Walaan Ka ta na “Matulok a Puso”?

SANEN nagmaliw ya ari na kadaanan ya Israel si Solomon, liknaen ton agkualipikado. Kanian kinmerew ed Dios na kakabatan tan pikakabat. (2 Awaran 1:10) Impikasi met nen Solomon: “Itdan mo so aripen mo sirin na makatalos [“matulok,” NW] a puso a mangukom na baley mo.” (1 Arari 3:9) No walaan si Solomon na “matulok a puso,” tumboken toray ganggan tan prinsipyos na Dios tan naeksperiensia toy panamendision nen Jehova.

Say matulok a puso et aliwan pabelat noagta lapuan na gayaga. Ta insulat nen apostol Juan: “Saya so aro na Dios, a sumpalen tayo so saray ganggan to; tan saray ganggan to aliwa ran ambelat.” (1 Juan 5:3) Maseguro, kaukolan tayon tuloken so Dios. Likud ni, si Jehova so Engranden Manamalsa tayo. Sikatoy akankien na dalin tan amin a wala ed satan, pati amin a pilak tan balitok. Kanian talagan anggapoy antokaman a niiter tayo ed Dios diad materyal a paraan, anggaman aabuloyan ton usaren tayoray kuarta tayo pian ibalikas tayoy panangaro tayo’d sikato. (1 Awaran 29:14) Iilaloan itayo nen Jehova a mangaro’d sikato tan sipapaabeban mikurang ed sikato, a gawaey linawa to.​—Miqueas 6:8.

Sanen tinepetan si Jesu-Kristo no dinan so sankabalgan a ganggan ed say Ganggan, inkuanto: “Aroen mo so Katawan a Dios mo ed masimoon a pusom, tan dia ed masimoon a kamarerwam, ta dia ed masimoon a nonot mo. Sikato’ya so baleg tan unonan ganggan.” (Mateo 22:36-38) Say sakey a paraan a nibalikas itan a panangaro et say itulok ed Dios. Kanian kaukolan ya ipikasi na balang sakey ed sikatayo ya ikdan itayo nen Jehova na matulok a puso.

Awalaan Ira na Matulok a Puso

Dakerakel so alimbawa ed Biblia na saramay walaan na matulok a puso. Singa bilang, binagaan nen Jehova ed si Noe a mangipaalagey na baleg a biong parad kipreserbay bilay. Saya so abalbaleg a kimey a kinaukolan toy manga 40 odino 50 taon. Anggano pantetekepen ya amin iray walan modernon nipapakurang a kagawaan tan arum ya uusaren, talagan sakey a kinaabig na saray inhinyiro so pangipaalagey na ontan a baleg ya istrakturan onletaw. Sakey ni, kaukolan nen Noe a pasakbayay totoo ya andi-duaruwan nanludlurey tan amalaw ed sikato. Balet ta sikatoy tinmulok anggad sankaunoran a detalye. Ibabaga na Biblia: “Ontan so ginawa to.” (Genesis 6:9, 22; 2 Pedro 2:5) Impanengneng nen Noe so panangaro to’d si Jehova diad matoor a katutulok ed loob na dakel a taon. Agaylan maabig ya alimbawa parad sikatayon amin!

Nonoten pa met si patriarkan Abraham. Imbaga na Dios ed sikato ya onalis manlapud maaligwas ya Ur na saray Caldeo a mamaarap ed ag-amtan dalin. Andi-suppiat a tinmulok si Abraham. (Hebreos 11:8) Diad nakekeraan ya impanbilay to et sikato tan say pamilya to so nanayam ed saray tolda. Kayari dakel a taon bilang sankaili ed saman a dalin, sikatoy benindisionan nen Jehova tan say matulok ya akulaw to, si Sara, na sakey ya anak a laki a manngaray Isaac. Agaylan inad-aro na man-edad na 100 ya Abraham so anak to ed inkamasiken to! Pigaran taon ed saginonor, kinerew nen Jehova ed si Abraham ya ibagat toy Isaac bilang popoolan ya apay. (Genesis 22:1, 2) Say pannonot labat ed satan et talagan ansakit la parad si Abraham. Anggaman kuan, sikatoy tinmulok lapud inaro toy Jehova tan walaan na pananisian say insipan a bini so onsabi’d panamegley nen Isaac, anggano sikatoy kaukolan nin paolien na Dios manlapud inaatey. (Hebreos 11:17-19) Balet, sanen pateyen la nen Abraham so anak to, sikatoy inamper nen Jehova tan inkuanto: “Natan amtak la a sika et tatakotan mo so Dios, ta sika et agmo inkibot ed siak so anak mo, say bogbogtong ya anak mo.” (Genesis 22:12) Lapud katutulok to, say matakot ed Dios ya Abraham so akabatan bilang “kaaro na Dios.”​—Santiago 2:23.

