Eskedyul na Pamilya—Kapapaway na Pamilya ed Lawak
1 Panliliketan nen Jehova a nanengneng iray angkekelag ni a mangidadayew ed ngaran to. (Sal. 148:12, 13) Sanen wadiad dalin si Jesus, anggan ‘saray ugugaw tan mansoso so angigalgalang’ ed Dios. (Mat. 21:15, 16) Ontan met so nagagawa natan. Sikayoran atateng, panon yon natulongan iray anak yo a magmaliw a maseseg a managdayew nen Jehova diad Kristianon ministeryo? Lamet, singa nidanet la’d artikulon walad tagey nipaakar ed saray pantitipon na kongregasyon, importante so ehemplo yo. Oniay inkuan na sakey ya ama diad biang na maslak ya atateng: “Mas onkiwas iray anak ed ehemplom nen say ibabagam!”
2 Oniay nanonotan na sakey ya agin bii a pinabaleg na matakot ed Dios ya atateng: “Anggapo tay imbangon mi ed kabuasan na Sabado a tepeten mi ni no kasin onla kamin manpulong. Amta mi lan onla kami.” Mipadpara, nipurek yo ed ananak yo so kaimportantian na panagpulong a kimey no mapekder yon tumboken so sinimban rotina parad kapapaway na pamilya yo. Diad ontan et aglabat makaaral iray anak diad pakaiimaton da ed sikayo noagta naimano yo met so awawey, kakikiwas, tan iyaaligwas na saray dunong da.
3 Progresibon Panangipasal: Pian napanggayagaan na ananak so ministeryo, kaukolan ya akaparaan ira pian epektibo iran makapibiang. Inkuan met na samay agin bii ya abitla niman: “Agkami miluyos-luyos labat pian ibaan iray ateng mi ed kimey da. Amta min walay betang mi, anggano sikami so man-doorbell labat tan mangitilak na handbill. Diad panpaparaan min maong sakbay na kada sampot-simban aktibidades mi, amta mi lay ibaga mi.” Nitarya yo so ontan met a panangipasal ed ananak yo diad pangusar na pigaran minuto kada simba pian iparaan ira ed ministeryo, balanglan diad panagaral na pamilya odino diad arum a pankanawnawa.
4 Sano saniiba kayon manpupulong bilang pamilya, nawalaan kayo na kaaruman a pankanawnawa ya ipurek so katuaan ed ananak yo. Itatagar na sakey ya ama so anak ton bii sano akaren toy samploran kilometro a paarap ed ontumbok a patar pian mangibunog na tracts ed saray manaayam ditan. “Diad saratan ya impan-aakar mi a nipurek nen tatay ko so katuaan ed pusok,” so maliket a nanonotan to. (Deu. 6:7) Nabendisyonan kayo met komon diad pangiyeskedyul na pamilya yo ed sinimban kapapaway ed lawak.