Kasin Nitukoy Yoy Eskedyul Yo?

1. Akin a nepeg tayon itukoy so eskedyul tayo ed panagpulong?

¹ Bilang tuan Kristianos, inawat tayo la so imbitasyon a magmaliw a “sumisigay na totoo.” (Mat. 4:19) Singa saray literal a sumisigay, maseguron magmaong so resulta na kimey a panagsigay ed totoo no iyeskedyul tayoy manpulong diad oras a nasabi ed abung iray totoo. Diad ngarem tan pansirunget, dakel a totoo so wala la’d abung. Mabetbet, sikaray mas relaks tan baleg so tendensian mangawat ira na saray bisita. Kasin nitukoy yoy eskedyul yo pian manpulong ed ontan iran oras?​—1 Cor. 9:23.

2. Antoray pigaran paraan a nipasabi tayo so maong a balita ed mas dakel a totoo?

² Panagtasi ed Labi: Say masakbay a panagplano pian manpulong legan na saray oras ed labi so nayarin ontulong ed sikatayon nipasabi so maong a balita ed dakel a totoo. (Uli. 21:5) Nayarin sarag na saray kalangweran so manpulong kasempet da manlapud eskuelaan. Arum so nayarin makapanggawa ed satan kayari na trabaho. Arum a grupo na panagaral na libro so makapangiyuksoy a manpulong na sakey oras antis na sinimban panagaral.

3. Diad antoran dalan a makapanpulong kayo legan na ngarem tan pansirunget diad teritorya yo?

³ Say panagpulong ed kabkaabungan ed ngarem tan pansirunget so nayarin manresulta ed pakapitongtong ed saramay kaslakan ya anggapo ed abung. Diad dakel a teritorya, say panagtasi ed karsada tan arum niran nengneng na pampublikon panagtasi so nagawaan met ed labi. Tan dakel so makakaimano a labi so sankaabigan a panaon pian ompawil tan mangigapo na saray panangiyaral na Biblia.

4. Akin ya importantin ipatnag so inka-makatebek tan inkamakonsidera sano mibibiang ed panagtasi ed labi?

⁴ Nakaukolan so Pakatebek: Nakaukolan so pakatebek sano mibibiang ed panagtasi ed labi. Kaslakan et sankaabigan so pampulong la no mansirunget ni, imbes ya ondalaw sano saray unabung et nayarin manpaparaan lan onugip. (Fil. 4:5) Sano ontoktok kayo ed puerta, onalagey ed pasen a nanengneng kayo tan malinew ya ipakabat so inkasikayo. Tampol yon ibaga so pegdat yo. No agmatukoy so oras na indalaw yo, a singa sano mamangan so pamilya, ibagan ondalaw kayo la ed arum a panaon. Lawas magmaliw a makonsidera​—Mat. 7:12.

5. Panon tayon napaliisan iray posiblin kapeligroan legan a manpupulong?

⁵ Kaukolan tayo met so magmaliw a maalwar ed saray posiblin kapeligroan. No mantatasi kayo et mansirunget odino ambilunget la, maabig no walay iba yo odino grupo kayo. Manakar diad maliwawa iran karsada a sankanengneng kayo. Mantasi labat ed saray pasen a moriaen yon liktar kayo. Paliisan iray lugar ya aliwan liktar sano ambilunget la.​—Uli. 22:3.

6. Antoray arum a gunggona na panagtasi ed ngarem tan ed pansirunget?

⁶ Say panagtasi ed ngarem tan pansirunget so nayarin mangiter ed sikatayo na pankanawnawa a makapikimey ed saray auxiliary tan regular payunir. (Roma 1:12) Kasin nitukoy yoy eskedyul yo pian mibiang ed onian nengneng na serbisyo?