Ipatnag so Personal ya Interes—Diad Pampulong ya Anggapoy Pipilien
1 Diad pasingawey ed si apostol Juan, anengneng to so sakey ya anghel a mantektekkiab ed pegley na katawenan, a mangiyaabawag ed andi-anggaan a maong a balita ed totoo na “balang nasyon tan poli tan salita tan baley.” (Apo. 14:6) Kasin tutumboken tayo so pangidadaulo na anghel diad pampulong ya anggapoy pipilien? Agtayo naam-amtaan et nayarin nawalaan itayo na panmoria a walay panaglabi odino panangidumaduma. Say awawey tayo ed totoon nakakatongtong tayo so makaapekto ed paraan na pangipaparungtal tayo na maong a balita ed sikara. Kanian, nakaukolan tayon ipatnag so puro tan maaron panangiyansakit sano pupulongan tayo iray totoon duma so kipapasen da.
2 Nonoten so Teritorya Yo: Walara kasi so imigrante odino refugee a manaayam ed teritorya yo? Nayarin mainomay iratan a nibaliwala. Anapen ira, tan panggunaetan a kabaten iran maong. Antoray pankaukolan tan pampapagaan da, saray labay tan agda labay, saray tatakotan da tan nalilikna ran panangidumaduma? Panggunaetan yon itukoy ed saratan so pangipresenta yo ed mensahe na Panarian. (1 Cor. 9:19-23) Singa si apostol Pablo, nepeg a nalikna tayo so obligasyon ya inabang so maong a balita ed amin a walad teritorya tayo, pati ed saramay nanlapud arum a bansa, saramay midumaan so kultura ra, saramay mansasalita na arum a lenguahe, tan saramay mayayaman.—Roma 1:14, paimano’d leksab ed New World Translation.
3 Balet, panon yon napulongan so arum a mansasalita na sananey a lenguahe? Usaren a maong so bokletan Good News for People of All Nations. Nayarin mangawit kayo met na pigaran tract odino brosyur diad saray lenguahen kaslakan a sasalitaen diad teritorya yo. (Nengnengen so Hulyo 2003 a Ministeryo Tayo ed Panarian, p. 4, par. 2-3.) Niarum ni, walaray manangipalapag a manggugunaet a manaral na sakey a panangibano tan simplin presentasyon diad arum iran lenguahe. Mabetbet a pandinayewan na totoo so pakadngel ed sakey a manggugunaet a mansalita ed mismon lenguahe ra, anggano limitado labat, tan nayarin nasagyat ira ed maong a balita lapud satan.
4 Aligen si Jehova: No sasabien tayo so totoo a walaan na nanduruman kipapasen, aaligen tayo so agmanangidumaduman Dios tayo, si Jehova, a “labay to a saray amin a totoo [et] nilaban ira komon, tan ondago ra ed pakapikabat ed katuaan.”—1 Tim. 2:3, 4.