‘Gawa Yo ya Amin Nisengeg ed Ebanghelyo’

1. Anto so mabulos a gawaen na sakey a manangipulong na Panarian, tan akin?

¹ Minoria nen apostol Pablo ya obligasyon ton ipulong so maong a balita. (1 Cor. 9:16, 19, 23) Mipadpara, say panangiyansakit tayo’d magnayon a pankaabigan na totoo so mamakiwas ed sikatayo a gawaen so anggaay nayarian tayo pian ninabang so maong a balita ed sikara.

2. Antoran pananguman so mabulos tayon gawaen diad panagpulong tayo, tan akin?

² Manpulong Inerman tan Kapiganman a Naromog Iray Totoo: Say sakey a maong a sumisigay et ipelag toy iket to, aliwan diad pasen tan panaon a kombeniente ed sikato, noagta inerman tan kapiganman a sikatoy makaala na mas dakel a sira. Ontan itayo met. Bilang “sumisigay na totoo,” ompan kaukolan tayon umanen so eskedyul tayo pian naromog tayo iray totoo ed teritorya, diad ontan et mas nalikna tayoy inkapnek ed sayan nikabkabiig a kimey a nikompara ed panagtipon na amin a klase na sira. (Mat. 4:19; 13:47) Sarag tayo kasi manpulong sano mansirunget la pian nasabi tayo iray totoo ed abung da, odino man-street witnessing diad masakbay iran oras ed kabuasan? Say kalat nen Pablo et say ‘sigpot a pangipulong ed maong a balita,’ tan inanamot to so kada matukoy a pankanawnawa pian nagawaan itan.​—Gawa 17:17; 20:20, 24, NW.

3, 4. Legan tayon manpupulong, panon tayon nitukoy so presentasyon tayo, tan antoray resulta no ontan so gawaen tayo?

³ Itukoy-tukoy so Presentasyon Yo: Mabetbet ya uumanen na saray sumisigay iray metodo ra pian makaala iray partikular a klase na sira. Panon tayon nipasabi so maong a balita na Panarian diad paraan a nasagyat so totoo ed teritorya tayo? Nepeg a mataktika tayon itongtong iray bengatlan kaslakan a pampapagaan na totoo, insan ondengel a maong sano ibalikas day opinyon da. (Sant. 1:19) Nayari tayon mangusar na tepet a managyat ed sikaran mangibesngaw na panmoria ra. (Uli. 20:5) Insan tayo la’d satan nitukoy so presentasyon tayo, unong ed talagan pankaukolan da, diad ontan et natenyeg ira. Si Pablo et nagmaliw ya “ami ganagana ed amin day totoo.” (1 Cor. 9:22) On, kaukolan so pangitukoy-tukoy ed presentasyon pian nasabi tayoy puso na totoo.

⁴ Talagan makapaliket so pangipasabi ed totoo na “maong a balita na kaabigan”! (Isa. 52:7) Komon ta ‘gawaen tayo so amin a bengatla nisengeg ed ebanghelyo’ pian ninabang itan ed sankarakelan lan bilang na totoo a posible.​—1 Cor. 9:23.