Pantasin Andi-Salita
1 Anggaman agmansasalita, amayamay so nipaparungtal na pisikal a palsa nen Jehova nipaakar ed saray agnanengneng a kalidad to. (Sal. 19:1-3; Roma 1:20) Mipadpara, say maabig a kondukta, Kristianon kalidades, tan masimpit ya itsura tayo so makapantatasin andi-salita. (1 Ped. 2:12; 3:1-4) Nepeg a pilaleken na balang sakey ed sikatayo a ‘parakepen so bangat na Dios a Manangilaban tayo dia ed amin [a bengabengatla]’ panamegley na kondukta tayo.—Tito 2:10.
2 Panon a posible parad saray ag-ayadyarin totoo a naparakep da iray bangat na Biblia? Posible labat iya panamegley na panangiwanwan na Salitay Dios tan pakayari na masanton espiritu. (Sal. 119:105; 143:10) Say salita na Dios et “mabilay tan mabiskeg, tan makdem nen say anggan dinan a kampilan a duaray tarem.” (Heb. 4:12) Ontatalos itan ed akindalem tayo tan moldien na satan ed sikatayo so balon personalidad. (Col. 3:9, 10) Say masanton espiritu so mamawala ed sikatayo na kalkaliktan iran kalidad, a singa say kamaongan, kaabigan, inkaumildi, tan dangka. (Gal. 5:22, 23) Kasin aabuloyan na balang sakey ed sikatayo so salita tan espiritu na Dios a mangimpluensya ed kabibilay tayo?—Efe. 4:30; 1 Tes. 2:13.
3 Naiimano na Arum: No manbibilay itayo unong ed saray estandarte nen Jehova tan panggugunaetan tayon ipatnag iray kalidad to, naimano itan na arum. Bilang alimbawa, sakey a laki so babalaw-balawen na saray katrabahoan to lapud sikatoy pandak. Ingen, say agi tayon bii a kaopisina to met so lawas mantratrato ed sikato tekep na dignidad tan respeto. Satan so amakiwas ed laki a mantepet no akin a say agi tayo et duma. Impaliwawa na agi a say marespeton kondukta to et resulta na pangiyaaplika to ed saray prinsipyo na Biblia. Innabang to met ed laki so alay abig ya ilalo ed Panarian. Nanaral na Biblia so laki tan diad kaunoran et inmaligwas ya anggad nampabautismo. Kapawil to ed binalegan ton dalin, mandinayew iray kakanayon to ed maabig a kondukta to, tan pigara ed sikara so angawat met ed katuaan.
4 Diad trabaho, eskuelaan, odino diad pidedeneng tayo ed saray kakanayon tan kakaabay tayo, nasagyat tayoy arum a mangigloria ed Dios panamegley na maong a kondukta tekep na panagtasi tayo.—Mat. 5:16.