Ipasabi so Maong a Balita ed Dakel nin Totoo Anggad Posible
1. Anto so ginawa na saray akadkaunan Kristiano pian nipasabi so maong a balita ed dakel nin totoo anggad posible?
1 Saray inmunan papatumbok nen Jesus so nambanikel a mangiwakawak ed mensahe na Panarian. Angusar ira na praktikal iran paraan pian nipasabi so maong a balita ed dakel nin totoo anggad posible. Sanen inkurit na saray Kristianon managsulat na Biblia iray impuyan a salita, angusar iray natalosan na karaklan a salitan Griego, a satan so internasyonal a lenguahe na Empiryo na Roma ed saman. Niarum ni, maseguron saray maseseg a managpulong nen komadua tan komatlon siglo K.P. a manpatuloy so akaunan angusar na codex, a mas mainomay ya usaren ed pananap na reperensya nen say lukot.
2, 3. (a) Panon so kasusumpal na Isaias 60:16 ed modernon panaon? (b) Panon ya uusaren so modernon teknolohiya pian napalaknab so puron panagdayew?
2 Panguusar ed Teknolohiya: Oniay impasakbay nen Jehova panamegley nen propeta Isaias: “Supsopen mo naani so gatas na saray nasyon.” (Isa. 60:16) Diad modernon agew a kasumpalan na sayan propesiya, saray lingkor nen Jehova so manguusar ed makanan kaykayamanan na saray nasyon pian palaknaben so panagpulong a kimey. Alimbawa nen 1914, abayag ni antis a nagmaliw a maksil a negosyo so panagpalabas ed sine, saray Estudyante na Biblia so nampalabas na “Photo-Drama of Creation.” Sayan waloy-oras a palabas tan panangipresenta na slide a kompleto ed kolor tan tanol, so mabiskeg ya akapantasi ed minilyon.
3 Natan, saray totoo na Dios so manguusar ed maples iran panag-imprintaan tan de-kompyuter iran kagawaan pian nipalapag so Biblia tan saray literatura ed Biblia ed nilasus a lenguahe. Saray maples a paraan na panagpatulor so makapangibubunog na saray literatura ed Biblia ed ararawin parte na dalin, a napasasabian iray totoo ed 235 a nasyon. Panamegley na espiritu nen Jehova, pinakiwas to iray lingkor to a mangusar ed sarayan teknolohiya ed praktikal a paraan, diad ontan et nitatarya so katuaan ed Biblia ed nagkalalo nin dakel a totoo nen say kapiganman ed awaran.
4. Antoray ginawa na pigara a panangiyarunsa ed kabibilay da pian nipasabi so maong a balita ed dakel nin totoo?
4 Personal Iran Panangiyarunsa: Saray tuan managdayew so apakiwas met a manggawa na saray personal a panangiyarunsa pian nipasabi so maong a balita ed dakel nin totoo. Dakel lay amasimpli ed kabibilay da pian makapibiang nin nagkalalo ed panagpulong a kimey. Walaray inmalis ed lugar a babaleg so pankaukolan parad saray manangiyabawag na Panarian. Pinalaknab met na arum so ministeryo ra diad impanaral na duman lenguahe.
5, 6. Anto so nayarin gawaen pian nakatongtong so dakel nin totoo ed lokal a teritorya anggad posible?
5 Niarum ni, nipasabi tayo so maong balita ed dakel nin totoo diad pampulong kapiganman a walad kaabungan iray totoo tan ed inerman a pakaromogan ed sikara. No mabetbet lan anggapo’d kaabungan iray totoo ed teritorya yo sano agew, nayarian yo kasin umanen so eskedyul yo pian manpulong sano mansirunget la? Wala kasi iray publikon pasen a napanpulongan? Asali yo ta lay nampulong panamegley na telepono odino diad pasen na negosyo? Kasin gagawaen yoy polaing a makapantasi ed impormal a paraan?
6 Agaylan apribilehyoan itayo a makapibiang ed engranden panagtasi nipaakar ed ngaran nen Jehova tan ed Panarian to! Komon ta itultuloy tayon inabang so manangiter-bilay a katuaan manlapud Salitay Dios ed dakel nin totoo anggad posible.—Mat. 28:19, 20.