Si Jesu-Kristo so sankaabigan ya alimbawa tayo ed katutulok. Legan na sakbay-toon kiwawala to, nanliketan toy matulok a serbisyo to’d Ama to diad tawen. (Uliran 8:22-31) Bilang too, tinulok nen Jesus si Jehova ed amin a bengatla, a lawas malikeliket a manggaway linawa to. (Salmo 40:8; Hebreos 10:9) Kanian, talagan naibaga nen Jesus: “Anggapo so gawaen ko ed inkasiak, noag unong na imbangat na Ama ed siak, salitaen ko so sarayan bengatla. Et say angibaki dia ed siak wala ed siak; agto ak pinaulyan a manbukbukor; ta gawaen ko lawas so saray bengatla a makapaliket ed sikato.” (Juan 8:28, 29) Kaunoran, pian niyalangon so inkasoberano nen Jehova tan nadondon so matulok a katooan, sibubulos ya inter nen Jesus so bilay to, a dinmalan ed makapabaing a tuloy tan makapaot-ot ya ipapatey. On, “bangta aromog a singa nengneng na sakey a too, nanpaabeba a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].” (Filipos 2:8) Agaylan alimbawan pakapatnagay matulok a puso!

Agmagenap so Agkompleton Katutulok

Aliwan amin a mankuan a matulok ed Dios so talagan tinmulok la’d sikato. Nonoten pay Arin Saul na kadaanan ya Israel. Sikatoy binilin a sigpot ton deralen so amin a marelmeng ya Amalecitas. (1 Samuel 15:1-3) Anggaman dineral ira nen Saul bilang sakey a nasyon, agto pinatey so ari ra tan inliktar toy pigaran karnero tan bakbaka ra. Intepet nen Samuel: “Akin sirin ya agmo inunor so bosis nen Jehova?” Bilang ebat, inkuan nen Saul: “On, inunor ko so bosis nen Jehova . . . Say baley [na Israel] angala ed samsam, na saray karnero tan saray baka, say manunaan . . . , ya ibagat ed Jehova.” Diad pangidadanet na pankaukolay sigpot a katutulok, inyebat nen Samuel: “Walaan kasi si Jehova na baleg a liket dia ed bagbagat a poolan tan bagbagat, singa say panangunor ed bosis nen Jehova? Nia! Say panangunor sikato so magmaong nen say bagat, tan say pangimatlek, nen say taba na saray karnero a kalakian. Ta say yaalagey sikato so singa kasalanan na ibawanen, tan say inkapangetpanget sikato so singa panangigalang ed saray talintao tan dirios. Lapu ed pinaulyan mo so salita nen Jehova, sikato met pinaulyan to ka ed inka-arim.” (1 Samuel 15:17-23) Agaylan inkakondena nen Saul lapud andian na matulok a puso!

Anggan say makabat ya Arin Solomon, a nampikasi parad matulok a puso, so agnantultuloy a tinmulok ed si Jehova. Kontra’d madibinon linawa, sikatoy angasawa na dayon bibii ya angimpluensia’d pankasalanan to’d Dios. (Nehemias 13:23, 26) Abalang nen Solomon so madibinon pabor lapud agto intultuloy a nawalaay matulok a puso. Agaylan pasakbay iya ed sikatayo!

Agkabaliksan na saya a kakaukolanen nen Jehova so inkanaspot manlapud totoon ariripen to. Sikato et “nanodnonotan to a sapok itayo.” (Salmo 103:14) Amin tayo so seguradon nalingo no maminsan, balet naimano na Dios no kasin talagan walaan itayo na impapuson pilalek a mamaliket ed sikato. (2 Awaran 16:9) No mankasalanan itayo lapud atooan ya ag-inkayadyari balet ta magbabawi, makapiperdonaan itayo diad letnegan na dondon bagat nen Kristo, a matalek a si Jehova et ‘mamerdona naani ed daakan.’ (Isaias 55:7; 1 Juan 2:1, 2) Say tulong na saray maaron Kristianon mamatatken so nayarin kaukolan met ta pian onabig itayo ed espiritual tan nawalaan na mabunigas a pananisia tan matulok a puso.​—Tito 2:2; Santiago 5:13-15.

Panon Kakompletoy Katutulok Mo?

