Manpapasesegan Legan a Walad Ministeryo
1 Aapresyaen tayon amin so pakaawat na makapaseseg a “salita a makana so kisalita to.” (Uli. 25:11) Sano mikikimey itayo ed ministeryo, panon tayon naseguro a say tongtongan tayo et makapaseseg ed arum?
2 Makapaseseg a Pantotongtong: Agaylan makapaseseg ed saray agagi tayo so pangitongtong na espiritual iran bengatla legan a manpupulong! (Sal. 37:30) Nayari tayon pantongtongan so presentasyon tayo odino mangistorya na makapaseseg iran naeksperiensya tayo ed lawak na serbisyo ed agano ni. (Gawa 15:3) Kasin makala tayo na makapainteres a punto manlapud personal a panagbasa tayo na Biblia, ed agano ni iran magasin, odino diad pantitipon ed kongregasyon? Nayarin singbaten tayo iray punto a nipresenta ed publikon paliwawa a nadngel tayo ed agano ni diad Kingdom Hall.
3 Sano walay unabung ya onsuppiat, nayarin nadismaya itayo no agtayo naebatan. Kaalis yo ed puerta, makagunggonan pantongtongan yon dua ed pigaran minuto no panon ya ebatan so ontan a situasyon ed ontumbok, a nayarin konsultaen yo so libron Reasoning. Tan no walay naapresya tayo ed presentasyon na kaiba tayo, say masimoon a komendasyon so mamaseseg ed sikato.
4 Unona lan Onkiwas: Wala ta ed kagrupo yo ed panagaral na libro so agyo ni akaiban nampulong ed agano ni? Say pangibaga ed sikato a miulop ed sikatayo ed panagpulong et manresulta ed ‘pakaligliwa ed balang sakey.’ (Roma 1:12) Saray regular tan auxiliary payunir so misalsalamat a makapiulop ed arum, nagkalalo la ed masakbay nin kabuasan odino ed ngarem la, sano daiset a manangipalapag so onlan manpulong. Natulongan tayo iray payunir diad piulop tayo ed sikara ed ministeryo. Wala tay manangipalapag a maletey so bunigas to kanian limitado so nagagawaan to ed ministeryo? Say pangiyuksoy a piulop to ed sikatayo, nayarin diad panangiyaral na Biblia, so makagunggona ed sakey tan sakey.—Uli. 27:17.
5 Say komendasyon tan balikas na apresasyon et naynay a makapaseseg, anggan diad angkelag iran bengatla. Lawas tayon nonoten itan sano mikikimey ed arum diad ministeryo, lapud labay tayon “manpapaalageyan so sakey tan sakey.”—1 Tes. 5:11.