No Anto so Nagagawaan na Ministeryo Tayo
1. Panon a momoriaen nen Jehova so ministeryo tayo, tan anto so reaksion na katooan?
1 Idedeskribe na Salitay Dios iray Kristiano bilang matalonan manmamartsa diad panaglingkor ed si Jehova, a singano wala ra ed parada’y impanalo. (2 Cor. 2:14-16) Legan tayon ipapaamta so kakabatan nipaakar ed Dios, saray bunga na bibil tayo et singa makapaliket ya insenso ed kinen Jehova. Walaray nasasagyat ed karakpan na mensahe na maong a balita; arum so mangipupulisay ed satan. Balet say negatibon reaksion na karaklan et agmankabaliksan ya agmatalona so kimey tayo. Nonoten pa no antoy nagagawaan na ministeryo tayo.
2. Anto so nipapatnag tayo lapu ed ministeryo?
2 Panangitandoro ed si Jehova: Isusuppiat nen Satanas a saray totoo so manlilingkor ed si Jehova lapud sinisiblet iran rason. (Job 1:9-11) Say Kristianon ministeryo so mangiiter ed sikatayo na pankanawnawa pian ipatnag a say debosyon tayo ed Dios et masimoon. Dakel a manangipalapag so mantutultuloy a manguunor ed ganggan a manpulong tan manggawa na saray babangatan anggaman ed mairap iran kipapasen da odino ed agpananginenen na kaslakan a totoo. Napapaliket so puso nen Jehova ed pansusungdo na saratan a matoor!—Uli. 27:11.
3. Akin ya ontan lan kaimportante ed sikatayo so pantultuloy a pangipaamta ed ngaran tan gagala na Dios?
3 Niarum ni, say ministeryo tayo so walaan na betang ed pakasusumpal na gagala na Dios. Nipaakar ed manasingger a kadederal na mundo nen Satanas, inkuan nen Jehova: “Saray nasyon naamtaan da naani a siak si Jehova.” (Eze. 39:7) Pian naamtaan iya na saray nasyon, kaukolan ya itultuloy ya iyabawag na saray lingkor na Dios so ngaran tan gagala to “diad balang nasyon tan poli tan salita tan baley.”—Apo. 14:6, 7.
4. Panon ya onkakanan basiyan na panangukom so panagpulong a kimey?
4 Basiyan na Panangukom: Say panangipulong ed maong a balita so onkakana met a basiyan na panangukom. Imbaga nen apostol Pablo a si Kristo Jesus so ombales ed “saray agmikabat ed Dios, tan dia ed saray ag-ontulok ed ebanghelyo na Katawan tayon Jesus.” (2 Tes. 1:8, 9) Naukom iray totoo base ed ikiwas da ed maong a balita. Peteg ya ambelat so responsabilidad na saray lingkor na Dios! Pian ag-itayo mankasalanan ed dala, nepeg ya agtayo ontutundan mangipaamta ed sayan manangisalbay bilay a mensahe na Panarian.—Gawa 20:26, 27.
5. Panon a nipapatnag so panangasi na Dios diad ministeryo tayo?
5 Say tuloy-tuloy a pansasagpot tayo pian tulongan iray kapara tayon totoo a makagamor na panangabobon na Dios et panangipatnag na panangasi nen Jehova. (1 Tim. 2:3, 4) Lapud amta tayon lawas manguuman so kabibilay na saray totoo, papawil-pawilen tan papasesegen tayo ira a mananap ed si Jehova legan a wala ni panaon. Diad panggawa ed satan, nipapatnag tayo so “matamoy a panangasi na Dios” ya “agto labay a wala so siopaman a natawtaw noag ingen amin komon nagegemtan da so panagsibkel.”—Luc. 1:78; 2 Ped. 3:9.
6. Panon a say pansiansian okupado ed panaglingkor ed si Jehova so mangunggona ed sikatayo?
6 Pakagunggonaan Tayon Mismo: Say pansiasiansia tayon okupado ed panaglingkor ed si Jehova et proteksion tayo. Saya so ontutulong ed sikatayo a mansiansian ‘sinononot ed isabi na agew nen Jehova’ tan agnamatikan na marelmeng a peles a sistema na bengabengatla. (2 Ped. 3:11-14, NW; Tito 2:11, 12) Kanian, komon ta ‘mansiansia itayon malet, agnagiing, a lawas padaaken so kimey na Katawan,’ ya amta tayon saray sagpot tayo ed Kristianon ministeryo et aliwan andian na kabaliksan.—1 Cor. 15:58.