‘Naaralan nen Jesus so Katutulok’

Sipor lan matulok si Jesus ed si Jehova. (Juan 8:29) Akin balet et ibabaga na Biblia ya “naaralan toy katutulok lapud saray asagmak to”?—Heb. 5:8.

Nen wadiad dalin si Jesus, wala ray naeksperiensya to ya agto asali diad tawen. Tua, matoor iray atateng to ed si Jehova, pero aliwa ran perpekto. (Luc. 2:51) Sikatoy pinairap na saray lider na relihyon tan opisyal na gobierno. (Mat. 26:59; Mar. 15:15) Tan ansakisakit so impatey to! Ibabaga na Biblia ya “sikatoy nampaabeba tan nagmaliw a matulok anggad ipapatey.”—Fil. 2:8.

Lapud sarayan mairap ya dinadalan nen Jesus, naaralan toy ontulok ed si Jehova diad saray situasyon ya agton balot naeksperiensya diad tawen. Akatulong itan pian mas natalosan toy kipapasen tayo tan nagawaan toy betang to bilang perpekton Ari tan Atagey ya Saserdote. (Heb. 4:15; 5:9) Lalon naar-aro tan lalon nanmatalekan nen Jehova si Jesus nen naaralan toy ontulok lapud saray dinadalan to. Ontan tayo met. No mansiansia tayon matulok anggano ondadalan tayod subok, lalo itayon naar-aro nen Jehova tan magmaliw itayon mas mausar ed anggan anton asainmin ya iter to ed sikatayo.—Sant. 1:4.