton narengel yo so sakey a makabkabaliksan a bersikulo.” Oniay nayarin ibaga na anak yo: “Diad sayan bersikulo ed Salmo et naamtaan ko so ngaran na Dios. [Basaen odino idalatdat na anak so Salmo 83:18.] Ibabaga na sayan magasin no antoy gawaen nen Jehova a Dios parad sikatayo. Nayarin itilak ko la iya ed sikayo?” Sampotan yo so tongtongan diad pangipaliwawa no panon a susuportaan so sankamundoan a kimey.
3 Odino salien met iyan presentasyon:
◼ “Ipapasal koy ana’kon si [ngaran to] a mangipatnag na panangiyansakit ed arum diad komunidad. Labay to komon so manginabang ed sikayo na antikey a mensahe na Biblia.” Oniay nayarin ibaga na anak yo: “Say sakey a paraan a labay kon natulongan so totoo et say panginabang ko ed sikara na say ibabaga na Biblian ilalo ed arapen. [Basaen odino idalatdat na anak so Apocalipsis 21:4.] Ipapaliwawa na sayan magasin no antoy gawaen na Panarian na Dios parad sikatayo. Seguro et nagustoan yon basaen iya.”
4 Say tuloy-tuloy a pangusar ed pinasimpli iran presentasyon so mamawalay kompiyansa na saray ugugaw ed abilidad dan manginabang ed mensahe na Panarian. Saray sesyon na panagpasal a mangiyaapasakey ed malinew a panagsalita tan suston kasil na boses so manginlong ed sikaran mitongtong dia ed nanduruman kipapasen. Say maabig, masakbay a panagparaan tan masimoon a komendasyon so ontulong ed saray ugugaw a mangibalikas ed pananisia ra.
5 Lapud satan a panamaseseg, dakel lan kalangweran so kinmualipika bilang agbautismadon manangipalapag. Talagan makapaliket a nanengneng iray anak tayo ya onaaligwas ed Kristianon ministeryo!—Sal. 148:12, 13.