Panagpulong ed Kabkaabungan
1. Anto so onlesan tepet nipaakar ed panagkabkaabungan a ministeryo, tan akin?
1 “Onabobon iramay eksperiensyado ed nanduruman paraan na panangikayat ed Katuaan a say panagpulong ed kabkaabungan a tarok so MILLENNIAL DAWN so sankaepektiboan a paraan na panangipulong ed Katuaan diad kaplesan.” Sayan balikas ya inaon ed Hulyo 1, 1893, a paway na Zion’s Watch Tower so angipabitar ed kaimportantian na panagkabkaabungan a ministeryo. Momoriaen itan na totoo diad interon mundo bilang say nikaduman pakabidbiran na saray Tasi nen Jehova. Kasin epektibo ni iyan paraan, lapud lalon oniirap so pakasabi ed totoo diad ayaman da ed arum iran bansa?
2. Anto so Makasulatan a basiyan na panagpulong ed kabkaabungan?
2 Makasulatan tan Importante: Say panagpulong ed kabkaabungan et walaan na Makasulatan a basiyan. Binilin nen Jesus so 70 a babangatan to a sanderwa ira ya onla ed kaabungan na totoo. (Lucas 10:5-7) Kayarin tuloy na impatey nen Jesus, oniay ibabaga na Biblia nipaakar ed saray babangatan to: “Inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.” (Gawa 5:42) Si apostol Pablo so maseseg met a nambangat ed kabkaabungan.—Gawa 20:20.
3. Anto so pigaran bentaha na panagpulong ed kabkaabungan?
3 Say pampulong ed kabkaabungan et siansia nin importantin paraan ed panangikayat na maong a balita natan. Satan so ontulong ed sikatayo ya “anapen” iray makanepegan diad sistematiko tan mauksoy a paraan. (Mat. 10:11) Mas relaks iray totoo no wala ira ed ayaman da. Say personal a pitongtong ed sikara—pakadngel ed boses da, pakanengneng ed itsura na lupa ra, tan pakaobserba ed kaliberliber da—so mangiyabuloy ed sikatayo pian natebek iray paniinteresan tan pampapagaan da. Satan so kaslakan a mangiiter ed sikatayo na sankaabigan a pankanawnawa pian naparukey tayo so pitongtong tayo.
4. Panon tayon nagawa a mas mabunga so panagpulong ed kabkaabungan?
4 Manggawa na Personal Iran Pananguman: Mabulos si apostol Pablo a nanggawa na personal iran pananguman “nisengeg ed ebanghelyo.” (1 Cor. 9:23) Nayarin niyadapta tayo so eskedyul tayo pian napulongan so dakel nin totoo a nayarin walad abung, a singa diad ngarem, diad sampot-simba, odino diad saray agew na piesta-opisyal. Isulat iray andi-ed-abung, tan bisitaen lamet ira ed arum ya agew ed simba odino diad arum ya oras ed agew.
5. Panon a nayarin itagar iramay walaan na problema ed bunigas diad panagkabkaabungan a kimey?
5 Anggan saramay walaan na problema ed bunigas so nayarin makapibiang ed panagpulong ed kabkaabungan. Nayarin itagar tayo ira ed saray kaabungan ya asingger ed sikara, ta pian ag-ira nairapan a manakar no manpulong ira. Lapud magangganon nakesawan so sakey ya agin bii, sikato so makapitongtong labat ed sakey ya abung ed loob na kada kapalduay oras. Ingen ta agaylay liket tan inkapnek so alikna to kayari na impakapiulop to ed grupo!
6. Akin a say panagpulong ed kabkaabungan et nepeg tayon gawaen a regular a kabiangan na ministeryo tayo?
6 Dakel nin kinmarnero so naroromog diad kabkaabungan. Walay sakey a manangipalapag a tinmoktok ed puerta tan oniay imbaga ed sikato: “Loob ka. Amtak no siopa ka. Abayag ak lan manpipikasi ed Dios a mangibaki na sakey ya ontulong ed siak, insan nadngel ko so intoktok mo ed puerta. Siak so dinengel na Dios kanian imbaki to ka.” Ipapabitar na saray resulta a bebendisyonan nen Jehova iyan paraan na panagpulong. (Mat. 11:19) Magmaliw a determinadon gawaen a regular a kabiangan na ministeryo yo so panagpulong ed kabkaabungan.