Tulongan so Arum a Magmaliw a ‘Matulok Manlapud Puso’
1. Anto so kakaukolanen nen Jehova ed saray managdayew to?
1 Makanakana so katutulok pian naabobonan so panagdayew tayo ed si Jehova. (Deu. 12:28; 1 Ped. 1:14-16) Magano lan onsabi so panangukom na Dios ed “saray agmikabat ed [sikato] tan dia ed saray ag-ontulok ed ebanghelyo.” (2 Tes. 1:8) Panon tayon natulongan so arum pian ‘impapuso ran unoren’ iray bangat na Salitay Dios?—Roma 6:17.
2. Akin ya importante a tulongan so arum a nawalaan na mabiskeg a pananisia?
2 Diad Pamabiskeg ed Pananisia tan Aro: Diad Kasulatan, say katutulok et misiglaotan a maong ed pananisia. Tinukoy nen apostol Pablo so “ganggan na andi-anggaan a Dios [“pian nitangguyor so katutulok panamegley na pananisia,” NW].” (Roma 16:26) Sinaglawi na Hebreos kapitulo 11 so pigaran ehemplo ed pananisia, a dakel ed saratan so anaglawi ed inkiwas unong ed nibalikas a linawa nen Jehova. (Heb. 11:7, 8, 17) Diad biek a dapag, say ag-inkamatulok et insiglaot ed kaandian na pananisia. (Juan 3:36; Heb. 3:18, 19) Kaukolan tayon nabayuboan so dunong ed panangusar na Salitay Dios pian natulongan tayoy arum a mamayubo na pananisian manresulta ed katutulok.—2 Tim. 2:15; Sant. 2:14, 17.
3. (a) Panon a misiglaotan so aro ed katutulok? (b) Panon tayon natulongan iray iyaaralan na Biblia a mangaro ed si Jehova?
3 Nisiglaot met so katutulok ed aro ed Dios. (Deu. 5:10; 11:1, 22; 30:16) “Saya so aro na Dios,” so kuan na 1 Juan 5:3, “a sumpalen tayo so saray ganggan to: tan saray ganggan to aliwa ran pabelat.” Panon tayon tulongan iray iyaaralan na Biblia a mangaro ed si Jehova? Anamoten iray pankanawnawa legan na panagaral pian napaaralem so apresasyon to ed saray kalidad nen Jehova. Ibalikas yo met a mismo so aralem ya apresasyon yo ed Dios. Tulongan so iyaaralan a pannonotan toy pakawalaay personal a relasyon ed si Jehova. Sankaimportantian, say aro ed si Jehova so mamakiwas ed arum tan ed sikatayo ya impapuson ontulok ed sikato.—Mat. 22:37.
4. (a) Akin ya importante so ehemplo tayo? (b) Antoy nepeg tayon gawaen pian nabayuboan so “[matulok] a puso”?
4 Diad Ehemplo Tayo: Sakey ya epektibon tuloy a paraan a napaseseg tayoy arum ya ontulok ed maong a balita et diad ehemplo tayo. Balet, kaukolan so mantultuloy a pansagpot pian nawalaan itayo na “[matulok] a puso.” (1 Ara. 3:9; Uli. 4:23) Antoy lalanoren na saya? Taganoen so puso yo panamegley na regular a panaral na Biblia tan iyatendi ed saray pantitipon. (Sal. 1:1, 2; Heb. 10:24, 25) Piulopan iramay say kapusoan da et nikasakey ed tuan panagdayew. (Uli. 13:20) Mibiang a regular ed panagpulong, tekep na masimoon a pilalek a tulongan iray totoo ed teritorya yo. Ipikasi so tulong nen Jehova a mangiwanwan ed sikatayon nabayuboan so maabig a puso. (Sal. 86:11) Paliisan iray nayarin mangimpluensya ed puso yo a singa say imoral odino marawal iran panligliwaan. Panggunaetan iray bengatlan mamaapit ed sikayo ed Dios tan mamaelet na relasyon yo ed sikato.—Sant. 4:7, 8.
5. Panon a nabebendisyonan iray matulok?
5 Pinaseguroan nen Jehova iray totoo to nensaman a nabendisyonan ira no talinengen da so boses to. (Deu. 28:1, 2) Ontan met natan, daakan a bebendisyonan nen Jehova ‘iramay ontutulok ed sikato’ bilang manuley. (Gawa 5:32) Diad panagbangat tan ehemplo tayo sirin, tulongan tayo komon so arum a magmaliw a matulok manlapud puso.