Bilang ariripen nen Jehova, maslak ed sikatayo so andi-duaruwan manliknan walaan itayo na matulok a puso. Nayarin irason tayo, Agta mibibiang ak ed panangipulong na Panarian? Agta ontatalindeg ak a malet sano onlesa iray manunan isyu nipaakar ed neutralidad? Tan agta regular ak ya onaatendi ed saray Kristianon miting, a singa impaseseg nen apostol Pablo? (Mateo 24:14; 28:19, 20; Juan 17:16; Hebreos 10:24, 25) Tua, saray totoo nen Jehova bilang intiraminti so mangipapatnag na impapuson katutulok ed ontan ya importantin pamaakaran.

Balet komusta met so kondukta tayo ed inagew-agew iran kurang, nayarin diad singa angkelag a pamaakaran? Inkuan nen Jesus: “Say matoor ed dagdaiset, matoor met ed dakel; et say agmatunong ed dagdaiset, aliwa met a matunong ed dakel.” (Lucas 16:10) Maabig sirin no tepetan na kada sakey ed sikatayo so inkasikato, Walaan ak ta na matulok a puso no nipaakar ed angkelag iran bengatla odino nipaakar ed arum a pamaakaran ya ag-anggan kabat na arum?

Impanengneng na salmista ya anggan diad loob na abung to, a sikatoy agnanenengneng na arum, sikatoy ‘nanakar a nagnap ed puso to.’ (Salmo 101:2) Legan a manyudyurong ka ed abung mo, nayarin lukasan moy telebisyon tan manbantay na pelikula. Ditan a mismo et nasubok lay katutulok mo. Nayarin ompatnag lan imoral so pelikula. Itultuloy mo ta’n bantayan, ya ikakatunongan ya onian klase la na pelikula so ipapalabas natan? Odino say matulok a pusom so mamakiwas ed sikan ontulok ed Makasulatan a simbawa, a ‘say lawan tan karumsisan agla komon nabitla ed sikayo’? (Efeso 5:3-5) Kasin erepen mo lay TV, anggano makapainteres so istorya? Odino kasin iyalis moy channel no marawal lay programa? ‘Si Jehova suboken to so matunong tan say bagel,’ so inkanta na salmista “tan saman so labalabay to so karamsakan gulaen na kamarerwa To.”​—Salmo 11:5.

Mangitatarok na Bendisiones so Matulok a Puso

Siempre, dakel iray aspekto ed bilay a makagunggunan usisaen tayo pian naamtaan no talagan impapuson tutuloken tayoy Dios. Say panangaro tayo’d si Jehova so kaukolan a mamakiwas ed sikatayon mamaliket ed sikato tan gawaen so ibabaga to’d sikatayo diad Salita to, say Biblia. Say matulok a puso so ontulong ed sikatayon namantini so maong a siglaotan ed si Jehova. On, no sigpot itayon matulok, ‘saray salita tayo, tan say dalepdep na puso tayo naako ra ed pakanengneng nen Jehova.’​—Salmo 19:14.

Lapud inaro itayo nen Jehova, babangatan to itayon ontulok parad dilin panmaongan tayo. Tan nagunggunaan tayon maong so inkasikatayo diad intiron-puson pangimano’d madibinon bangat. (Isaias 48:17, 18) Sirin, sililiket tayo komon ya awaten so tulong na mangatatawen ya Ama tayo a nitatarya panamegley na Salita to, say espiritu to, tan say organisasyon to. Sikatayoy nababangatan a maong a singa tayo narerengel so bosis ed benegan tayo a mankuan: “Saya so dalan. Ondalan kayo ed sikato, [sikayon totoo].” (Isaias 30:21) Legan a babangatan itayo nen Jehova diad panamegley na Biblia, Kristiano iran palapagan, tan saray miting ed kongregasyon, komon ta manimano itayo, iyaplikay naaralan tayo, tan magmaliw a ‘matulok ed ami bengatla.’​—2 Corinto 2:9.

Say matulok a puso et manresulta ed baleg a gayaga tan dakel a bendision. Mangitarok itan ed sikatayo na kareenan na nonot, lapud amta tayo a sikatayoy makapaliket a tuloy ed si Jehova a Dios tan paliliketen tayoy puso to. (Uliran 27:11) Magmaliw a proteksion ed sikatayo so puson matulok sano natutukso itayon manggaway mauges. Maseguro, sirin, a kaukolan tayon tulokey mangatatawen ya Ama tayo tan kaukolan ya ipikasi: “Itdan mo so aripen mo sirin na matulok a puso.”

[Picture Credit Line ed pahina 29]

Nanlapud say Self-Pronouncing Edition of the Holy Bibles, a lugan toy King James tan say Revised Edition