Ibangat Yoray Ananak Yo a Mangidayew ed si Jehova
1. Kasin nidayew na ugugaw nin ananak si Jehova?
1 Papasesegen na Salmo 148:12, 13 iray ananak a ‘mangidayew ed ngaran nen Jehova.’ Lugan na Kasulatan iray dakel ya ehemplo na ugugaw nin ananak a nanggawa na ontan. Alimbawa, “si Samuel [so] nankatangbayan ed arap nen Jehova, anta ugaw ni.” (1 Sam. 2:18) Sakey a “melag a marikit” so angibaga ed asawa nen Naaman a sarag na propeta nen Jehova ed Israel a paabigen so kating nen Naaman. (2 Ara. 5:1-3) Sanen linmoob si Jesus ed templo tan nanggawa na makapakelkelaw iran kimey, “ugugaw” iray angikelyaw na: “Hosanna [odino mangilaban] ed anak nen David.” (Mat. 21:15) Panon a nibangat na atateng iray ananak da a mangidayew ed si Jehova?
2. Akin ya importantin ipanengneng na atateng so maabig ya alimbawa ed ananak da?
2 Alimbawa: Antis ya impaslep na saray kaamaan ya Israelita so katuaan ed kapusoan na ananak da, sikaray abilin nin unona ya aroen da si Jehova tan ipapuso ran mismo iray ganggan to. (Deu. 6:5-9) No mansalita kayo na makapaseseg nipaakar ed ministeryo tan gawaen itan a kabiangan na sinimban eskedyul yo, ipasen met na ananak yo ya importante tan makapenek so ministeryo.
3. Panon ya agunggonaan so sakey ya agin bii lapud alimbawa na atateng to?
3 Onia so nanonotan ni na sakey ya agin bii: “Sanen ugaw ak ni, say rotina na pamilya mi et kaibay pibiang ed lawak na ministeryo kada sampot-simba. Naiimanok a talagan panliliketan na saray atateng ko so panagpulong. Kanian anggad imbaleg mi et minoria mi so ministeryo a makapaliket a kimey.” Sayan agin bii so nagmaliw ya agbautismadon manangipalapag sanen mantaon na pitora tan natan et koma-33 a taon to la ed sigpot-panaon a ministeryo.
4. Antoy kabaliksan na progresibon pangipasal ed ananak?
4 Progresibon Panangipasal: Ipibali yoy ananak yo legan kayon mibibiang ed ministeryo. Nayarin sikaray ontoktok, mangiderew na tract, odino mangibasa na teksto. Lalon mamaliket iya ed sikara tan nawalaan ira na talek ed abilidad dan manginabang ed mensahe na Panarian. Legan ya ombabaleg ira, say pibibiang da ed ministeryo so nepeg ya onlaknab. Kanian, tulongan iran onaligwas tan mannonot no antoray nayarin espiritual a kalat da.
5. Anto so nakakaukolan pian say sakey ya anak et onkualipika bilang agbautismadon manangipalapag?
5 Mitongtong ed saray mamatatken sano moriaen yon kualipikado lay ananak yo a magmaliw ya agbautismadon manangipalapag tan sano ibalikas da lay pilalek da a magmaliw ya ontan. Say pagmaliw dan manangipalapag so mangipaslep ed sikara a personal a responsabilidad dan idayew si Jehova. Lawas nonoten a say ugaw et agkaukolan a dakel lay amta to a singa saray bautismado lan wala la’d edad antis ya onkualipika. Kasin natatalosan na anak yo iray manunan bangat na Biblia? Kasin tutumboken to iray estandarte na Biblia nipaakar ed moral? Kasin pipilaleken toy mibiang ed ministeryo tan nibilang a sakey ed saray Tasi nen Jehova? No ontan, nayarin determinaen na saray mamatatken a sikatoy kualipikado bilang agbautismadon manangipalapag.—Nengnengen so Organisadon Manggawa na Linawa nen Jehova, p. 79-82.
6. Akin a makagunggona no ipasal na atateng so ananak da?
6 Mankaukolan na sagpot so pangibangat ed ananak a mangidayew ed si Jehova manlapud puso ra. Balet, anggapo lay nagkalalon mamaliket ed saray atateng nen say pakanengneng ed ananak dan onaaligwas ed espiritual. Say mas importante et napapaliket si Jehova sano itotongtong na ananak iray makapakelkelaw a kimey to.