Manpapabiskegan
1 Ginawa nen apostol Pablo so anggaay nayarian to pian pabiskegen iray kapananisiaan to. (2 Cor. 11:28, 29) Ontan met, mapaga itayo no nipapaarap iray agagi tayo ed mairap iran situasyon, tan labay tayo iran tulongan. Ipapabitar na Biblia ya amin, aliwan saray mamatatken labat, so nepeg ya interesado ed arum. (Roma 15:1, 2) Nonoten pa so duaran paraan a naunor tayo so maaron bilin: “Manbibilinan so sakey tan sakey, tan manpapaalageyan so sakey tan sakey.”—1 Tes. 5:11.
2 Tebeken Iray Pankaukolan na Arum: Kuan na Biblia a si Dorcas so ‘nanggawa na kamaongan tan tinmulong ed saray mairap bilay.’ (Gawa 9:36, 39, Maung a Balita) Inimano to iramay mankaukolan tan ginawa toy anggaay nayarian to pian tulongan ira. Agaylan maabig ya ehemplo so impanengneng to ed sikatayo! Nayarin naamtaan yo a mankaukolan na luganan so sakey a maedad la pian miaral. Odino nayarin walay payunir ya anggapoy kaulop to ed lawak na serbisyo ed ngarem na ordinaryon agew. No natebek yon mankaukolan na tulong so sakey tan mangiter kayo na praktikal a tulong, isipen pa so pakapaseseg to.
3 Pantotongtong Nipaakar ed Espiritual: Napabiskeg tayo met so arum panamegley na panagsalita tayo. (Efe. 4:29) Inkuan na sakey ya eksperiensyadon matatken: “No labay yoy magmaliw a makapaseseg, itongtong iray espiritual a bengatla. Pian igapo so makapabiskeg a tongtongan, nayarin mangusar kayo na simplin tepet a singa say, ‘Panon mon naamtaan so katuaan?’” Ipanengneng so masimoon ya interes ed saray kalangweran ed kongregasyon. Ipatnag so interes ed saramay adismaya tan ed saramay mabaing. (Uli. 12:25) Ag-aabuloyan so panligliwaan na mundo a manamsam ed panaon parad espiritual iran pantotongtong kaiba iray kapananisiaan.—Roma 1:11, 12.
4 Anto balet so nayari yon ibaga pian napabiskeg so arum? Diad personal a panagbasa tan panagaral yo na Biblia, kasin akaromog kayo ed agano ni na sakey a prinsipyo ya amaaralem ed apresasyon yo ed si Jehova? Kasin apaseseg kayo ed nadngel yo ed publikon paliwawa odino ed Panagaral na Panag-Bantayan? Odino kasin atenyeg so puso yo ed makapabiskeg na pananisian eksperiensya? No pablien tayo iratan ya espiritual iran kayamanan, lawas itayon nawalaan na bengatlan makapaseseg ya inabang ed arum.—Uli. 2:1; Luc. 6:45.
5 Diad pangiyopresi na praktikal a tulong tan makabat a pangusar ed dila tayo, komon ta itultuloy tayoy manpapabiskegan.—Uli. 12:18.