Anamot Yo so Kada Pankanawnawa ed Ministeryo
Nen 2014 service year, walay 1,945,487,604 oras ya inusar na Saray Tasi nen Jehova diad ministeryo—malinlinew iyan ebidensya ya determinado tayon mansiansian aktibo ed panaglingkor ed si Jehova! (Sal. 110:3; 1 Cor. 15:58) Lapud “apatikeyan lay akeran panaon,” sarag tayo kasin usaren so panaon tayo ed ministeryo pian mas dakel so nakatongtong tayo?—1 Cor. 7:29.
Importantin amta tayoy man-adjust pian nausar tayon maong so panaon tayo. Singa bilang, no naynay kayon manpupulong na sakey oras o onsulok ni ed sakey a klase na ministeryo balet ta ngalngali anggapoy nakakatongtong yo, sarag yo kasi man-adjust pian mas dakel so nakatongtong yo? Siempre, nandurumay kada teritorya. Balet, makatulong iray suhestion ed leksab pian aliwan singa “pamoponiti ed dagem” so pangusar tayod mabmablin panaon tayo.—1 Cor. 9:26.
Panagpulong ed Kaabungan: Pigaran dekada ya apasal tayo lan igapoy ministeryo tayo diad pampulong ed kaabungan. Balet maslak ya totoo natan et walad trabaho odino agda tayo naarap no agew. Anto kasi no manpulong tayod kaabungan no ngarem la odino mansirunget, no wala lad abung tan aliwa lan busy iray totoo? Ompan say pampulong ed publikon lugar tan ed pasen na negosyo so mas mabunga ed kabuasan.
Panagpulong ed Publiko: Kaukolan ya ipuesto iray lamisaan, cart, odino literature stand ed matoo iran pasen diad teritorya na kongregasyon. (Nengnengen so Hulyo 2013 ya Ministeryo Tayo ed Panarian, p. 5.) No agla matoo so pasen ya pue-puestoan, maabig no mandesisyon so Komite na Kongregasyon Parad Serbisyo ya iyalis itan ed sananey a pasen ya mas dakel so ondadalan.
Panagpawil tan Panangiyaral na Biblia: Sarag to kasin iyeskedyul so pan-RV tan pangiyaral diad oras ya aliwan mabunga so arum ya klase na ministeryo? Singa bilang, no dakel so napulongan tayod kaabungan no Sabadoy kabuasan, nayari kasin diad ngarem odino labi lay iyeskedyul tayon mangiyaral? No man-RV, sarag to kasin iyeskedyul ya pawilen ed parehon agew iramay interesado ya say abung da et nanasinggeran, pian mas dakel so nagawaan ed ministeryo?
Tua, maliket tayo ta walay naireport tayon oras kada manpulong tayo, balet mas makapaliket no mabungay ministeryo tayo. No naiimanom ya agla epektibo so sakey a klase na ministeryo diad oras ya panggagawam ed satan, salim so sananey a klase. Ipikasim ed si Jehova, say “Katawan na panag-ani,” ya tulongan to kan nausar a maong so panaon mo pian naanamot moy kada pankanawnawa ed ministeryo!—Mat. 9:38.