Kasin Makapibiang Kad Panagpulong ed Labi?
1. Unong ed sakey ya iskolar, kapigan so pampupulong nen Pablo ed kaabungan?
1 Unong ed libron Daily Life in Bible Times, si apostol Pablo et mibibiang ed panagpulong ed kaabungan “manlapud alas 4 ed ngarem ya anggad lablabi la.” Agtayo amta no kasin satan so eksakton eskedyul nen Pablo, balet amta tayon sikatoy maliket ya ‘gawaen so amin a bengatla nisengeg ed maong a balita.’ (1 Cor. 9:19-23) Kaiba lad satan so pangi-adjust ed saray kimey to pian makapampulong ed kaabungan diad oras ya mas dakel so nakatongtong.
2. Akin ya maabig a panaon so labi pian manpulong?
2 Diad dakel a lugar, apasalan la na saray manangipalapag so mankabkaabungan ed kabuasan. Balet diad lugar yo, kasin siansia nin satan so sankaabigan ya oras na pampulong? Oniay inkuan na sakey a payunir nipaakar ed teritorya to: “Mataltalag so walad abung no agew. Balet maslak a totoo et walad abung no labi.” Say pampulong ed labi et nayarin sankaabigan a pankanawnawan nipasabi so maong a balita, lalo lad saray lalaki. Kaslakan et mas relaks iray householder tan labay day mitongtong. No epektibo itan, nepeg ya mangiyuksoy iray elder na pantitipon parad lawak na kimeyan diad labi.
3. Panon tayon nipatnag so pakatebek no manpupulong ed labi?
3 Usarey Pakatebek: No manpupulong ed labi, importante so pakatebek. Singa bilang, no nibanan aliwan kombeniented sakey a too so mitongtong, ompan mamangdem, mas maabig no ibagan ompawil ka la nagunoyan. No ambilunget, onlad maliwawa ya sankanengneng ka na householder, tan manpakabat tan ibagan tampol so gagalam. Makabat met so pampulong a sanderwa tan ag-onaarawid grupo, tan mansiansiad saray karsadan wala ray silew. Agla masyadon manpapalabi ta ompan naisturbo iray householder ya onugip la. (2 Cor. 6:3) No delikadoy sakey a lugar no labi, manpulong ditan no medyo maliwawa ni.—Uli. 22:3.
4. Anto ray bendisyon no manpulong ed labi?
4 Saray Bendisyon: Mas makapalikliket so ministeryo tayo no wala ray nakatongtong tayo. Tan no mas dakel so nakatongtong tayo, mas dakel so pankanawnawa tayon natulongan so arum a ‘nilaban tan nawalaan na suston pikakabat ed katuaan.’ (1 Tim. 2:3, 4) Kasin sarag mon i-adjust so eskedyul mo pian makapibiang kad panagpulong ed labi?